Afghan Bibles
English · دری · پښتو

ڎُیوْنُم فَصلی

عیسی یی شیل شفای ڎاد

(اِکدِسگه مَتا ۹:‌۱‌-‌۸ اَت لوقا ۵:‌۱۷‌-‌٢۶)

۱څوْند مېٿ نَږجأد ات عیسی ڤاگه تَر قَریه یی کَپِرناحوم یَت اَت مَردُمېنېن فأمت یو تَر چید. ۲لَپ مَردُمېنېن یَمَند جمع سَت، دِسگه اِدی وی چید دِڤی یَند هَچَٿ جای نَڤُد. اَت عیسی یی وېڤَرد مویده خایی خُڎای وعظ چود. ۳څَڤار نَفَرېن یی شیل چارِک زاښت اَت تَر وی خېزېن ڤود. ۴اَما دوْندَرد بیروبار ڤُد وأڎ وی هَمرایېنېن نَڤأرڎاد وی تَر عیسی خېز ویڎېن. عیسی تَر وی چید څه ڤُد دوْند جایېن وی چید دِشید پَت چود اَت وی شیل چارِکېن بالَښ قتی هر وی خېز وېڎد. ۵اَت وَختی عیسی یی وېڤ اېموْن څه وینت وی شیل چارِکَردی لوْد: «اې جوْن، تو گُناه یېنېن تُرد بَښخِښ سَت.» ۶څوْند نَفَرېن از مُلایېن یَهود یَمَند نیسڅِنېن ڤَد ات تَر خو ېن لوْد: ۷«یِد کافِر چیزَرد دِسگه لوْڤد؟ بَغَیر از خُڎای ته یِچأیَٿ نَڤأرڎید گُناه بَښخِښ کِښت.» ۸عیسی روح تېزَٿ فأمت چیز چُرت وېڤ زارڎَند. اَت وېڤَرد لوْد: «چیزَرد دِسگه چُرتېن خو زارڎَند جای ڎېت؟ ۹اِکدِسگه آسوْندی نِس نه څه لوْم: تو گُناه یېن بَښخِښ سَت، دِجٲت یی چأی ته نَوینت سَتېن یا نَسَتېن. اَت یِد مُښکِل دی څه لوْم: اَندِځ ات خو بالَښ زی خو سه تویدَت، دِجٲت فُکَٿ ته وِنېت. ۱۰اَما وُز ته تَمَرد دِڤېسُم آدَم پُڅَند اَر زِمأڎ قُدرَت اَت اِختیاری بَښخِښ گُنایېن یَست.» تأمی عیسی وی شیل چارِکَرد لوْد: ۱۱«تُرد ته لوْم: اَندِځ خو بالَښ زی خو سه تَر خو چید.» ۱۲یو اَندوید اَت تېزَٿی خو بالَښ زاښت اَت فُکَٿ څېمېن پِراندی نَښتوید. فُکَٿ مَردُمېنېن لَپ حَیرَت رېد اَت خُڎایَردېن شُکرَت چود اَت لوْدېن: «مأشأم تا شِچېڅ غَل دِسگه هَچَٿ نه وینچ.»

دعوَت از یی چارِک بَنوْم لاوی

(اِکدِسگه مَتا ۹:‌۹‏‌-‌۱٣ اَت لوقا ۵:‌٢۷‏‌-‌٣٢)

۱۳ڤاگه عیسی تَر جَلیل قوْل لأڤ توید، ات مَردُمېنېن تَر وی خېز یَت اَت یو وېڤَرد تعلیم دَرَو ڎێد سُت. ۱۴اَت وَختی څه توید لاوی حَلفی پُڅی وینت اِدی تَر جای اِدی مالیه یېن څه زاښت یَمَند نوسچِن ڤُد اَت عیسی یی وِرد لوْد: «مو ڎأم تی یه.» لاوی اَندوید اَت وی ڎأم تی توید. ۱۵بعد عیسی تَر لاوی چید دَستارخوْن تی نوسچِن څه ڤُد فَنٲ از مالیه گیرېن اَت گُناکارېن وی اَصحابېن قَتی گَرڎٲ خود، دی جأت لَپ از وېڤېن وی پَیرَووْن ڤَد. ۱۶وَختی یِلأڤ از مُلایېن شَریعت فِریسی یېنېن څه ڤَد وی یېن وینت مالیه گیرېن اَت گُناکارېن قَتی خُراک خیرت از عیسی اَصحابېنېن پېښست: «چیزَرد یو مالیه گیرېن اَت گُناکارېن قَتی خُراک خیرت؟» ۱۷عیسی یی وېڤ گأپ ښُد اَت وېڤَردی لوْد: «هر تأم خُب څه ڤِد وِرد طَبیب دَر کار نِست، اَما ناجورېنَرد طَبیب دَر کار. وُزُم یَٿچ تا گُناکارېن دعوَت کِنُم تا راه راستی تی تیېن، نه بې گُناه یېن.»

