۱ اِبرامئے لۆگی ساراییا چُکَّ نبوت. ساراییا مِسری مۆلدے هست‌اَت که نامی هاجِر اَت. ۲ ساراییا گۆن اِبراما گوَشت: ”هُداوندا منی دێم داشتگ و چُکّ آورتَ نکنان. تئو برئو و گۆن منی مۆلدا بوَپس که بلکێن منا چه آییئے نێمگا چُکّے ببیت.“اِبراما ساراییئے گَپّ زُرت. ۳ وهدے اِبراما دَه سال کَنهانا گوازێنتگ‌اَت، آییئے جَن ساراییا وتی مِسری مۆلد هاجِر زُرت و اِبرامارا په جَنی دات. ۴ اِبراما گۆن هاجِرا وپت و واب کرت و هاجِرئے لاپ پُرّ بوت. وهدے هاجِرا زانت که منی لاپ پُرّ اِنت، وتی بانُکئے مان نئیارَگی بندات کرت. ۵ گڑا ساراییا گۆن اِبراما گوَشت: ”اے اَزاب و شِدّت که منی سرا کپتگ، اِشیئے زِمّهوار تئو ائے. من وتی مۆلد تئیی بَگَلا دات و نون وهدے آ زانت که لاپی پُرّ اِنت، منا مانَ نئیاریت. هُداوند منی و تئیی نیاما دادرَس بات.“ ۶ بله اِبراما گۆن ساراییا گوَشت: ”تئیی مۆلد تئیی دستا اِنت، گۆن آییا هما پئیما بکن که تئیی دلا شَرتر اِنت.“گڑا سارایی، هاجِرئے سرا ترُند بوت و هاجِر چه آییا تتک.
۷ هُداوندئے پرێشتگا هاجِر گیابانا، چَمّگێئے کِرّا دیست. اے هما چَمّگ اِنت که شورئے راهئے سرا اِنت. ۸ پرێشتگا گوَشت: ”او هاجِر، ساراییئے مۆلد! تئو چه کجا آتکگئے و کجا رئوگا ائے؟“هاجِرا گوَشت: ”من چه وتی بانُک ساراییا تچگا آن.“ ۹ گڑا هُداوندئے پرێشتگا گوَشت: ”وتی بانُکئے کِرّا واترّ کن و وتا هماییئے دستا دئے.“ ۱۰ پرێشتگا چُش هم گوَشت: ”هُداوندَ گوَشیت که من تئیی نَسل و پَدرێچا اَنچۆ بازَ کنان که چه هسابا ڈَنَّ بنت.“
۱۱ هُداوندئے پرێشتگا پدا گوَشت:
”نون تئو لاپ‌پُرّ ائے و
مردێن‌چُکّے کارئے.
چُکّئے ناما اِسماێل بکن
چێا که هُداوندا تئیی پِریات اِشکتگ.
۱۲ اے بچکّ وَکشیێن هَرے بیت
اے سجّهێنانی دُژمنَ بیت و
سجّهێن اِشیئے دُژمنیا کننت.
اے وتی زندا گۆن وتی سجّهێن براتان
په جنگ و جێڑهَ گوازێنیت.“
۱۳ هُداوندا که گۆن هاجِرا هبر کرت، هاجِرا هُداوندارا اے نام بست: ”تئو هما هُدا ائے که منا گندئے.“چێا که هاجِرا گوَشت: ”نون من هما دیست که منا مُدامَ گندیت.“ ۱۴ پمێشکا اے چات، بِهێر‌لَهایی‌رویی نام کپت. اے چات، کادِش و بێرِدئے نیاما اِنت.
۱۵ گڑا هاجِرا په اِبراما مردێن‌چُکّے پێدا کرت و اِبراما هاجِرئے آورتگێن چُکّئے نام اِسماێل کرت. ۱۶ وهدے هاجِر په اِسماێلا چِلّگ بوت، اِبرامئے اُمر هشتاد و شش سال اَت.