۱دَ سالِ بِیست و سِوّمِ پادشاهی یوآش باچِه اَخَزیاه پادشاهِ یهُودا، یهواَخاز باچِه ییهُو دَ سامِره پادشاهِ اِسرائیل شُد و هفده سال پادشاهی کد. ۲اُو چِیزای ره که دَ نظرِ خُداوند بَد بُود انجام دَد و از گُناه های یرُبعام باچِه نِباط که باعِث شُد اِسرائیل گُناه کنه، پَیرَوی کد و ازوا دُوری نَکد. ۳امزی خاطر آتِشِ غَضَبِ خُداوند دَ بَلِه اِسرائیل داغ شُد و خُداوند اُونا ره باربار دَ دِستِ حزائیل پادشاهِ ارام و دَ دِستِ بِن‌هَدَد باچِه حزائیل تسلِیم کد. ۴لیکِن یهواَخاز دَ پیشِ خُداوند عُذر-و-زاری کده دُعا کد و خُداوند دُعای ازُو ره شِنِید، چُون اُو ظُلمی ره که دَ بَلِه اِسرائیل مُوشُد دِید، ظُلمی ره که پادشاهِ ارام دَ بَلِه ازوا مُوکد. ۵پس خُداوند یگ نِجات دِهِنده بَلدِه اِسرائیل رَیی کد و بَنی اِسرائیل از زیرِ دِستِ ارامیا خلاص شُده مِثلِ سابِق دَ خانه های خُو جای-دَ-جای شُد. ۶لیکِن اُونا از گُناه های خانَوارِ یرُبعام که باعِث شُد اِسرائیل گُناه کنه، دُوری نَکد و دَ امزُو گُناه‌ها اِدامه دَد؛ و بُتِ اَشیره ام دَ سامِره باقی مَند. ۷امزی خاطر از لَشکرِ یهواَخاز بغَیر از پِنجاه سوار، دَه گاڈی جنگی و دَه هزار عسکرِ پیده دِیگه چِیز نَمَندُد، چراکه پادشاهِ ارام باقی ازوا ره نابُود کده رقمِ گَرد-و-خاکِ جُغُول جور کدُد. ۸باقی کارای یهواَخاز، چِیزای که کد و قُدرت شی دَ کِتابِ تَوارِیخِ پادشایونِ اِسرائیل نوِشته یَه. ۹وختی یهواَخاز فَوت کده قد بابه‌کَلونای خُو خاو کد و دَ سامِره دَفن شُد، باچِه شی یهوآش دَ جای ازُو پادشاه شُد.
۱۰دَ سالِ سی و هفتُمِ پادشاهی یوآش پادشاهِ یهُودا، یهوآش باچِه یهواَخاز دَ سامِره پادشاهِ اِسرائیل شُد و شوزده سال حُکمرانی کد. ۱۱اُو چِیزای ره که دَ نظرِ خُداوند بَد بُود، انجام دَد و از گُناه های یرُبعام باچِه نِباط که باعِث شُد اِسرائیل گُناه کنه، دُوری نَکد، بَلکِه دَ امزُو گُناه‌ها اِدامه دَد. ۱۲باقی کارای یهوآش، چِیزای که کد و قُدرت نُمایی شی دَ جنگی که قد اَمَصیا پادشاهِ یهُودا کد، دَ کِتابِ تَوارِیخِ پادشایونِ اِسرائیل نوِشته یَه. ۱۳یهوآش فَوت کده قد بابه‌کَلونای خُو خاو کد و دَ مینکلِ پادشایونِ اِسرائیل دَ سامِره دَفن شُد. بعد ازُو یرُبعام دَ تَختِ پادشاهی شِشت.
۱۴زمانِیکه یهوآش هنوز زِنده بُود اِلِیشع دَ اَثرِ یگ ناجوری مرِیض شُد و دَ حالِ مُردو بُود. یهوآش پادشاهِ اِسرائیل دَ پُرسِیدون شی رفت و دَ حال شی چخرا کده گُفت: ”اَی آتِه مه! اَی آتِه مه! گاڈی های جنگی و سوارای اِسرائیل!“ ۱۵اِلِیشع دَزُو گُفت: ”یگ کَمو و چند تِیر بِگِیر.“ و یهوآش یگ کَمو و چند تِیر گِرِفت. ۱۶اِلِیشع دَ پادشاهِ اِسرائیل گُفت: ”دِستای خُو ره دَ کَمو بُبر.“ اُو دِستای خُو ره دَ کَمو بُرد و اِلِیشع دِستای خُو ره دَ بَلِه دِستای پادشاه ایشته ۱۷گُفت: ”کِلکِینِ طرفِ شَرق ره واز کُو.“ یهوآش اُو ره واز کد و اِلِیشع گُفت: ”تِیر ایله کُو.“ یهوآش تِیر ایله کد. اوخته اِلِیشع گُفت: ”تِیرِ پیروزی خُداوند، تِیرِ پیروزی دَ بَلِه ارام! تُو ارامیا ره دَ اَفیق کامِلاً شِکَست مِیدی.“ ۱۸ اِلِیشع اِدامه دَده گُفت: ”تِیرا ره بِگِیر.“ و اُو گِرِفت. اوخته اِلِیشع دَ پادشاهِ اِسرائیل گُفت: ”دَ زمی بِزَن.“ یهوآش سِه دفعه دَ زمی زَد و بَس. ۱۹مَردِ خُدا دَ بَلِه ازُو قار شُد و گُفت: ”باید پَنج یا شَش دفعه مِیزَدی. اوخته مِیتنِستی ارامیا ره زَده شِکست بِدی و بکُلّی نابُود کنی، لیکِن آلی فقط سِه دفعه ارامیا ره شِکست مِیدی و بَس.“
۲۰پس اِلِیشع فَوت کد و اُونا اُو ره دَفن کد. دَ امزُو زمان دَ بهارِ هر سال لشکرهای موآب دَ سرزمِینِ اِسرائیل هُجُوم میوُرد. ۲۱یگ روز اِسرائیلیا جِنازِه یگ نفر ره دَفن مُوکد که بےبلغه عسکرای موآبیا ره دِید؛ اُونا مُرده ره دَ قبرِ اِلِیشع اَندخته دُوتا کد و مُرده امی که دَ استُغونای اِلِیشع ڈَکه خورد، زِنده شُده قد پای خُو ایسته شُد.
۲۲حزائیل پادشاهِ ارام دَ تمامِ روزای پادشاهی یهواَخاز دَ بَلِه اِسرائیل ظُلم کد. ۲۳لیکِن خُداوند اُونا ره مَورِدِ لُطف قرار دَد و دَ حالِ ازوا رَحم کده پس طرفِ ازوا تاو خورد و بخاطرِ عهد خُو که قد اِبراهِیم، اِسحاق و یعقُوب بسته کدُد نَخاست اُونا ره نابُود کنه و ام اُونا ره تا اِمروز از حُضُور خُو هَی نَکد.
۲۴وختی حزائیل پادشاهِ ارام فَوت کد، باچِه شی بِن‌هَدَد دَ جای ازُو پادشاه شُد. ۲۵اوخته یهوآش باچِه یهواَخاز شارای ره که حزائیل از دِستِ آتِه شی یهواَخاز دَ جنگ گِرِفتُد، از دِستِ بِن‌هَدَد باچِه حزائیل پس گِرِفت. دَ امزی رقم یهوآش سِه دفعه اُو ره شِکست دَد و شارای اِسرائیل ره پس گِرِفت.