روزه جأت

(اِکدِسگه مَتا ۹:‌۱۴‏‌-‌۱۷ اَت لوقا ۵:‌٣٣‏‌-‌٣۹)

۱۸یی وَخت یحیی ښاگِردېن اَت پَیرَوېن فِرقه یی فِریسی ېن روزه ېن څه ڤَد، یِلأڤېنېن تَر عیسی خېز یَت اَت پِښستېن: «چیزَرد یحیی ښاگِردېن اَت پَیرووْنی فِرقه فِریسی روزه اَنجېن، اَت تو ښاگِردېن روزه نه اَنجېن؟» ۱۹عیسی یی وېڤَرد لوْد: «ڤأرڎی یېت ښوْنچی رَفیقېنَرد وَختی خُشَندی لوْڤېت تَمه روزه اَنجېت؟ نأی، تا وَختی یِدی ښوْنچی وېڤ قَتی څه وأڎ ته نَڤأرڎېن روزه اَنجېن. ۲۰اَما یی وَخت ته یاڎد اِدی ښوْنچی ته از وېڤ پَرجوڤج سوْد، اَت اِکوی وَخت ته وأڎ ڤأرڎیېن روزه اَنجېن. ۲۱یی چأی ته کوْنه لُق تی نَو پِسون نه ڎید. اَگه دِسگه څه کِښت یو پِسون ته تَر پألی سوْد. ات وی جای ته غُلأ دی اَت بَتَردی سوْد. ۲۲اَت یی چأی ته تازه اَنگورڎ ښُڅ اَر کوْنه مَشکوله خالی نه کِښت. اَگه دِسگه څه کِښت اَنگورڎ ښُڅ ته مَشکوله ښِچېفت اَت مَشکوله اَت اَنگورڎ ښُڅ ته ڤأرٿ از بَین تیېن. تازه اَنگورڎ ښُڅ اَر نَو مَشکوله حُکمَندَٿ خالی کِښت.»

شَنبه مېٿ جأت

(اِکدِسگه مَتا ۱٢:‌۱‏‌-‌۸ اَت لوقا ۶:‌۱‏‌-‌۵)

۲۳اَت شَنبه مېٿ عیسی ژِندَم ڤه نَږجید اَت وی ښاگِردېنېن وی دأم تی پوْند تاید اَت راږځېن دَرَو پِتِد سَت. ۲۴فِریسېنېن وِرد لوْد: «چِس، تو ښاگِردېن بَر ضِدی مأش مَذهَب کار کِنېن، شَنبه مېٿَند کار خُب نِست.» ۲۵عیسی یی لوْد: «تَمه یېت کِتابی آسموْنی یَند نَښێیجا، وَختی داود پادښاه اَت وی رَفیقېنېن مَږځوْنج څه رېد یو یی چیر چود؟ ۲۶وَخت اِدی اَبیاتَر غُلأ خَلیفه څه ڤُد، تَر خوْنه خُڎای دېد اَت گَرڎٲ یِدی بَنوْمی خُڎای څه ڤُد یو یی وی خود، اَما وی وَختَند بَغَیر از وېڤ خَلیفه یېنَند یِچِردَٿ اِجازه یی خیداو نَڤُد، اَما یو یی خود اَت خو همرایېنَرد مِس ڎاد.» ۲۷اَت وېڤَردی لوْد: «خُڎای مَردُم فایدٲ جأت امر چوږج شَنبه مېٿ بایَد کار مأکېت، اَت مېٿ فایدٲ جأت نَی. ۲۸اَت دِجأت اِنسوْن پُڅ صاحب اِختیار شَنبه مېٿ یَست.»