Afghan Bibles
English · دری · پښتو

فَصلی اَوَل

مویده خایی یحیی یی غوْط ڎأڎیج

(اِکدِسگه مَتا ٣:‌۱‏‌-‌۱٢ اَت لوقا ٣:‌۱‏‌-‌۱۸ اَت یوحنا ۱:‌۱۹‏‌-‌٢۸)

۱شُروع مویده خایی عیسی مَسیح خُڎای پُڅ: ۲تَر کِتاب اَشعیای پَیغَمبَر نِڤِشچ سُڎج: خو پېغوْم رَسوْن ته پېښا پېښ از تو بازُم، یو پوْند تُرد یېت کِښت. ۳ات اِکو قیویج ته تَر چوله یی بیابوْن قیود: «خُداوَندَرد پوْند یتېت اَت وی راه یېن راست کِنېت.» ۴یحیی یی غوْط ڎأڎیج تَر چوله یی بیابوْن پېڎا سُت اَت دَرَو وعظ سُت اِدی مَردُم حُکمَدَٿ بَښخِښ سِتاوی خو گُناه یېن توبه کِنېن اَت غوْط ڎاڎج سېن. ۵مَردُمېنېن از فُکَٿ سَرزَمین یَهودیه اَت از ښأر اورشلیمېن تَر وی خېز تاید ات از خو گُناه یېنېن اِقرار چود اَت اَر دَریا اُردُنېن وی مِڎُست غوْط ڎاڎج سَت. ۶یحیی یَندېن وی پوښاکېن از ښِتُر ووْن ڤَد اَت پوْستین تَسمه یی خو تَر میڎ چود اَت وی خوراک ژِدیشک اَت عسَل صحرایی ڤُد. ۷یو یی وعظ چود اَت لوْدی: «بعد از مو ته تَووْنایی چارِک یاڎد اِدی وُزُم وی پێخبأند لایِق نِست. ۸وُز تَمه هر ښَڅ غوْط ڎأڎُم اَت زِنیم ته اَما یو ته یاڎد ات تَمه باطِن ته خُڎای روح قَتی زنید.»

عیسی غوْط سُت اَت شَیطوْن وی وَسوَسه دَرَو سُت

۹دی وَختَند عیسی از قَریه ناصِره یی جَلیل یَت اَت اَر دَریای اُردُن یحیی مِڎُست غوْط ڎاڎج سُت. ۱۰عیسی از ښَڅ نَښتوید ات چوښتی یِدی آسموْن یېت سُت اَت خُڎای روح چِبوْد جِناو از آسموْن وِرد نازِل سُت. ۱۱صَدا از آسموْن یَت اَت لوْدی: «تُت مو نازیوْن پُڅ، از تو‍یُم خُښنود.» ۱۲تېزَٿی خُڎای روح تَر چوله یی بیابوْن وی یاد. ۱۳یو چِهل مېٿ تَر چوله یی بیابوْن رېد اَت شَیطوْنی وی دَرَو وَسوَسه سُت. عیسی حَیووْنېنی وحشی قاتَرد ڤُد اَت فرښته یېنېن وِرد یاردَم فِرێپت.

عیسی یی څَڤار مایی اَنجأڤیج تَر خو خېز تِلأپت

(اِکدِسگه مَتا ۴:‌۱٢‏‌-‌٢٢ اَت لوقا ۴:‌۱۴‏‌-‌۱۵،‌۵:‌۱‏‌-‌۱۱)

۱۴تأم یحیی یی غوْط ڎأڎیج بَندی سُت ات عیسی تَر مَنطِقه جَلیل توید اَت مویده خایی خُڎایی وېڤ آدمېنَرد وعظ چود. ۱۵اَت لوْدی: «وَختی فِریپچ اِدی خُڎای پادښاهی قَریب یَٿچ، توبه کِنېت اَت اِکمی مویده خایی اَرد اېموْن ڤېت.» ۱۶قوْل اِدی بَنوْم جَلیل څه ڤَد، عیسی وَم پألی ڤه یی نێږد ات شَمعوْن اَت وی ڤِراد اَندریاس وینت وأڎېن خو ښَستین اَر جَلیل قوْل پِتێود تا مایی اَنجېن. ۱۷عیسی وېڤ تِلأپت اَت لوْدی: «تا شِچېڅېت مایی اَنجوڤد اَت شِچ مو دأم تی یَدېت یاڎ تَمَرد ڎأڎُم څَرأنگ آدَمېن مِس مایی جِناو اَنجېت.» ۱۸وأڎ ڎو نَفَرېن تېزَٿ خو ښَستینېن پِتێود اَت وی دأم تی یېن تاید. ۱۹دوسِک ڎَردی ېن از عیسی زَبَدی پَڅېنېن، یعقوب اَت یوحنا ڤَد ات یو یی وېڤ وینت وأڎېن اَر کِښتی خو ښأستېنېن تَیار چیداوَند ڤَد. ۲۰عیسی یی وېڤ ڎو نَفَر تېزَٿ تَر خو خېز تِلأپت. وأڎېن خو تأت زَبَدی وی خِدمَتکارېن قَتی اَر کِښتی لأک چود اَت خُبَٿېن عیسی دأم تی تاید.

