۱ ایسّایا اے هبر کرتنت و نون گۆن وتی مُریدان کِدْرونئے دَرَگئے آ دستا شت. اۆدا باگے هست‌اَت، ایسّا و آییئے مُرید همۆدا شتنت. ۲ ایسّائے دْرۆهۆک یَهودایا آ جاگهَ زانت، چێا که ایسّا و آییئے مُرید گێشتر همۆدا یکجاهَ بوتنت. ۳ گڑا یَهودایا، رومی پئوجی و پَریسی و مزنێن دینی پێشوایانی دێم داتگێن لهتێن سپاهیگ زرت و هما باگا برتنت. آیان چِراگ و مَشَل و سِلاه گۆن اَت. ۴ ایسّایا زانت گۆن من چے بئیگی اِنت، دێما شت و جُستی کرت: ”شما کئیی شۆهازا اێت؟“ ۵ پسّئواِش دات: ”ایسّا ناسِریئے.“گوَشتی: ”من آن!“ ایسّائے دْرۆهۆک یَهودا هم همۆدا اۆشتاتگ‌اَت. ۶ وهدے ایسّایا گوَشت: ”من آن،“ آ مردم پُشتا کِنزت و زمینا کپتنت. ۷ پدا گوَشتی: ”کئیی شۆهازا اێت؟“آیان گوَشت: ”ایسّا ناسِریئے.“ ۸ ایسّایا درّاێنت: ”من وَه شمارا گوَشت که من آن. اگن منی شۆهازا اێت، اِشان بِلّێت که رئونت.“ ۹ ایسّایا چۆ گوَشت که آییئے پێسریگێن هبر راست و سَرجم ببیت: ”آ که تئو منا داتگ‌اَتنت، چه آیان کَسّ گار و بێگواه نبوت.“
۱۰ شَمون‌پِتْرُسا زَهمے گۆن اَت. همے وهدا، وتی زَهمی کَشّت، زْرابے جت و مسترێن دینی پێشوائے نئوکرئے راستێن گۆشی بُرّت. نئوکرئے نام مَلکاس اَت. ۱۱ ایسّایا گۆن پِتْرُسا گوَشت: ”وتی زَهما جُتکا کن! من آ پیالها نۆش مکنان که پتا منا داتگ؟“
۱۲ گڑا رومی پئوجی و آیانی سرمستر و یَهودی سپاهیگان، ایسّا دَزگیر کرت و بَست. ۱۳ ایسّااِش پێسرا هَنّائے کِرّا برت. هَنّا کئیاپائے جَنئے پت اَت و آ سالا کئیاپا مسترێن دینی پێشوا اَت. ۱۴ اے هما کئیاپا اَت که یَهودیانا اے سۆجی داتگ‌اَت که کئومئے جاها یکّ مردمێئے مِرَگ شرتر اِنت.
۱۵ شَمون‌پِتْرُس و دگه مُریدے ایسّائے پدا رئوان بوت و شتنت. آ دگه مُریدا گۆن مسترێن دینی پێشوایا پَجّارۆکی هست‌اَت، پمێشکا گۆن ایسّایا مسترێن دینی پێشوائے لۆگئے پێشگاها پُترت. ۱۶ بله پِتْرُس ڈنّا دَروازگئے نزّیکّا اۆشتات. گڑا آ مُرید که گۆن مسترێن دینی پێشوایا پَجّارۆک اَت، ڈنّا در آتک، گۆن دَروازگپانێن مۆلدا چیزّے گوَشتی و پِتْرُسی تۆکا برت. ۱۷ دَروازگپانێن مۆلدا گۆن پِتْرُسا گوَشت: ”زانا، تئو چه اے مردئے مُریدان نه‌ائے؟“آییا گوَشت: ”نه، نه‌آن!“ ۱۸ هِزمتکار و سپاهیگان آسے رۆک کرتگ‌اَت، چێا که شپ سارت اَت. آسئے کِرّا اۆشتاتگ‌اَتنت و وتا تاپگا اَتنت. پِتْرُس هم آیانی کِرّا اۆشتاتگ‌اَت و وتا تاپگا اَت.
