۱ چه پولُسئے نێمگا، منِ پولُس که کاسِدے آن و منی کاسدی چه اِنسانانی نێمگا یا چه هاسێن مردمێئے نێمگا نه‌اِنت، چه ایسّا مَسیه و هُداێن پتئے نێمگا اِنت، هما هُدا که ایسّا مَسیهی چه مُردگان زندگ کرت. ۲ اے سجّهێن برات که گۆن من یکجاه اَنت، اے کاگد چه آیانی نێمگا اِنت هم.
په گَلاتیَهئے کلیسایان.
۳ چه مئے هُداێن پت و هُداوندێن ایسّا مَسیهئے نێمگا شمارا رهمت و اێمنی سر بات. ۴ ایسّا مَسیها وتا په مئے گناهانی دور کنگا نَدر کرت که مئے هُداێن پتئے واهگئے برکتا مارا چه انّوگێن هرابێن زمانگا برکّێنیت. ۵ هُدائے شان و شئوکت اَبد تان اَبد برجاه بات. اَنچُش بات. آمین.
۶ من هئیران آن که شما په دگه ”وشّێن مِستاگێا“ چۆن زوتّ هما هُدایا یله کنگا اێت که شمارا تئواری کرتگ که مَسیهئے رهمتانی چێرا زند بگوازێنێت. ۷ البت دگه وشّێن مِستاگ نێست، بله لهتێن مردم هست که شمارا مان گیشّێنَگا اَنت و مَسیهئے وشّێن مِستاگا بدل کنگَ لۆٹنت. ۸ تَنْتَنا اگن ما یا چه آسمانا آتکگێن پرێشتگے اے وشّێن مِستاگئے بدلا که ما شمئے کِرّا جار جتگ، دگه مِستاگێئے جارا بجنت، آییا نالت بات. ۹ اَنچۆ که ما پێسرا گوشتگ، نون من پدا گوَشان، اگن کَسے شمئے کِرّا هما وشّێن مِستاگئے بدلا که شمارا پێسرا رستگ، دگه مِستاگێئے جارا بجنت، آییا نالت بات. ۱۰ انّون من مردمانی وشنۆدیا لۆٹگا آن یا هُدائے؟ من مردمانی وشّ کنگئے جُهدا نه‌آن. اگن من اَنگت مردمانی وشّ کنگئے جُهدا بوتێنان، مَسیهئے هِزمتکارے نه‌اَتان.
۱۱ او براتان! شمارا گوَشان، هما وشّێن مِستاگ که من شمئے کِرّا جار جتگ، اِنسانئے سازتگێنے نه‌اِنت. ۱۲ چێا که اے مِستاگ منا چه اِنسانێئے نێمگا نرستگ و نه که کَسێا منا درس داتگ، اے منا چه ایسّا مَسیهئے نێمگا اِلهامێا رستگ. ۱۳ شما منی پێسریگێن زِندئے بارئوا اِشکتگ که من یَهودیانی دینئے هسابا گوازێنتگ. من هُدائے کلیسا سکّ باز آزار داتگ و جهدُن کرتگ که کلیسایا تباه بکنان. ۱۴ چه وتی بازێن همکئومێن همسرۆکێا گێشتر یَهودی دینئے پابند بوتگان و وتی پت و پیرُکی دۆدانی برجم دارگا سکّ پُرجۆش بوتگان.
۱۵ بله هُدایا که منا چه ماتئے لاپا گچێن کرتگ‌اَت، چه وتی رهمتئے برکتا منا تئوار جت و پئیسله‌ای کرت ۱۶ که وتی چُکّا په من زاهر بکنت تانکه من درکئومان آییئے چُکّئے مِستاگا سر بکنان. آ وهدی من اِشتاپ اِشتاپا چه کَسّا سر و سۆج نگِپت و ۱۷ دێم په اورشلیما په هما مردمانی گندگا نشُتان که چه من پێسر په کاسدیا گچێن کنگ بوتگ‌اَتنت. اَرَبستانا شتان و رندا دَمِشکا واترّ بوتان.
۱۸ سئے سال گوَست و نون اورشلیما کێپائے دیدارا شُتان و بسّ پانزده رۆچا گۆن آییا داشتُن. ۱۹ من اۆدا آ دگه کاسد ندیستنت، من بسّ هُداوندئے برات آکوب دیست. ۲۰ بچارێت، هرچے که په شما نبشته کنگا آن، هُدا شاهد اِنت که درۆگ نه‌اَنت. ۲۱ رندا سوریَه و کیلیکیَهئے دَمگان شُتان. ۲۲ مَسیهئے هما باورمند که یَهودیَهئے کلیسایا اَنت، منی جندِش ندیستگ‌اَت، ۲۳ بَسّ اِشکتگ‌اَتِش که مئے آزار دئیۆک نون وت هما ایمانئے جارا جنَگا اِنت که یکّ وهدے آییئے تباه کنگئے رَندا بوتگ. ۲۴ گڑا اے مردمان منی سئوَبا هُدائے سَتا و سَنا کرت.