عیسی یی وایمه دار چارِکی شِفا ڎ‌اد

(اِکدِسگه لوقا ۴:‌٣۱‌-‌٣۷)

۲۱وأڎېن تَر کَپِرناحوم داخِل سَت اَت یوْدَند شَنبه مېٿ فِریپت اَت عیسی تَر عبادَتگاه توید اَت تعلیم دَرَو سُت. ۲۲مَردُمېنېن از وی تعلیم حَیرَت رېد، دِجأت یویی با قُدرَت اَت اِختیاری وېڤَرد تعلیم ڎاد اَما مُلایېنَند نه قُدرَت ڤُد اَت نه اِختیار. ۲۳وی وَختَند یی وایمه دار چارِک تَرَم دېد اَت قیودی: ۲۴«اې عیسی ناصری، تُند پی مأش چیر؟ یَٿچت مأش جوْن زێزییا؟ وُز وِزوْنُم تُت چأی، تُت خُڎای باښچِن اې پاکی متعال.» ۲۵اَت عیسی یی وی جِنېڅ لوْد: «قَرار ڤی اَت از می چارِک نَښتی.» ۲۶جِن وی چارِک خَښَٿ کلتینت اَت وأغسَتی صَدا از وی چارِک نَښتوید. ۲۷فُکَٿېن دِس حَیرَت رېد اَت از یَکدِگه یېن پېښست: «یَم چیز گأپ؟ څَرأنگ تعلیمات تازه اَت قُدرَت قَتی. اَت یو ته جِنیات تی فَرموْن ڎید اَت وأڎ اِطاعت کِنېن.» ۲۸به جألدی وی نوْم تَر فُکه جَلیل تِخیرم سُت.

عیسی یی بېمارېن شِفا ‌ڎاد

۲۹وأڎېن از عبادَتگاه یَهودېن نَښتاید. یعقوب اَت یوحنا قَتی عیسیی تَر شَمعوْن اَت اَندریاس چید توید. ۳۰شَمعوْن خیښَند تأب ڤُد اَت یٲ هر بیرېج وێښچِن ڤَد. وَختی عیسی تَر وی جای څه فِریپت از حال وَم ږِنِک خَبَر سُت. ۳۱عیسی تَر وَم خېز سُت، اَت وَم ڎُستَردی اَنجوڤد ات وَمی اَندوْځد. وَم تأب بېد اَت یٲ وېڤَرد دَرَو خِدمَت سَت. ۳۲تأم خیر نوست اَت ښأب سُت، فُکَٿ بېمارېن اَت ڎېوِنېنېن تَر وی خېز ڤود. ۳۳فُکَٿ وی قَریه مَردُمېنېن وی چید پِراندی جمع سَت. ۳۴بېمارېن اِدی هَزار جوفی مَرَض وېڤَند څه ڤُد عیسی یی وېڤ شِفا ڎاد اَت لَپ جِنیاتی از وېڤ زِواست. وأڎېن جَندېنېن فأمت عیسی خُڎای باښچِن دِجٲت وېڤَردی اِجازه نه ڎاد وأڎ گأپ ڎېن، اِدی یو چأی.

عیسی خو پېغوْم تَر فُکَٿ جای فِراپت

۳۵سحرکی عیسی اَندوید اَت از چیدَند نَښتوید. پی یی ښاڎ توید پَدَم یِچیَٿ نَڤُد اَت دَرَو دعا سُت. ۳۶شَمعوْن اَت وی همرایېن دَرَو ښِکید وی سَت. ۳۷اَت وَختی وی یېن څه ڤِرود وِردېن لوْد: «فُکَٿ تو ښِکَرېن.» ۳۸عیسی یی وېڤَرد لوْد: «یَدېت تَر اچگه قَریه یېن مِس سأوأم دِجأتُم یَٿچ تا خو پېغوْم تَرَم مِس فِرێپُم.» ۳۹عیسی تَر فُکَٿ مَنطِقه جَلیل نێږد اَت خو پېغوْم تَر عبادتگاهېن یَهود فِراپت اَت جِنیاتی از مَردُم زِواست.

عیسی یی پېس چارِک شِفا ڎاد

۴۰یی نَفَرَند مَرَض جَلدی یی پِڎَفڅَک څه ڤُد تَر عیسی خېز یَت، چی زوْن خو ڎاد اَت خواهِښ قتی یی لوْد: «ای آقا، خواهِښُم پاک مو کِن.» ۴۱عیسی زارڎ وی تی ٿُد، خو ڎُستی تَر وی اَٿێرت، څێپتی وی اَت لوْدی: «اَلبَته خواهِښُم، پاک سأو.» ۴۲وی مَرَض تېزَٿ بېد اَت پاک سُت. ۴۳بعد عیسی یی وی رُخصَت چود اَت وی غوْږَندی لوْد: ۴۴«تو وُښ ڤِد تَر یی چی ته نَلوْڤی، سه خو خَلیفه یَرد دِڤېس اَت خو پاک سِتاو جأت خُڎایی اِدی موسی پَیغَمبَری حُکم څه چوږج کِن اَت تو شفای جأت شاهِد ڤِد.» ۴۵اَما یو چارِک توید اَت دی خَبَر تَر فُک جا تِخیرم چود. عیسی یی اچگه نَڤأرڎاد روښکاره تَر قَریه ېن سوْد تَر جایېن خِلوَت رېد اَت مَردُم از فُکه تَر وی خېز یَت.