۱ وهدے آکوبا دیست که مِسرا دان هست، گۆن وتی چُکّان گوَشتی: ”چێا نِشتگ و یَکدومیا چارگا اێت؟ ۲ من اِشکتگ که مِسرا دانَ رسیت. برئوێت و دان بگرێت که زندگ بمانێن، شُدا ممِرێن.“
۳ گڑا ایسُّپئے دَه برات مِسرا دانئے گِرَگا شت. ۴ آکوبا ایسُّپئے برات بِنیامین گۆن آ دگه براتان دێم ندات، گوَشتی چۆ مبیت که تاوانے برسیتی. ۵ اے پئیما اِسراییلئے چُکّ هما مردمانی رُمبا گۆن اَتنت که دانئے گِرَگا آتکگ‌اَتنت، چێا که کَنهانئے مُلکا ڈُکّال اَت.
۶ نون ایسُّپ مُلکئے والی اَت. اے ایسُّپ اَت که مُلکئے سجّهێن مردمانی کرّا گندمی بها کرت. گڑا ایسُّپئے برات آتکنت و آییئے دێما په اَدب سَرِش جَهل کرت. ۷ وهدے ایسُّپا وتی برات دیستنت، پَجّاهی آورتنت، بله آیانی دێما زاهری نکرت. گۆن آیان په ترُندی هبری کرت و جُستی کرت: ”شما چه کجا آتکگێت؟“آیان پَسّئو دات: ”چه کَنهانئے مُلکا، دانئے زورگا آتکگێن.“
۸ ایسُّپا برات پَجّاه آورتنت، بله آیان ایسُّپ پَجّاه نئیاورت. ۹ ایسُّپ وتی وابانی ترانَگا کپت که براتانی بارئوا دیستگ‌اَتنتی. ایسُّپا گۆن آیان گوَشت: ”شما جاسوس و چاریگ اێت. شما اِدا آتکگێت که بزانێت مئے مُلکئے کجام جاگها پاسپانی و هِپازَت نِزۆرتر اِنت.“ ۱۰ آیان گوَشت: ”اِنّه، منی واجه! تئیی کَستر وَرد و وراکئے گرگا آتکگ‌اَنت. ۱۱ ما سجّهێن یکّێن پِتئے چُکّ اێن، راست و تچکێن مردم اێن، تئیی پادانی چێرئے هاک اێن، جاسوس و چاریگ نه‌اێن.“ ۱۲ ایسُّپا گوَشت: ”اِنّه! شما اِدا آتکگێت که بزانێت مئے مُلکئے کجام جاگها پاسپانی و هِپازَت نِزۆرتر اِنت.“ ۱۳ بله آیان گوَشت: ”تئیی کَستر یکّێن پتئے چُکّ اَنت و مئے پت کَنهانا جهمنند اِنت. ما دوازده برات بوتگێن. کَسترێن برات انّون پتئے کِرّا اِنت. آ دگه برات نون نێست‌اِنت.“ ۱۴ ایسُّپا گوَشت: ”انچۆ که من شمارا گوَشت، شما جاسوس و چاریگ اێت. ۱۵ شمارا اے پئیما چَکّاسێن: تانکه شمئے کَسترێن برات اِدا نئیئیت، منا پِرئونئے سرئے سئوگِند اِنت که شما چه اے جاگها شتَ نکنێت. ۱۶ چه وتی براتان یکّے راه دئیێت، بِلّی شمئے براتا کاریت. شما آ دگه برات همِدا بندیجاها مانێت. شمئے هبر چارگ و چکّاسگَ بنت که بارێن راستَ گوَشێت یا نه. اگن شما راست نگوَشت، منا پِرئونئے سرئے سئوگند اِنت که شما جاسوس و چاریگ اێت.“
۱۷ ایسُّپا تان سئے رۆچا سجّهێن برات بندیجاها بند کناێنتنت. ۱۸ سئیمی رۆچا گۆن آیان گوَشتی: ”هما پئیما که من شمارا گوَشان، هما پئیم بکنێت، گڑا زندگَ مانێت، پرچا که منا چه هُدایا تُرسیت. ۱۹ اگن شما راست و تچکێن مردم اێت، چه شما براتان یکّے بندیجاها بنندیت و آ دگه برئونت و په وتی لۆگئے گُژنَگێن مردمان دان ببرنت، ۲۰ بله وتی کَسترێن براتا منی کرّا بیارێت که شمئے هبر راست ببنت و چه مرکا برَکّێت.“آیان اَنچُش کرت و ۲۱ گۆن یکدگرا گوَشتِش: ”اَسلا مارا براتئے هَکّان گِپتگ. ما دیست که آ چینچُک پرێشان اَت، په وتی جانئے رَکّێنگا مئے کرّا دَزبندی و پریاتی کرت، بله ما آییئے هبر گۆش نداشتنت، پمێشکا اے مُسیبت مئے سرا کپتگ.“ ۲۲ روبِنا گوَشت: ”من وَه شمارا گوَشت که هچّی مکنێت، بله شما گۆش نداشت. نون مارا آییئے هۆنئے هساب دئیگی اِنت.“
۲۳ براتان نزانت که ایسُّپ مئے هبران سرپد بئیگا اِنت، چێا که ایسُّپ ترجُمه کنۆکێئے کُمَکّا گۆن آیان هبرا اَت. ۲۴ ایسُّپا وتی دێم آنگُر کرت و گرێتی. پدا دێمی تَرّێنت و گۆن آیان هبری کرت. گڑا چه براتانی نیاما شَمونی گِپت و آیانی چمّانی دێما دَست و پادی بنداێتنت.
