۱”وختِیکه هارُون و باچه‌های شی ره بَلدِه خِدمت کدو دَ حُضُورِ ازمه تقدِیس مُونی، اینی کارا ره بُکُو: یگ نَرگاو و دُو قُوچِ بےعَیب ره تَهیه کُو. ۲از بِهترِین آردِ گندُمی نانِ فطِیر، ٹِکی های فطِیر که قد روغو گٹ شُده بَشه و نانِ تُنُکِ فطِیر که دَ رُوی شی روغو ملِیده شُده بَشه، پُخته کُو. ۳نان‌ها ره دَ یگ ٹُکری بیل و قد جونَه‌گاو و امُو دُو قُوچ تقدِیم کُو. ۴اوخته هارُون و باچه های شی ره دَ دَمِ درگِه خَیمِه مُلاقات بیَر و اُونا ره قد آو غُسل بِدی. ۵بعد ازُو کالاها ره گِرِفته پیرو، چَپَنِ ایفود و خودِ ایفود ره قد سِینه بَند دَ هارُون بُپوشَن و بَند ره دَ بَلِه ایفود بسته کُو. ۶لُنگی ره دَ سر شی بیل و نِیم‌تاجِ مُقَدَّسِ طِلّایی ره دَ لُنگی نَصب کُو ۷و روغونِ مَسَح ره دَ سر شی شیو کده اُو ره مَسَح کُو. ۸بعد ازُو باچه های هارُون ره نزدِیک بیَر و پیرونا ره دَزوا بُپوشَن. ۹دَ کمرِ هارُون و باچه های شی کمربَند ها ره بسته کُو و کوله ها ره دَ سرِ ازوا بیل. مقامِ پیشوایی بَلدِه همیشه از خودونِ ازوا و اَولادِه شی بَشه. دَمزی رقم هارُون و باچه های شی ره پیشوا تعیِین کُو.“
۱۰”امُو نَرگاو ره دَ پیشِ خَیمِه مُلاقات بیَر تاکه هارُون و باچه های شی دَ سر ازُو دِست بِکشه ۱۱و نَرگاو ره دَ حُضُورِ خُداوند دَ دانِ درگِه خَیمِه مُلاقات حلال کُو. ۱۲یگ کَمَک وَری خُونِ نَرگاو ره بِگِیر و قد کِلک خُو دَ شاخای قُربانگاه بُمَل و باقی‌مَندِه شی ره دَ بیخِ قُربانگاه شیو کُو. ۱۳بعد ازُو تمامِ چربی ره که دَ بَلِه حِصّه های داخِلی اَسته قد جِگرگوشه، گُرده ها و چربی گِردِ ازوا بِگِیر و دَ بَلِه قُربانگاه بُسوزَن. ۱۴مگم گوشت و پوست و سرگِینِ نَرگاو ره بُرو از خَیمه‌گاه دَ آتِش دَر بِدی. اُو یگ قُربانی بَلدِه گُناه اَسته. ۱۵بعد ازُو یکی از قُوچ ها ره بِگِیر و هارُون و باچه های شی دَ سر ازُو دِست بِکشه ۱۶و اُو ره حلال کُنه و خُون شی ره دَ گِرداگِردِ قُربانگاه پاش بِدیه. ۱۷قُوچ ره دَ حِصّه های مُختلِف ٹوٹه ٹوٹه کُو و اعضای داخِلی و پَیچه‌های شی ره بُشوی و اُونا ره دَ بَلِه ٹوٹه ها و کَلِه شی بیل. ۱۸پس تمامِ قُوچ ره دَ بَلِه قُربانگاه بُسوزَن؛ اُو یگ قُربانی سوختَنی بَلدِه خُداوند اَسته، خوشبُوی مَورِدِ پِسَند و یگ هدیِه خاص بَلدِه خُداوند. ۱۹بعد ازُو قُوچِ دوّم ره