Afghan Bibles
English · دری · پښتو

کِتاب دَرباره یی یونُس پَیغَمبَر

فَصلی ۱

یونُس از خُڎای رِڅوست

۱یی مېٿ کَلوْم خُڎای یونُس، اَمِتای پُڅَرد نازِل سُت اَت یَمَند دِسگه لوْڤجِن ڤُد: ۲«تَر ښأر غُلأ نینوا سأو اَت وی مَردُمَرد اِختار ڎه اِدی خُڎای یی لوْد: وېڤ بَدِیېنېن از نَظَر مو پِنهوْن نِست اَت وُز ته به جٲلدی وېڤ نابود کِنُم.» ۳اَما یونُس خواهِښ دِسگه ڤُد ادی از خُڎای رِڅیٿت تٲم تَر ښٲر یافا توید اَت تَرَمی یی کِښتی وینت ادی یٲ تَر ښٲر تَرشیش چی تید ڤَد. یونُس خو کِرایی دأک چود اَت پی کِښتی مُسافِرېن قَتی سَوار سُت تا وېڤ قَتی از چَنگ خُڎای تَر ښٲر تَرشیش رِڅیٿت. ۴اَما یوْدَند کِشتی از ساحِل ڎَر سَت، بېخِلیوَند خُڎای خَښ ښوځ رِماد اَت دوْندَرد خَښ ښُڅ ڤُد اِدی قَریب کِشتی غَرق سوْد. ۵وَم کِشتی صاحبېنېن از ښاج خو جوْن، هر چِدوْم از خو خُڎای یاری تِلأپت. وأڎېن خو ویزېن اَر بَحر پتِێود تا کِشتی سَبُک سوْد. اَت اِکدی دوْند وَختَند یونُس راحَت وَم کِښتی اَمبار خوْنه یَند تَر خوڎم ڤُد. ۶وَم کِښتی کَتَنَک تَر وی خېز سُت اَت قیودی: «یَم چیز گٲپ تُت بېخارَت څه ښاڤج؟ اَندِځ اَت پی خُڎای زارگی کِن! شاید مأش تی رحم کِښت اَت مأش نِجات ڎید!» ۷تأمېن کِښتی صاحبېن تَصمیم اَنجوڤد قُرعه پِتېن اَت چِسېن از دَستی چِدوْم از وېڤ غَضب خُڎای سُڎج اَت ښاجِجِن طوفوْن څه سُڎج. تٲم قُرعه یونُس پَیغَمبَر نوْم تی وێښت. ۸‏-۹وأڎېن از وی پېښست: «تو مأشَرد لوْ چیزَرد اِکِد بَلا مأش تی یَٿچ؟ تُت چأی؟ تو کار چیز؟ از چِدوْم جایَت؟ از چِدوْم قَومَت؟» یونُس لوْد: «وُزُم عبروْنی اَت خُداوَند، خُڎای آسموْن، زَمٲڎ اَت بَحری پېڎا څه چوږج پَرَستِښُم.» ۱۰ڤایی وېڤَرد لوْد: «از خُڎایُم رِڅوشچ.» وَخت وأڎېن دی څه ښُد لَپ ښاجېن ڎوید اَت لوْدېن: «چیزَردَت اِکدی کار چود؟» ۱۱یِد طوفوْن لَپ دی دَرَو سوْد اَت از وی یېن پېښست: «تو قَتی چیر کِنأم تا طوفوْن آروْم سوْد؟» ۱۲یونُس پَیغَمبَری لوْد: «مو اَر بَحر پِتېت اَت بَحر ته ڤاگه آروْم کِښت، دِجٲت وُز ته فأمُم اِکدی ښاجِجِن طوفوْن از دَستی مو سُڎج اَت تَمه یَت مِس بَلاندی څه وێښچ.» ۱۳اَما هر څوْندېن تلاش څه چود کِشتی تَر ساحِل فرِێپېن، کوْمیابېن نه سَت. طوفوْن از وی مِس خَښ دی سُت. ۱۴تٲمېن وأڎ خُداوَند، خُڎای یونُس خېز دعا چود اَت لوْدېن: «اې خُداوَند، مأش بَخاطر گُناه اِکمی شَخص هلاک مأ کِن اَت مأش مَسول مأرگ می مأ فأم؛ دِجٲت مأڎ کارېنېن فُکَٿ خواست تو.» ۱۵تٲمېن یونُس پَیغَمبَر زاښت اَت اَر ښَڅېن وی پِتێود اَت طوفوْن قَرار چود. ۱۶وأڎېن از خُڎای لَپ ښاج ڎوید اَت قُربوْنی نَذرېن وِرد چود. ۱۷تأم خُڎای غُلأ نَهَنگ باښت اَت یٲ یی از یونُس پَیغَمبَر اَباښت اَت یونُس پَیغَمبَر اَره ښٲب اَت مېٿ اَر وَم قیچ رېد.