خرُوج - کِتابِ تَورات - بَخشِ دوّم
فصلِ سی و پنجُم
قانُونِ روزِ آرام تاکِید مُوشه
۱مُوسیٰ تمامِ جماعتِ بَنی اِسرائیل ره جَم کده، دَزوا گُفت: ”اینی توره‌های اَسته که خُداوند اَمر کده تا شُمو اُونا ره اِجرا کُنِید:
۲’شَش روز مِیتنِید کار کُنِید و روزِ هفتُم بَلدِه شُمو یگ روزِ مُقَدَّس بَشه، یگ روز، کامِلاً بَلدِه آرام و دَمرَسی کدو و تقدِیم دَ خُداوند. هر کسی که دَزُو روز کار کُنه، باید کُشته شُنه. ۳دَ روزِ آرام دَ تمامِ خانه‌های شُمو آتِش نَباید روشو شُنه.‘“
هدیه ها بَلدِه جایگاهِ مُقَدَّس
۴مُوسیٰ دَ تمامِ جماعتِ بَنی اِسرائیل گُفت: ”اینی تورِه اَسته که خُداوند دَز مه اَمر کده: ۵’از بَینِ قَوم خُو هدیه بَلدِه خُداوند بِگِیر. کسای که از تَی دِل و دَ رضایَت خُو هدیه بِدیه، مِیتنه که ازی چِیزا بیره: طِلّا، نُقره و برونز؛ ۶چُوغِ لاجوَردی، اَرغَوانی و سُرخ رنگ و کتانِ نَرم و مُوی بُز؛ ۷پوستِ سُرخ شُدِه قُوچ و پوستِ نَرم-و-قِیمَتی، چیوِ دِرختِ اَکاسی، ۸روغونِ زَیتُون بَلدِه چِراغا، مَوادِ خوشبُوی بَلدِه روغونِ مَسَح و بَلدِه بُخورِ خوشبُوی، ۹سنگای عقِیق و دِیگه سنگای قِیمَتی بَلدِه ایفود و سِینه بَندِ پیشوای بُزُرگ.‘
اَسبابِ لازِم بَلدِه جایگاهِ مُقَدَّس
۱۰تمامِ آدمای لایق و دانادِل از بَین شُمو بییه و هر چِیزی ره که خُداوند اَمر کده جور کُنه: ۱۱جایگاهِ مُقَدَّس ره دَ شُمُولِ خَیمِه شی و پوش شی، چنگَک ها و چیو‌های چارتراش شی، پُشت‌بَند‌ها، ستُون ها و پایه‌های شی؛ ۱۲صندُوقِ شهادَت و دِستَک‌چیو‌های شی، جای کِفاره یعنی سرپوشِ صندُوق و پردِه که مُقَدَّسترِین جای ره پُوٹ مُونه؛ ۱۳میز و دِستَک‌چیو ها و پگِ ظرفای شی و نانِ حُضُورِ خُداوند؛ ۱۴چِراغدان بَلدِه روشنَی دَ شُمُولِ چِراغا و روغو و دِیگه اَسباب شی؛ ۱۵قُربانگاهِ بُخورِ خوشبُوی و دِستَک‌چیو‌های ازُو، روغونِ مَسَح و بُخورِ خوشبُوی؛ پردِه درگِه جایگاه؛ ۱۶قُربانگاهِ قُربانی سوختَنی و اُجاقِ برونزی ازُو، دِستَک‌چیوها و تمامِ اَسباب شی؛ حَوض و پایه شی، ۱۷پرده‌های چاردیوالی حَولی، ستُون ها و پایه‌های ازوا و پردِه درگِه حَولی؛ ۱۸میخ‌های جایگاه و میخ‌های چاردیوالی و ریسپونای ازوا؛ ۱۹کالاهای بافته شُدِه که بَلدِه خِدمت کدو دَ جایگاهِ مُقَدَّس پوشِیده مُوشه، یعنی کالاهای مُقَدَّسِ هارُون پیشوا و کالاهای باچه‌های شی که اُونا بَلدِه خِدمتِ پیشوایی مُوپوشه.“
هدیه‌های مردُم و کارای اُستاد ها
