Afghan Bibles
English · دری · پښتو

خطِ دوّمِ پولُس - بَلدِه تِیموتائوس

بَخشِ ۱

۱از طرفِ پولُس که دَ خاست و اِرادِه خُدا و دَ مُطابِقِ وعدِه زِندگی اَبَدی که دَ مسیح عیسیٰ پَیدا مُوشه، رسُولِ مسیح عیسیٰ اَستُم. ۲تقدِیم دَ باچِه عزِیز مه، تِیموتائوس: فَیض و رَحمت و آرامِش از جانِبِ آتِه مو خُدا و مَولای مو مسیح عیسیٰ نصِیب تُو شُنه.

۳شاو و روز خُدا ره شُکر و سِپاس مُوگُم و دَزُو مِثلِ بابَکلونای خُو قد وِجدانِ پاک خِدمت مُونُم و دَ دُعا ھای خُو ھر وخت تُو ره یاد مُونُم. ۴وختی آودِیدِه تُو ره دَ یاد خُو میرُم، ما آرزُو مُونُم که تُو ره بِسم بِنگرُم تا خوشی مه کامِل شُنه. ۵ما ایمانِ بےریای تُو ره دَ یاد خُو میرُم که اوّل دَ آجِه تُو لوئیس و بعد ازُو دَ آبِه تُو اَفنِیکی وجُود دَشت. و ما اِطمِینان دَرُم که امُو ایمان دَز تُو ام وجُود دَره. ۶امزی خاطر دَ یاد تُو میرُم که امُو نِعمتِ خُدا ره که دَ وختِ کشِیدونِ دِستای مه دَ بَلِه تُو دَز تُو دَده شُد، دُوباره شُعله‌وَر کُنی. ۷چُون روحی ره که خُدا دَز مو دَده، روحِ ترس نِییه، بَلکِه یگ روحِ قُدرت، مُحَبَت و خودداری اَسته. ۸پس، از شاھِدی دَدو دَ بارِه مَولای مو شَرم نَکُو و از رابِطه گِرِفتو قد ازمه که از خاطرِ شاھِدی دَدو دَ بارِهمَولا بَندی اَستُم، ام نَنگ نَکُو. بَر عکس، دَ وسِیلِه قُدرَتی که خُدا مِیدیه قد ازمه دَ رَنجی که از خاطِرِ اِنجِیل مِیکشُم، شرِیگ شُو. ۹خُدا مو ره نِجات دَده و سُون یگ زِندگی پاک-و-مُقَدَّس کُوی کده. ولے اِی از خاطِرِ اعمالِ از مو نَبُود، بَلکِه از خاطِرِ مقصدِ خود شی و از خاطِرِ فَیضی که تَوَسُطِ مسیح عیسیٰ پیش از شُروعِ دُنیا دَز مو دَده شُدُد. ۱۰و آلی امُو فَیض دَ وسِیلِه ظھُورِ نِجات دِھِندِه مو عیسیٰ مسیح بَرمَلا شُده. اُو مَرگ ره از مینه باله کد و راهِ زِندگی اَبَدی و نیست ناشُدَنی ره دَ وسِیلِه پَیغامِ اِنجِیل معلُومدار کد. ۱۱و خُدا مَره اِنتِخاب کد تاکه بَلدِه پَخش کدونِ امزی خوشخبری اِعلان کُنِنده، رسُول و مُعلِم بَشُم. ۱۲امزی خاطر پگِ امزی رَنج ھا ره مِینگرُم، لیکِن شرمِنده نِییُم، چراکه ما مِیدَنُم که دَز کِی ایمان اَوُردیم و یَقِین دَرُم اُو قُدرت دَره که اَمانَت مَره تا روزِ آخِرَت نِگاه کُنه. ۱۳از تعلِیمِ دُرُستِ که از مه شِنِیدی قد ایمان و مُحَبَتِ که دَ مسیح عیسیٰ اَسته، سرمَشق بِگِیر. ۱۴امُو نِعمتِ خُوب که دَز تُو بخشِیده شُد، اُو ره دَ کومَک و یاری روح اُلقُدس که دَز مو وجُود دَره، نِگاه کُو.

۱۵تُو ازی خبر دَری که تمامِ بِرارو دَ ولایتِ آسیا مَره ایله کد، دَ شمُولِ فِیجِلُس و ھِرموجِنِس. ۱۶مَولا عیسیٰ رَحمت خُو ره نصِیبِ خانَوادِه اونیسِیفورُس کُنه، ازی که اُو بارھا دِل مَره تازه کد و از بَندی شُدون مه شرمِنده نَشُد، ۱۷بَلکِه دَمزُو غَیتِیکه دَ شارِ رُوم رسِید، اُو دَ کوشِشِ کَلو مَره پالِیده پَیدا کد. ۱۸مَولا عیسیٰ دَزُو لُطف کُنه تاکه اُو دَ روزِ قیامَت دَ حُضُورِ خُداوند رَحمت پَیدا کنه، چُون تُو خُوبتَر خبر دَری که اُو دَ شارِ اِفِسُس چی خِدمَتای کَلو کد.