Afghan Bibles
دری · پښتو · English

د شمېر کتاب

اول فصل

د اسرائيلو اوله سرشمېرنه

۱د مصر څخه د اسرائيلو د قوم د راوتلو څخه وروسته د دوهم کال د دوهمې مياشتې په اوله ورځ کله چې څښتن د حضرت موسیٰ سره د سينا په دښته کې په مقدسه خېمه کې خبرې وکړې هغه وفرمايل: ۲”ته او هارون طايفه په طايفه او کورنۍ په کورنۍ د اسرائيلو د ټول قوم سرشمېرنه وکړئ او د هغو ټولو خلکو د نومونو لست وليکئ ۳چې عمر يې شل کاله يا زيات وي او جنګ کولی شي. ۴د هرې قبيلې د طايفې د يو مشر څخه مرسته وغواړئ. ۵دا د هغو مشرانو نومونه دي چې تاسو سره بايد مرسته وکړي:

  • د روبين له قبيلې څخه اليصور د شديئور زوی
  • ۶د شمعون له قبيلې څخه شلوميئيل د صوريشدای زوی
  • ۷د يهودا له قبيلې څخه نحشون د عميناداب زوی
  • ۸د يساکار له قبيلې څخه نتنائيل د صوغر زوی
  • ۹د زبولون له قبيلې څخه الياب د حيلون زوی
  • ۱۰د حضرت يوسف له زامنو څخه:
    • د افرايم له قبيلې څخه اليشمع د عميهود زوی
    • د منسي له قبيلې څخه جمليئيل د فدهصور زوی
  • ۱۱د بنيامين له قبيلې څخه ابيدان د جدعوني زوی
  • ۱۲د دان له قبيلې څخه اخيعزر د عميشدای زوی
  • ۱۳د اشير له قبيلې څخه فجعيئيل د عکران زوی
  • ۱۴د جاد له قبيلې څخه الياساف د دعوئيل زوی
  • ۱۵د نفتالي له قبيلې څخه اخيرع د عينان زوی.“

۱۶دا خلک قبيلوي مشران ؤو چې د اسرائيلو د قوم څخه د دې کار دپاره وټاکل شول.

۱۷د دې دولسو نفرو په مرسته حضرت موسیٰ او حضرت هارون ۱۸د دوهمې مياشتې په اوله ورځ ټول قوم راوغوښت. خلکو خپل نومونه طايفه په طايفه او کورنۍ په کورنۍ وليکل او هغه نفر چې عمر يې شل کاله يا زيات ؤ د هر يو نوم په لست کې وليکل شو. ۱۹څنګه چې څښتن په حضرت موسیٰ باندې امر کړی ؤ، هغوی يې د سينا په دښته کې وشمېرل: ۲۰‏-۴۶ټول نفر چې عمر يې شل کاله يا زيات ؤ او جنګ يې کولی شو نومونه يې په لست کې وليکل شول. د هر يو نوم د خپلو طايفو او کورنيو د سوانحو په مطابق وليکل شو او د حضرت يعقوب د مشر زوی روبين د قبيلې څخه شروع وشوه.

  • د روبين د اولادې شمېر: ۴۶۵۰۰ تنه
  • د شمعون د اولادې څخه: ۵۹۳۰۰ تنه
  • د جاد د اولادې څخه: ۴۵۶۵۰ تنه
  • د يهودا د اولادې څخه: ۷۴۶۰۰ تنه
  • د يساکار د اولادې څخه: ۵۴۴۰۰ تنه
  • د زبولون د اولادې څخه: ۵۷۴۰۰ تنه
  • د حضرت يوسف د زامنو څخه:
    • د افرايم د اولادې څخه: ۴۰۵۰۰ تنه
    • د منسي د اولادې څخه: ۳۲۲۰۰ تنه
  • د بنيامين د اولادې څخه: ۳۵۴۰۰ تنه
  • د دان د اولادې څخه: ۶۲۷۰۰ تنه
  • د اشير د اولادې څخه: ۴۱۵۰۰ تنه
  • د نفتالي د اولادې څخه: ۵۳۴۰۰ تنه

د هغو نفرو شمېر چې د حضرت موسیٰ، حضرت هارون او د دولسو قبيلو د مشرانو له خوا ليکل شوی ؤ، ټول ۶۰۳۵۵۰ تنه ؤو.

۴۷مګر هغه خلک چې د لاوي د قبيلې څخه ؤو په دې کې شامل نه ؤو، ۴۸ ځکه چې څښتن حضرت موسیٰ ته فرمايلي ؤو: ۴۹”کله چې ته د هغو نفرو سرشمېرنه کوې چې جنګ کولی شي، نو د لاوي قبيله په کې مه شاملوه. ۵۰د هغې په ځای لاويان د مقدسې خېمې او د هغې د ټول سامان مسئولان وټاکه. هغوی به دا خېمه او د هغې سامان انتقالوي، ساتنه به يې کوي او د هغې په شاوخوا کې به خپلې خېمې ودروي. ۵۱هرکله چې تاسو خپلې خېمې بل ځای ته وړئ، نو لاويان دې مقدسه خېمه راټوله کړي او په نوي ځای کې دې بيا ودروي. که بل هرڅوک ورته نژدې ورشي وبه وژل شي. ۵۲پاتې اسرائيليان به د خپلو ډلو په اساس خېمې ودروي، هر سړی به د خپل بيرغ لاندې د خپلې ډلې سره وي. ۵۳خو لاويان به خپلې خېمې د مقدسې خېمې په شاوخوا کې ودروي ترڅو د اسرائيلو په قوم باندې زما قهر نازل نشي. لاويان دې د مقدسې خېمې د ساتلو مسئوليت په غاړه واخلي.“

۵۴څنګه چې څښتن په حضرت موسیٰ باندې امر کړی ؤ، اسرائيليانو کټ مټ هماغسې وکړل.