۱ هما پئیما که هُداوندا وت گوَشتگ‌اَت، سارَهئے سرا مهربان بوت و په سارَها هما کاری کرت که وادهی کرتگ‌اَت. ۲ سارَهئے لاپ پُرّ بوت و اِبراهێمئے پیرانسریا په آییا مَردێن‌چُکّے آورتی. چُکّ هما گیشّتگێن وهدا پێدا بوت که هُدایا چه پێسرا اِبراهێم هال داتگ‌اَت. ۳ اِبراهێما وتی اے چُکّئے نام، که چه سارَها پێدا بوتگ‌اَت، اِساک کرت. ۴ اِساکئے اُمر که هشت رۆچ بوت، اِبراهێما سُنّت کناێنت، هما پئیما که هُدایا هُکم داتگ‌اَت. ۵ اے وهدا که اِساک پێدا بوت، اِبراهێمئے اُمر سَد سال اَت. ۶ سارَها گوَشت: ”هُدایا منا ’کَندَگ‘ داتگ و هرکَس که سهیگَ بیت، گۆن منَ کَندیت.“ ۷ پدا گوَشتی: ”کئیا گۆن اِبراهێما گوَشتَ کرت که سارَه چُکّ شیرَ مێچێنیت؟ بله من په آییا مردێن‌چُکّے آورت، آییئے پیریئے رۆچان.“
۸ چُکّ رُدان بوت و چه شیرا سِستِش. اے رۆچا که اِساکِش چه شیرا سِست، اِبراهێما مزنێن داوَتے کرت. ۹ بله سارَها دیست که اِبراهێمئے هما چُکّ که چه مِسری هاجِرا پێدا بوتگ‌اَت، منا کَلاگ گِرگا اِنت. ۱۰ گڑا سارَها گۆن اِبراهێما گوَشت: ”اے مۆلدا گۆن چُکّا گَلّێن. اے مۆلدئے چُکّ گۆن منی چُکّ اِساکا هچبر هَم‌میراس بوتَ نکنت.“ ۱۱ اے گپّا اِبراهێم سکّ پرێشان کرت، چێا که اِسماێل هم آییئے چُکّ اَت. ۱۲ بله هُدایا گۆن اِبراهێما گوَشت: ”په بچکّا و وتی مۆلدێن زالا پرێشان مبئے. هرچے سارَه ترا گوَشیت، هما وڑ بکن، چێا که تئیی نَسل و پَدرێچ چه اِساکا زانگَ بیت. ۱۳ من مۆلدێن زالئے چُکّا هم کئومے کنان چێا که آ هم تئیی نَسل و پَدرێچ اِنت.“
۱۴ دومی سُهبا ماهلّه اِبراهێما تۆشگ و مَشکے آپ زُرت و هاجِرارا دات. مَشک و تۆشگی هاجِرئے کۆپگا داتنت و گۆن چُکّا دری کرت. هاجِر شت و بێرشێبَهئے گیابانا سَرگَردان بوت. ۱۵ مَشکئے آپ که هلاس بوتنت، چُکّی ڈۆلُکێئے بُنا اێر کرت، ۱۶ وت دور شت و کِساس تیرکَشّێئے راها دێم په دێما نِشت. دلا گوَشتی: ”چُکّئے مَرکا مگِنداتان.“چُکّئے دێم په دێما که نِشتگ‌اَت، کوکّار کرت و گرێتی.
۱۷ هُدایا چُکّئے تئوار اِشکت و هُدائے پرێشتگا چه آسمانا هاجِر گوانک جت و گوَشت: ”هاجِر! ترا چے بوتگ؟ متُرس. چُکّ هما جاگها که اێر اِنت، هُدایا آییئے تئوار چه همۆدا اِشکتگ. ۱۸ پاد آ، چُکّا چست کن، دستایی گِر که من آییا مزنێن کئومے کنان.“ ۱۹ هُدایا هاجِرئے چمّ پَچ کرتنت و هاجِرا آپئے چاتے دیست. شت و مَشکی پُرّ کرت و چُکّی آپ دات.
۲۰ چُکّ رُدان بوت و هُدا گۆن آییا گۆن اَت. چُکّا گیابانا زندَ گوازێنت و تیرکمانئے جنَگا سکّ بلد بوت. ۲۱ اِسماێل، پارانئے دشتا جَهمنند بوت و ماتا گۆن مِسری جنکّێا سور دات.
۲۲ همے وهدا اَبیمَلِک و آییئے لشکرئے مستر پیکولا گۆن اِبراهێما گوَشت: ”تئو هرچے که کنئے، هُدا گۆن تئو گۆن اِنت. ۲۳ نون اِدا گۆن من هُدائے سئوگندا بوَر که منا یا منی چُکّان یا منی اۆبادگان ردَ ندئیئے. هما پئیما که من گۆن تئو مهربان بوتگان، تئو گۆن من و گۆن منی مُلکا همے پئیما مهربان بئے، گۆن همے مُلکا که تئو دَرامدێئے هسابا نِشتگئے.“ ۲۴ اِبراهێما گوَشت: ”منا سئوگند اِنت.“
۲۵ اِبراهێما اَبیمَلِکئے کِرّا آییئے هِزمتکارانی شکایت کرت که منی چاتے پُشتا کَشِّتگِش. ۲۶ اَبیمَلِکا گوَشت: ”منَ نزانان اے کار کئیا کرتگ. تئو منا هال نداتگ و تان مرۆچی من اِشیئے بارئوا هچّ نه‌اِشکتگ.“ ۲۷ گڑا اِبراهێما پَس و گۆک زُرت و اَبیمَلِکارا داتنت و دوێن مَردان اَهد و پئیمانے بست. ۲۸ اِبراهێما هپت کَسانێن مێش چه رمگا جتا کرت. ۲۹ اَبیمَلِکا چه اِبراهێما جُست کرت: ”تئو هپت کَسانێن مێش جتا کرت، اِشیئے مانا چے اِنت؟“ ۳۰ اِبراهێما پَسّئو دات: ”اے هپتێن مێشان چه منی نێمگا بزور. اے شاهدیے بیت که اے چات منیگ اِنت و من جتگ.“ ۳۱ گڑا آ جاگهئے نام بێرشێبَه کنگ بوت، چێا که دوێن مردان اۆدا سئوگندے وارت. ۳۲ اے پئیما مان بێرشێبَها اَهد و پئیمانے بستِش. رندا اَبیمَلِک و آییئے لشکرئے مستر پیکولا پیلِستیانی سرڈگارا واتَرّ کرت. ۳۳ اِبراهێما بێرشێبَها گزّئے درچکے کِشت و اۆدا هُداوند، اَبدمانێن هُدائے نامی تئوار کرت. ۳۴ تان مزنێن وهدێا اِبراهێما پیلِستیانی سرڈگارا دَرامدێئے هسابا زِندَ گوازێنت.