۱ هُداوندا بنازێنێت، هَلّێلویا.
بَهتاور اِنت هما که هُداوندئے تُرس آییئے دلا اِنت،
هما که آییئے هُکمی سکّ باز دۆستَ بنت.
۲ آییئے نَسل و اۆبادگ زمینئے سرا پُرزۆرَ بنت،
برکت نێکدلانی پدرێچا رسیت.
۳ آییئے لۆگ چه مال و مِلکتا پُرَّ بیت و
آییئے پهرێزکاری تان اَبد برجمَ مانیت.
۴ په نێکدلان مان تهارۆکیا هم رُژنَ دْرپشێنیت،
آ مهربان، رَهم کنۆک و آدل اِنت.
۵ بَکشنده و وام‌دِهێن مردمئے آسَر شَرَّ بیت،
هما که وتی کاران په انساپَ کنت.
۶ چێا که آ هچبر لرزێنَگَ نبیت،
پهرێزکارێن مردمے تان اَبد یات کنگَ بیت.
۷ آ چه بدێن هالانَ نتُرسیت،
دلی جَم اِنت، تئوکلی هُداوندئے سرا اِنت.
۸ آییئے دل مُهر اِنت، نتُرسیت،
نێٹ وتی دژمنانی شِکستا گندیت.
۹ گۆن گریب و نێزگاران بێهساب بکشنده اِنت،
آییئے پهرێزکاری تان اَبد برجم اِنت.
آییئے کانٹ په شانے بُرز کنگَ بیت.
۱۰ بدکارَ گندیت و هِژمناکَ بیت،
چه زهرا دنتانَ درُشیت و آپَ بیت،
بدکارئے واهگ نامُرادَ بنت.