۲۵ نون ایسُّپا هُکم دات که براتانی گۆنیان چه دانا پُرّ کنێت، هر یکّێئے نُگرَهان هماییئے جندئے گۆنیا مان کنێت و سپرئے تۆشَگِش هم بدئیێت. اے کار که په آیان کنگ بوتنت، ۲۶ نون آیان وتی دان هران لَڈّتنت و چه اۆدا راه گپتنت. ۲۷ راها شپا گِپتنت و یکّ جاگهێا منزلِش کرت. وهدے چه آیان یکّێا وتی گۆنیئے دپ پچ کرت که په وتی هرا کاه و کدیمے بکشّیت، دیستی که منی نُگره گۆنیئے دپ دپا اێر اَنت. ۲۸ گۆن وتی براتان گوَشتی: ”منی نُگرَهِش نَزُرتگ‌اَنت، اِش اَنت منی گۆنیئے تها اَنت.“تُرسے آیانی دلا کَپت. دێمِش گۆن یکدگرا کرت و دْرَهان و لَرزانا گوَشتِش: ”اے چِه کارے که هُدایا گۆن ما کرتگ؟“
۲۹ وهدے آ وتی پت آکوبئے کرّا کَنهانئے مُلکا آتکنت، وتی سجّهێن کِسّه و سرگوَستِش آورتنت. گوَشتِش: ۳۰ ”هما مرد که مُلکئے مستر اِنت، آییا گۆن ما په تْرندی هبر کرت و گوَشتی: ’شما اے مُلکا جاسوسی کنگا آتکگێت.‘ ۳۱ بله ما گۆن آییا گوَشت: ’ما راست و تچکێن مردم اێن، چاریگ و جاسوس نه‌اێن. ۳۲ ما یکّێن پتئے چُکّ اێن. دوازده برات بوتگێن. یکّ براتے نون نێست‌اِنت و کَسترێن برات انّون کَنهانا پتئے کرّا اِنت.‘ ۳۳ گڑا مُلکئے مسترا گوَشت: ’من هما وهدا زانان شما راست و تچکێن مردم اێت که شما یکّ براتے همِدا گۆن من بلّێت و آ دگه برئوێت و په وتی لۆگئے گُژنَگێن مردمان دان ببرێت و ۳۴ وتی کَسترێن براتا منی کرّا بیارێت. گڑا منَ زانان که شما چاریگ و جاسوس نه‌اێت و تچک و راستێن مردم اێت. رندا من شمئے براتا شمارا دئیان و شما اے مُلکا سئوداگری و باپار کرتَ کنێت.‘“
۳۵ وهدے آ وتی گۆنیان هالیگ کنگا اَتنت، هر یکّێئے گۆنیا آییئے نُگرهانی تورگ مان اَت. وهدے آیان و آیانی پتا نُگرهئے تورگ دیستنت، تُرستِش. ۳۶ آیانی پت آکوبا گوَشت: ”شما منا بےائولاد کنگا اێت. ایسُّپ هم نێست‌اِنت و شَمون هم. نون شما بِنیامینا پچ گِرگَ لۆٹێت. اے سجّهێن کَهر منی سرا کپگا اَنت.“
۳۷ روبِنا گۆن پتا گوَشت: ”اگن من تئیی چُکّ پدا په تئو نئیاورت، منی دوێن چُکّان بکُش. بِنیامینا منا بدئے، من پدا په تئو کارانی.“ ۳۸ بله آکوبا گوَشت: ”منی چُکّ گۆن شما نئیئیت گۆن. آییئے برات مُرتگ و بَسّ جندی پَشت کپتگ. اگن شمئے اے سپرا تاوانے برسیتی، من چه گَمانَ مِران و منی پیرێن سرئے هۆن شمئے گردنا بیت.“