۱۹ همے درگتا مسترێن دینی پێشوایا چه ایسّایا، آییئے مُریدانی بارئوا و تالیمئے بارئوا جُست و پُرس کرت. ۲۰ ایسّایا پَسّئو دات: ”من سجّهێن دنیائے دێما وتی هبر کرتگ‌اَنت. مُدام کَنیسَهان و مزنێن پرستشگاها تالیمُن داتگ، همۆدا که سجّهێن یَهودی مُچَّ بنت. من چێرُکایی هچّ هبرے نکرتگ. ۲۱ گڑا چێا چه من جُستَ گرئے؟ چه همایان جُست بگر که منی هبرِش اِشکتگ‌اَنت. آ زاننت که من چے گوَشتگ.“ ۲۲ وهدے ایسّایا اے هبر کرتنت، همۆدا اۆشتاتگێن سپاهیگێا ایسّائے دێما شَهماتے جت و گوَشتی: ”مسترێن دینی پێشوایا اے ڈئولا پَسّئوَ دئیئے؟“ ۲۳ ایسّایا درّاێنت: ”اگن من رَدێن هبرے کرت، منا مئیاریگ بکن. بله اگن من راست گوَشت، چێا منا جنئے؟“ ۲۴ گڑا هَنّایا ایسّا مسترێن دینی پێشوا کئیاپائے کِرّا دێم دات. ایسّائے دست اَنگت بَستگ‌اَتنت.
۲۵ شَمون‌پِتْرُس همۆدا اۆشتاتگ‌اَت و وتا تاپگا اَت. جُستِش کرت: ”زانا، تئو چه آییئے مُریدان یکّے نه‌ائے؟“آییا نمَنّت و گوَشتی: ”نه، نه‌آن.“ ۲۶ چه مسترێن دینی پێشوائے هِزمتکاران یکّے هما مردئے سیاد اَت که پِتْرُسا آییئے گۆش بُرِّتگ‌اَت. گۆن پِتْرُسا گوَشتی: ”من وَه ترا گۆن آییا هما باگا دیست. تئو هما نه‌ائے؟“ ۲۷ پِتْرُسا پدا نمَنّت. هما دمانا کرۆسا بانگ دات.
۲۸ ایسّااِش چه کئیاپائے کِرّا رومئے والیئے کلاتا برت. اے وهدا سُهب ماهلّه اَت و یَهودی والیئے کلاتا نشُتنت که ناپاک مبنت و سَرگوَزئے ائییدئے ورگا وارت بکننت. ۲۹ گڑا پیلاتوس ڈَنّا در آتک و چه آیان جُستی کرت: ”اے مردئے سرا شمئے بُهتام چے اِنت؟“ ۳۰ آیان پَسّئو دات: ”اگن مئیاریگ مبوتێن، ما تئیی دستا نداتگ‌اَت.“ ۳۱ پیلاتوسا گوَشت: ”اِشیا ببرێت و وتی شَریَتئے هسابا په اِشیا شئور و هُکمے ببُرّێت.“یَهودیان گوَشت: ”مارا اے اجازت نێست که کَسێا مَرکئے سزا بدئیێن.“ ۳۲ اے ڈئولا بوت تانکه ایسّائے هما هبر راست و سَرجم ببیت که وتی مرکئے وَڑ و پئیمئے بارئوا کرتگ‌اَتی.
۳۳ نون پیلاتوس وتی کلاتا شت و ایسّایی همۆدا لۆٹاێنت و گوَشتی: ”هئو! تئو یَهودیانی بادشاه ائے؟“ ۳۴ ایسّایا گوَشت: ”اے تئیی جندئے هبر اَنت یا دگران منی بارئوا ترا اے ڈئولا گوَشتگ؟“ ۳۵ پیلاتوسا گوَشت: ”زانا، من یَهودیے آن؟ تئیی وتی کئوم و مزنێن دینی پێشوایان ترا منی دستا داتگ. تئو چے کرتگ؟“ ۳۶ ایسّایا گوَشت: ”منی بادشاهی دنیایی بادشاهیے نه‌اِنت. اگن منی بادشاهی دنیایی بادشاهیے بوتێن، منی هِزمتکاران جنْگ کرتگ‌اَت که من یَهودیانی دستا مکپان. بله منی بادشاهی دنیایی بادشاهیے نه‌اِنت.“
۳۷ پیلاتوسا گوَشت: ”اَچه، تئو بادشاهے ائے؟“ایسّایا گوَشت: ”تئو وت منا بادشاهے گوَشگا ائے. من پێدا بوتگ و دنیایا آتکگان که په راستیا گواهی بدئیان. هرکَسا که راستی دۆستَ بیت، منی هبران گۆشَ داریت.“ ۳۸ پیلاتوسا درّاێنت: ”راستی چے اِنت؟“اے هبرئے کنگا رند پیلاتوس پدا یَهودیانی کِرّا شت و گوَشتی: ”من هچّ چُشێن بُنیادے نگندان که اے مردا مئیاربار بکنان. ۳۹ بله شمارا رسمے هست که من سَرگوَزئے ائییدئے رۆچا یکّ بندیگے په شما آزات بکنان. شما لۆٹێت که من یَهودیانی بادشاها په شما آزات بکنان؟“ ۴۰ آیان کوکّار کرت و پسّئو دات: ”نه، آییا نلۆٹێن! بَرَبّاسا آزات کن!“بَرَبّاس یاگیے اَت.