۱دَ دَورونِ حُکمرانی یهویاقِیم، نِبُوکَدنِصر پادشاهِ بابُل حَمله کد و یهویاقِیم سِه سال خِدمتگارِ ازُو شُد؛ لیکِن بعد از سِه سال سرپیچی کده دَ خِلافِ ازُو شورِش کد. ۲خُداوند گروه های مُسَلَحِ کَلدانیا، ارامیا، موآبیا و عمونیا ره دَ خِلافِ یهویاقِیم رَیی کد؛ اَرے، خُداوند مُطابِقِ کلامی که دَ وسِیلِه خِدمتگارای خُو اَنبیا گُفتُد، اُونا ره دَ خِلافِ یهُودا رَیی کد تا اُو ره بیرو کنه. ۳یقِیناً اِی بَلا دَ حُکمِ خُداوند دَ بَلِه یهُودا نازِل شُد تا اُونا ره بخاطرِ گُناه های مَنَسّی و پگِ چِیزای که کد، از حُضُور خُو دُور کنه. ۴امچُنان ازی که مَنَسّی خُونِ بیگُناه ها ره ریختَندُد و اورُشَلیم ره از خُونِ بیگُناه ها پُر کدُد، خُداوند نَخاست که بُبَخشه. ۵باقی کارای یهویاقِیم و پگِ چِیزای که کد، دَ کِتابِ تَوارِیخِ پادشایونِ یهُودا نوِشته یَه. ۶وختی یهویاقِیم فَوت کده قد بابه‌کَلونای خُو خاو کد، باچِه شی یهویاکِین دَ جای ازُو پادشاه شُد. ۷پادشاهِ مِصر دِیگه از مُلک خُو بُرو نَمَد، چراکه پادشاهِ بابُل تمامِ جای‌های ره که دَ پادشاهِ مِصر تعلُق دَشت، یعنی از دریاچِه مِصر تا دریای فَرات گِرِفتُد.
۸یهویاکِین هژده ساله بُود که پادشاه شُد و سِه ماه دَ اورُشَلیم حُکمرانی کد. آبِه شی نِحُوشتا نام دَشت و دُخترِ اِلناتان از اورُشَلیم بُود. ۹اُو چِیزای ره که دَ نظرِ خُداوند بَد بُود انجام دَد، امُو رقم که آتِه شی انجام دَدُد.
۱۰دَ امزُو زمان خِدمتگارای نِبُوکَدنِصر پادشاهِ بابُل دَ خِلافِ اورُشَلیم اَمَد و شار ره محاصِره کد. ۱۱دَ حالِیکه خِدمتگارای نِبُوکَدنِصر پادشاهِ بابُل شار ره دَ محاصِرِه خُو دَشت، نِبُوکَدنِصر دَ شار اَمَد. ۱۲اوخته یهویاکِین پادشاهِ یهُودا قد آبِه خو، خِدمتگارای خُو، قومَندانای خُو و نفرای دَربار خُو بُر شُده پیشِ پادشاهِ بابُل اَمَد و پادشاهِ بابُل دَ سالِ هشتُمِ پادشاهی خُو اُو ره اسِیر گِرِفت.
۱۳پادشاهِ بابُل تمامِ خزانه ھای خانِه خُداوند و خزانه ھای قصرِ پادشاه ره ازُونجی بُرو اَوُرد و پگِ ظرفای طِلّایی ره که سُلَیمان پادشاهِ اِسرائیل بَلدِه خانِه خُداوند جور کدُد، مَیده کده قد خُو بُرد، امُو رقم که خُداوند گُفتُد. ۱۴اُو پگِ باشِنده های اورُشَلیم: پگِ قومَندانا و پگِ مَردای جنگی ره که تمامِ ازوا دَه هزار نفر بُود قد پگِ صَنعتگرا و آینگرا اسِیر کده بُرد؛ بغَیر از مردُمِ مُسکِین-و-بیچارِه سرزمی دِیگه کس باقی نَمَند. ۱۵دَ امزی رقم اُو یهویاکِین ره دَ بابُل بُرد؛ آبِه پادشاه، خاتُونوی پادشاه، نفرای دَربار شی و بُزُرگای سرزمِینِ یهُودا ام اسِیر شُده از اورُشَلیم دَ بابُل بُرده شُد. ۱۶پادشاهِ بابُل تمامِ مَردای جنگی ره که ھفت هزار نفر بُود قد یگ هزار صَنعتگر و آینگر که پگ ازوا قَوی و جنگ دِیده بُود، اسِیر کده دَ بابُل اِنتِقال دَد. ۱۷پادشاهِ بابُل مَتَنیا کاکای یهویاکِین ره دَ جای ازُو پادشاه جور کد و نام شی ره تَبدِیل کده صِدِقیا ایشت.
۱۸صِدِقیا بِیست و یگ ساله بُود که پادشاه شُد و یازده سال دَ اورُشَلیم حُکمرانی کد. آبِه شی حَمُوتَل نام دَشت و دُخترِ اِرمیا از لِبنه بُود. ۱۹اُو چِیزای ره که دَ نظرِ خُداوند بَد بُود انجام دَد، امُو رقم که یهویاقِیم انجام دَدُد. ۲۰دَ حقِیقت، مردُمِ اورُشَلیم و یهُودا قارِ خُداوند ره دَ اندازِه باله اَوُرد که اُو اُونا ره از حُضُور خُو دُور کد.
پس صِدِقیا دَ ضِدِ پادشاهِ بابُل شورِش کد