۱ هُداوندا بنازێنێت، هَلّێلویا.
هُداوندئے شُگرا بگرێت که نێک اِنت و
مِهری اَبدمان.
۲ کئے هُداوندئے پُرواکێن کارانی تئوسیپ و
آییئے تمانێن ستا و سنایا کرتَ کنت؟
۳ بَهتاور اَنت هما که اَدلا برجاه دارنت،
هما که مُدام اِنساپئے سرا کارَ کننت.
۴ او هُداوند! هما وهدا که وتی مردمانی سرا رهمَ کنئے، منا مشَمۆش.
منی کِرّا بیا و منا برَکّێن
۵ که تئیی گچێن کرتگێنانی وشبهتیا بگندان،
که تئیی کئومئے شادمانیا هئوار ببان و
تئیی مهلوکئے همراهیا پَهر بکنان.
۶ ما گناه کرتگ، مئے پتان هم،
ما رَدێن راهے زرتگ و بدکاری کرتگ.
۷ آ وهدا که مئے پت و پیرک مِسرا اَتنت،
تئیی هئیران کنۆکێن کارانی نێمگا دلگۆشِش نکرت و
تئیی سجّهێن مهربانی‌اِش شَمُشتنت،
دریائے کِرّا سرکشی‌اِش کرت، سُهرزِرئے کِرّا.
۸ بله هُداوندا په وتی نامئیگی رَکّێنتنت،
تانکه وتی زۆر و واکا زاهر بکنت.
۹ آییا سُهرزِر نِهرّ دات و زِر هُشک بوت،
چه جُهلانکیان اَنچش گوازێنتنتی که پوره گیابانے.
۱۰ چه بَدواهانی دستا رَکّێنت و
چه دژمنانی دستا مۆکِتنتی.
۱۱ آپا، آیانی دژمن پۆشێنت،
چه آیان یکّے هم پَشت نکپت.
۱۲ نون هُداوندئے لبزئے سرا باوَرِش کرت و
آییئے ستا و سنااِش کرت.
۱۳ بله زوتّ بێهئیال بوتنت که آییا چے کرتگ‌اَت و
په آییئے شئور و سَلاها ودارِش نکرت.
۱۴ گیابانا وتی هئوا و هئوَسانی رَندگیر بوتنت و
هُشکاوگان هُدااِش چکّاسِت.
۱۵ گڑا هرچے که لۆٹتِش، هُدایا داتنت،
بله آیانی جانا ورۆکێن نادراهیے هم داتی.
۱۶ اُردگاها، موسّائے سرا هَسَدِّش کرت و
هارونئے سرا هم، که هُداوندئے پَلگارتگێن دینی پێشوا اَت.
۱۷ گڑا زمینا دپ پَچ کرت و داتان اێری برت و
اَبیرامئے ٹۆلی باری دات.
۱۸ آیانی ٹۆلیا آسے مان کپت و
بْرانزان بدکار سۆتکنت.
۱۹ سینائے کۆها گوَسکے جۆڑِش کرت و
آسا تاپتگێن تِلاهێن بُتِش پرستش کرت.
۲۰ وتی مزَن‌شانێن هُدائے بدلا
کاه‌وارێن جَلَبێن گۆکێئے بُتِش زرت.
۲۱ وتی رَکّێنۆکێن هُدااِش شمُشت،
هما که مِسرا مزنێن کاری کرتگ‌اَت.
۲۲ هامئے سرڈگارا هئیران کنۆکێن و
سُهرزِرئے کِرّا باکَمالێن کاری کرتگ‌اَت.
۲۳ گڑا هُدایا گوَشت: ”گار و گُمسارِشَ کنان.“
بله آییئے گچێن کرتگێن موسّا نیاما کپت و
په آیانی تباه کنگا هُدائے گزبی داشت.
۲۴ آ دلکَشّێن مُلکئے اَرزش و کَدرِش نزانت،
آییئے کئولئے سرا باوَرِش نێست‌اَت.
۲۵ وتی گِدانانی تها نُرُنڈتِش و
هُداوندئے هبرِش نزرت.
۲۶ گڑا دستی چست کرت و سئوگندی وارت
که گیابانا تباهِشَ کنان و
۲۷ چُکّ و نُماسگانِش درکئومانی نیاما گار و گُمسارَ کنان و
سجّهێن مُلکان شِنگ و شانگِشَ کنان.
۲۸ آیان وتارا گۆن بَهَل پێۆرا جُگ کُرت و
په مُردگان کرتگێن کُربانیگِش وارتنت.
۲۹ گۆن وتی بدکاریان
هُداوندِش زَهر بَراێنت،
هئوپ و وباے سرااِش کپت.
۳۰ بله پینیهاس نیاما اۆشتات و دْوایی کرت و
وبا دارگ بوت.
۳۱ اے په آییا پاکی و پلگاریے هساب آرگ بوت،
نَسلانی نَسل، تان اَبد.
۳۲ مَریبائے آپانی کِرّا
هُداوندِش هِژم گِراێنت و
آیانی سئوَبا موسّا جَنجالا کپت،
۳۳ چێا که موسّااِش دلسیاه کرت و
چه آییئے دپا سُبکّێن هبرے در آتک.
۳۴ کئومِش آ پئیما تباه نکرتنت که
هُداوندا پرمان داتگ‌اَتنت.
۳۵ نون گۆن کئومان هۆر و تۆر بوت و
همایانی رسم و دۆدِش زرتنت.
۳۶ همایانی بُتِش سُجدهَ کرتنت و
اے بُت په آیان دامے بوتنت.
۳۷ وتی بچکّ و جنکِّش
په دێهان کُربانیگَ کرتنت.
۳۸ بێگناهێن هۆنِشَ رێتک
وتی بچکّ و جنکّانی هۆن،
که په کَنْهانئے بُتان کُربانیگِشَ کرتنت و
زمین چه اِشانی هۆنا آلودگ بوت.
۳۹ گۆن وتی کاران وتا ناپاک و
گۆن وتی کِردان وتا سیه‌کارِشَ کرت.
۴۰ پمێشکا، هُداوند وتی کئومئے سرا زَهر گپت،
دلی چه وتی میراسا بد بوت.
۴۱ درکئومانی دستا داتنتی و
بدواهان آیانی سرا هاکمی کرت.
۴۲ دژمنان آیانی سرا زُلم کرت و
وتی چێردست کرتنت.
۴۳ هُداوندا باز برا آزات کرتنت
بله وتی شئور و هئیالانی تها سَرکَشّی‌اِش کرت و
گناهانی تها بُکِّتنت.
۴۴ بله وهدے که آیانی پریاتی اِشکت،
دیستی که چۆن پرێشان اَنت،
۴۵ گۆن آیان وتی اَهد و کراری یات کرت و
چه وتی بازێن مِهرا، چه آیانی بدیان سر گوَست.
۴۶ آیانی سجّهێن بندیگ کنۆکانی دلا
په آیان رهمی پێدا کرت.
۴۷ او هُداوند، مئے هُدا! مارا بِرَکّێن،
مارا چه درکئومانی نیاما چِن و یکجاه کن
که تئیی پاکێن نامئے شُگرا بگرێن و
په تئیی ستایا پَهر بکنێن.
۴۸ هُداوندا ستا و سنا بات، اِسراییلئے هُدایا،
اَبد تان اَبد.
سجّهێن مردم بگوَشاتنت: ”انچُش بات. آمین.“
هُداوندا بنازێنێت، هَلّێلویا.