Afghan Bibles
دری · پښتو · English

د هجرت کتاب

اول فصل

په اسرائيليانو باندې په مصر کې ظلم کيږي

۱‏-۵کله چې حضرت يعقوب مصر ته لاړ، د هغه زوی حضرت يوسف له پخوا نه هلته ؤ. نو حضرت يعقوب خپل نور زامن د هغوی د کورنيو سره بوتلل. د هغوی نومونه دا دي: روبين، شمعون، لاوي، يهودا، يساکار، زبولون، بنيامين، دان، نفتالي، جاد او اشير. د حضرت يعقوب د ټولو زامنو، لمسيو او کړوسيو شمېر اويا تنو ته رسېده او هغوی ټول د هغه سره لاړل. ۶د وخت په تېرېدو سره حضرت يوسف، د هغه ورونه او د هغې زمانې ټول خلک مړه شول، ۷خو د هغوی اولاده يعنې اسرائيليان د زياتو اولادونو خاوندان شول او هغوی دومره زيات شول چې مصر ورڅخه ډک شو.

۸له ډېرو کلونو وروسته په مصر کې يو نوي پادشاه قدرت ترلاسه کړ چې هغه د حضرت يوسف په باره کې هيڅ معلومات نه درلود. ۹هغه مصريانو ته وويل: ”د اسرائيلو شمېر زمونږ په خاوره کې ډېر شوی دی او هغوی زمونږ نه ډېر قوي دي. ۱۰که چېرې جنګ وشي نو کېدای شي چې هغوی زمونږ د دښمنانو سره يوځای شي او زمونږ په مقابل کې وجنګيږي او د دې وطن څخه وتښتي. نو مونږ بايد کومه لاره چاره وسنجوو او پرېنږدو چې د هغوی شمېر له دې څخه هم زيات شي.“ ۱۱نو مصريانو هغوی د کار مشرانو ته وروسپارل ترڅو هغوی اسرائيليان په سخت کار کمزوري کړي. هغوی د فيتوم او رعمسيس ښارونه چې فرعون په کې خپل ګودامونه ساتل جوړ کړل. ۱۲که څه هم د اسرائيليانو سره بده رويه کېدله، خو د هغوی شمېر زياتېده او نوره ځمکه يې هم ونيوله. له دې کبله مصريانو له هغوی څخه وېره درلودله ۱۳‏-۱۴او سخت ظلم يې ورباندې کاوه چې ژوند يې تريخ شي. هغوی به يې مجبورول چې خښتې جوړې کړي، خټې وکړي او په پټيو کې کار وکړي او هيڅ رحم يې ورباندې نه کاوه.

۱۵په آخر کې فرعون دوه دايې ګانې راوغوښتې چې شفره او فوعه نومېدلې او هغوی د عبرانۍ ښځو سره د اولاد د زېږولو په وخت کې مرسته کوله. ۱۶ هغوی ته يې وويل: ”که چېرې يوه عبرانۍ ښځه انجلۍ وزېږوي، هغه ژوندۍ پرېږدئ او که چېرې هلک وي نو ويې وژنئ!“ ۱۷که څه هم فرعون ورته ويلي ؤو، مګر دا ښځې د خدای پاک څخه وېرېدلې او هلکان يې نه وژل. ۱۸فرعون يو ځل بيا دا دوه دايې ګانې راوغوښتې او پوښتنه يې ورڅخه وکړه: ”تاسو ولې هغه هلکان ژوندي پرېږدئ؟“

۱۹هغوی په ځواب کې وويل: ”عبرانۍ ښځې د مصريو ښځو په پرتله ژر ماشوم زېږوي او زمونږ له رسېدلو څخه مخکې د هغوی ماشوم پيدا کيږي.“ ۲۰‏-۲۱ خدای پاک له هغو دوو ښځو سره ښه وکړل ځکه چې هغوی په رښتيا سره له خدايه وېرېدلې او هغوی دواړو ته يې اولادونه ورکړل. عبرانيان به زياتېدل او قوي کېدل. ۲۲باالاخره فرعون ټول قوم ته امر وکړ: ”څنګه چې عبرانی هلک پيدا کيږي، تاسو به هغه د نيل په سيند کې غورزوئ. مګر ټولې انجونې ژوندۍ پرېږدئ.“