۲۰بعد ازُو تمامِ جماعتِ بَنی اِسرائیل از حُضُورِ مُوسیٰ رفت. ۲۱هر کس که دَ دِل شی شور-و-شَوق پَیدا شُد و روح و رَوان شی اُو ره حَرکت دَد، اُو اَمَده بَلدِه خُداوند هدیه اَوُرد و امُو هدیه ها بَلدِه جور کدونِ خَیمِه مُلاقات و اَسباب شی و امچُنان بَلدِه کالاهای مُقَدَّس اِستِعمال شُد. ۲۲پس خاتُونو و مردَکو اَمَده از تَی دِل خُو دَ رِضایَت خُو حلقه‌های بِینی، گوشواره ها، انگُشتری‌ها، گردو بَندها و دِیگه چِیزای طِلّایی خُو ره اَوُرد و دَ عنوانِ هدیه دَ خُداوند تقدِیم کد. ۲۳و هر کسی که صاحِبِ رَختِ لاجوَردی، اَرغَوانی و سُرخ رَنگ و کتان و مُوی بُز و پوستِ سُرخ شُدِه قُوچ و پوستِ نَرم-و-قِیمَتی بُود، اُونا ره اَوُرد. ۲۴و ام تمامِ کسای که هدیِه نُقره و برونز اَوُرد، اُو ره دَ خُداوند تقدِیم کد. و دَ پیشِ هر کس که چیوِ اَکاسی پَیدا شُد، اُو ره بَلدِه خِدمت دَ خَیمه اَوُرد. ۲۵پگِ خاتُونوی لایق و دانادِل قد دِستای خُو پاشُم مِیریشت و چُوغِ ریشته شُدِه لاجوَردی، اَرغَوانی و سُرخ رَنگ و کتانِ نَرم میوُرد. ۲۶امچُنان پگِ خاتُونوی که شَوق و لیاقت دَشت، مُوی بُز مِیریشت. ۲۷رهبرای قَوم سنگای عقِیق و دِیگه سنگای قِیمَتی ره بَلدِه ایفود و سِینه بَند اَوُرد. ۲۸اُونا مَوادِ خوشبُوی و روغونِ زَیتُون بَلدِه روشنی و بَلدِه روغونِ مَسَح و بُخورِ خوشبُوی ام اَوُرد. ۲۹خُلاصه، پگِ مردَکو و خاتُونوی قَومِ اِسرائیل که دِل ازوا اُونا ره تشوِیق کد، بَلدِه تمامِ کارای که خُداوند دَ مُوسیٰ اَمر کدُد، اُونا دَ رضایَت و خوشی دِل خُو بَلدِه خُداوند هدیه ها اَوُرد.
اُستاد ها بَلدِه کارِ جایگاهِ مُقَدَّس
۳۰پس مُوسیٰ دَ بَنی اِسرائیل گُفت: ”اینه، خُداوند بِصَلئیل باچِه اُوری نوسِه حُور ره که از طایفِه یهُودا اَسته، اِنتِخاب کده دَ نام کُوی کد ۳۱و اُو ره از روحِ اِلٰهی پُر کده دَزُو حِکمت و عقل و دانایی و مهارت بَلدِه هر کارِ هُنری دَد، ۳۲تاکه دَ طِلّاسازی، نُقره سازی و دَ کارای برونز قابِل و ماهِر بَشه. ۳۳اُو امچُنان دَ کارِ سنگ تراشی، جَواهِر سازی، نَجاری و حَجاری و دَ رقم رقم کارای هُنری اُستا یَه. ۳۴خُداوند دَزُو و دَ اَهولیاب باچِه اَحِیسامَک از طایفِه دان، اِستِعدادِ تعلِیم دَدونِ هُنر ره دَ دِیگرو ام بخشِید. ۳۵خُداوند دِلِ ازوا ره پُر از حِکمت کده تا اُونا دَ هر رقم کارا مهارت دَشته بَشه، یعنی دَ نَقاشی، دِست دوزی و گُلدوزی قد چُوغ‌های لاجوَردی، اَرغَوانی و سُرخ رَنگ و دَ بافتونِ کتانِ نَرم و مَیده بافت؛ و ام تا تَوانایی جور کدونِ هر چِیز ره دَشته بَشه.