بِگِیر و هارُون و باچه های شی دَ سرِ ازُو ام دِست بِکشه. ۲۰اوخته تُو امُو قُوچ ره ام حلال کُو و یگ مِقدار خُونِ ازُو ره گِرِفته دَ نَرمی گوشِ راستِ هارُون و دَ نَرمی گوشِ راستِ باچه های شی و دَ شَستِ دِستِ راست و دَ شَستِ پای راستِ ازوا بُمَل. و باقی‌مَندِه خُون ره دَ گِردوبَرِ قُربانگاه پاش بِدی. ۲۱بعد ازُو یگ مِقدار از خُونی که دَ بَلِه قُربانگاه اَسته و یگ کم وَری از روغونِ مَسَح بِگِیر و دَ بَلِه هارُون و کالای ازُو و دَ بَلِه باچه‌های شی که قد شی اَسته و دَ کالاهای ازوا پاش بِدی. دَمزی وسِیله هارُون و باچه‌های شی و کالاهای ازوا بَلدِه خِدمتِ پیشوایی تقدِیس مُوشه. ۲۲بعد ازُو چربی قُوچ، دُمبه، چربی بَلِه حِصّه های داخِلی، جِگرگوشه، هر دُو گُرده و چربی ازوا ره قد رانِ راستِ امزی قُوچِ مَراسِمِ تعیِین کدونِ پیشوا بِگِیر، ۲۳و قد ازوا قَتی یگ نانِ فطِیر، یگ ٹِکی روغَنی و یگ نانِ تُنُگ-و-کَکرَک ره از مَنِه ٹُکری نانِ فطِیر که دَ حُضُور خُداوند اَسته ام بِگِیر ۲۴و پگِ ازوا ره دَ بَلِه دِستای هارُون و دَ بَلِه دِستای باچه های شی بیل تاکه اُونا ره دَ عِنوانِ هدیِه بِلند کدَنی دَ حُضُورِ خُداوند بِلند کنه. ۲۵بعد ازُو امُو چِیزا ره از دِستای ازوا بِگِیر و دَ بَلِه قُربانگاه دَ سرِ قُربانی سوختَنی ایشته دَر بِدی؛ اُو یگ خوشبُوی مَورِدِ پِسَند دَ حُضُورِ خُداوند اَسته، یگ هدیِه خاص بَلدِه خُداوند. ۲۶بعد ازُو سِینِه قُوچِ مراسِمِ تعیِین کدونِ هارُون ره بِگِیر و اُو ره دَ عِنوانِ هدیِه بِلند کدَنی دَ حُضُورِ خُداوند بِلند کُو. امُو حِصّه حقِ ازتُو مُوشه. ۲۷سِینِه بِلند شُده و رانِ هدیه ره از قُوچِ مَراسِمِ تعیِین کدونِ پیشوا که از هارُون و باچه‌های شی اَسته، تقدِیس کُو. ۲۸اُونا حقِ دایمی هارُون و باچه‌های شی از طرفِ بَنی اِسرائیل اَسته، چُون اُونا یگ هدیِه بِلند کدَنی و بَخشِش از قُربانی های سلامَتی بَنی اِسرائیل اَسته، که بَلدِه خُداوند تقدِیم مُوشه. ۲۹کالاهای مُقَدَّس که بَلدِه هارُون تَهیه مُوشه، بعد ازُو بَلدِه اَولادِه شی بَشه تاکه اُونا دَ امزی کالا ها مَسَح شُده دَ عِنوانِ پیشوا تعیِین شُنه. ۳۰امُو باچِه که جانِشِینِ هارُون تعیِین مُوشه، وختِیکه بَلدِه خِدمت کدو دَ خَیمِه مُلاقات داخِل مُوشه، باید اُو کالاها ره بَلدِه هفت روز بُپوشه.
۳۱پس گوشتِ قُوچِ مراسِمِ تعیِین کدونِ پیشوا ره بِگِیر و اُو ره دَ یگ جای مُقَدَّس دَ آو جوش بِدی. ۳۲و هارُون و باچه های شی گوشتِ امزُو قُوچ ره قد نانی که دَ ٹُکری اَسته، دَ دانِ درگِه خَیمِه مُلاقات بُخوره. ۳۳ تنها هارُون و باچه های شی امُو هدیه های ره که بَلدِه کِفاره دَ مَراسِمِ تعیِین و تقدِیسِ شُدونِ ازوا تقدِیم شُدُد، بُخوره. ولے آدمای دِیگه نَباید ازوا بُخوره، چراکه امُو چِیزا مُقَدَّس اَسته. ۳۴و اگه یَگو چِیز امزُو گوشتِ مراسِمِ تعیِین و تقدِیس و از نان تا صُبح باقی مُومَنه، اُو ره دَ آتِش دَر بِدی. باقی‌مَندِه شی نَباید خورده شُنه، چراکه مُقَدَّس اَسته. ۳۵هر چِیزی ره که ما دَز تُو اَمر کدُم، دَ حقِ هارُون و باچه‌های شی انجام بِدی. اُونا ره دَ دَورونِ هفت روز دَ مقامِ پیشوایی تعیِین کُو. ۳۶روزانه یگ جونَه‌گاو ره بَلدِه کِفارِه گُناه تقدِیم کُو. تَوَسُطِ امی کِفاره، قُربانگاه ره پاک کُو و اُو ره مَسَح کُو تاکه مُقَدَّس شُنه. ۳۷دَ مُدَتِ هفت روز، هر روز بَلدِه قُربانگاه کِفاره کُو تاکه قُربانگاه تقدِیس شُنه. دَزی تَرتِیب قُربانگاه کامِلاً مُقَدَّس مُوشه و هر چِیزی که دَزُو ڈَکه بُخوره، پاک-و-مُقَدَّس مُوشه.
۳۸اینی چِیزای اَسته که تُو باید دایم دَ بَلِه قُربانگاه تقدِیم کنی: هر روز دُو نَربَرِه یگ ساله ره دَ بَلِه قُربانگاه قُربانی کُو. ۳۹بارِه اوّل ره صُبح تقدِیم کُو و بارِه دوّم ره دَ وختِ شام تقدِیم کُو. ۴۰قد بارِه اوّل دَهُم حِصِّه یگ ایفه بِهترِین آرد ره که قد چارُم حِصِّه یگ هِین بِهترِین روغونِ زَیتُونِ گٹ شُده بَشه تقدِیم کُو. چارُم حِصِّه یگ هِین شرابِ انگُور ره ام دَ عِنوانِ هدیِه وُچی کدنی تقدِیم کُو. ۴۱بارِه دوّم ره دَ وختِ شام قُربانی کُو؛ اُو ره رقمِ قُربانی صُبح قد هدیِه غَلّه-و-دانه و هدیِه وُچی کدَنی شی تقدِیم کُو. اِی یگ خوشبُوی مَورِدِ پِسَند و یگ هدیِه خاص بَلدِه خُداوند اَسته. ۴۲اینَمی یگ قُربانی سوختَنی بَلدِه دایم اَسته و نسل‌های آیندِه شُمو ام باید دَ دانِ درگِه خَیمِه مُلاقات اُو ره دَ حُضُورِ خُداوند تقدِیم کُنه، چُون دَ اُونجی اَسته که ما دَز شُمو ظاهِر مُوشُم و قد شُمو توره مُوگُم. ۴۳و دَ اُونجی ما قد بَنی اِسرائیل مُلاقات مُونُم و امُو جای تَوَسُطِ جلالِ ازمه مُقَدَّس مُوشه. ۴۴ما خَیمِه مُلاقات و قُربانگاه ره مُقَدَّس اِعلان مُونُم و هارُون و باچه‌های شی ره ام تقدِیس مُونُم تاکه اُونا بحَیثِ پیشوایو دَ حُضُورِ ازمه خِدمت کُنه. ۴۵ما دَ مینکلِ بَنی اِسرائیل جای-دَ-جای مُوشُم و خُدای ازوا باقی مُومنُم. ۴۶و اُونا مِیدَنه که ما خُداوند، خُدای ازوا اَستُم که اُونا ره از سرزمِینِ مِصر بُرو اَوُردُم تا دَ مینکلِ ازوا جای-دَ-جای شُنُم. ما خُداوند، خُدای ازوا اَستُم.“