۱امی مَلکی‌صدِق، پادشاهِ سالیم و یگ پیشوا از جانِبِ خُدای مُتعال بُود. وختی اِبراهِیم از شِکست دَدونِ پادشایو دَ حالِ پس اَمَدو بُود، مَلکی‌صدِق قد ازُو رُوی دَ رُوی شُده اُو ره بَرکت دَد ۲و اِبراهِیم دَه-یگِ تمامِ چِیزا ره دَزُو دَد. نامِ ازُو اوّل «پادشاهِ عدالت» معنیٰ مِیدیه، بعد ازُو «پادشاهِ سالیم» یعنی «پادشاهِ صُلح-و-سلامَتی». ۳آته و آبه و پُشت نامِه شی معلُوم نِییه، روزای زِندگی شی ام نَه شُروع دَره و نَه آخِر، بَلکِه اُو رقمِ باچِه خُدا شُده تا اَبَد پیشوا باقی مُومنه.
۴پس فِکر کُنِید که اِی آدم چِیقَس بُزُرگ بُود که حتیٰ اِبراهِیم بابه‌کَلون مو دَه-یگِ وُلجه های خُو ره دَزُو دَد. ۵آلی از اَولادِه لاوی کسای که دَ مقامِ پیشوایی تعیین مُوشه، دَ مُطابِقِ شریعت اَمر دَره که از قَوم یعنی از بِرارونِ اِسرائیلی خُو دَه-یگ بِگِیره، باوجُودِ که اُونا ام از پُشتِ کمرِ اِبراهِیم اَسته. ۶لیکِن اِی آدم که از نسل-و-نَسبِ لاوی نَبُود، از اِبراهِیم دَه-یگ گِرِفت و کسی ره که صاحِبِ وعده ها بُود، بَرکت دَد. ۷و بِدُونِ شک، ریزه دَ وسِیلِه کٹه بَرکت دَده مُوشه. ۸دَ اِینجی آدمای دَه-یگ مِیگِیره که مُومُره، مگم دَ اُونجی کسی دَه-یگ گِرِفت که دَ بارِه زِنده بُودون شی شاهِدی دَده شُده. ۹حتیٰ گُفته مِیتنی که خودِ لاوی که دَه-یگ مِیگِیره ام دَ وسِیلِه اِبراهِیم دَه-یگ دَد، ۱۰چُون وختی مَلکی‌صدِق قد اِبراهِیم رُوی دَ رُوی شُد، لاوی هنوز دَ پُشتِ کمرِ بابه‌کَلون خُو بُود.
۱۱اگه کامِل شُدو دَ وسِیلِه پیشوایی لاوی قابِلِ دِسترَس مُوبُود - چراکه قَومِ اِسرائیل شریعت ره دَ اساسِ امزی پیشوایی دَ دِست اَوُرد - چی ضرُورَت بُود که پیشوای دِیگه دَ مقامِ مَلکی‌صدِق ظهُور کُنه دَ جای ازی که دَ مقامِ هارُون تعیین شُنه؟ ۱۲چُون هر وختِیکه دَ قانُونِ پیشوایی تغیِیر مییه، لازِم اَسته که دَ شریعت ام تغیِیر بییه. ۱۳کسی که امی چِیزا دَ بارِه شی گُفته شُده، دَ یگ طایفِه دِیگه تعلُق دَره که ازُو طایفه هیچ کس هرگِز دَ پیشِ قُربانگاه خِدمت نَکده. ۱۴اِی واضِح اَسته که مَولای مو از طایفِه یهُودا ظهُور کد که مُوسیٰ دَ بارِه پیشوا شُدونِ یَگو کس امزُو طایفه هیچ چِیز نَگُفت. ۱۵و اِی دِیگه ام روشوتَر مُوشه، وختِیکه یگ پیشوای دِیگه مِثلِ مَلکی‌صدِق ظهُور مُونه، ۱۶امُو که دَ اساسِ شریعت و مُقرَراتِ جِسمانی پیشوا نَشُد، بَلکِه دَ وسِیلِه قُدرتِ زِندگی از-بَین-نَرفتَنی. ۱۷چُون دَ بارِه ازُو شاهِدی دَده شُده که:
”تُو تا اَبَد پیشوا اَستی،
دَ مقامِ مَلکی‌صدِق.“
۱۸از یگ طرف حُکمِ سابِق باطِل شُد، چراکه ضعِیف و بےفایده بُود، ۱۹چُون شریعت هیچ چِیز ره کامِل نَکد، و از طرفِ دِیگه یگ اُمِیدِ خُوبتَر دَده شُد که دَ واسِطِه ازُو مو دَ خُدا نزدِیک مُوشی.
۲۰و اِی پیشوایی بِدُونِ قَسم نَبُود، چُون دِیگرو بِدُونِ قَسم پیشوا شُد، ۲۱لیکِن اِی شخص قد قَسم پیشوا شُد، چراکه خُدا دَزُو گُفت:
”خُداوند قَسم خورده
و فِکر خُو ره تغیِیر نَمِیدیه؛
’تُو تا اَبَد پیشوا اَستی.‘“
۲۲دَ امزی دلِیل عیسیٰ ضامِنِ یگ عهدِ بِهتَر شُده. ۲۳علاوه ازی تِعدادِ پیشوایونِ سابِق کَلو بُود، چراکه مَرگ مانِع اِدامِه خِدمتِ ازوا مُوشُد، ۲۴لیکِن ازی که عیسیٰ تا اَبَد باقی مُومنه، پیشوایی شی بےپایان اَسته. ۲۵امزی خاطر اُو مِیتنه کسای ره که دَ وسِیلِه ازُو پیشِ خُدا مییه بَلدِه همیشه نِجات بِدیه، چراکه اُو همیشه زِنده یَه تا بَلدِه ازوا شفاعَت کُنه.
۲۶چُون مُناسِب بُود که مو امی رقم پیشوا مِیدَشتی: مُقَدَّس، خالی از حِیله-و-مَکر، پاک، جدا از گُناهکارا و مقام شی باله‌تَر از آسمونا. ۲۷برخِلافِ دِیگه پیشوایونِ بُزُرگ اُو ضرُورَت نَدره که هر روز، اوّل بَلدِه گُناه های خود خُو و بعد ازُو بَلدِه گُناه های قَوم قُربانی تقدِیم کُنه، چراکه اُو امی رسم ره یگ دفعه و بَلدِه همیشه دَ جای اَوُرد وختِیکه خود ره دَ عِنوانِ قُربانی تقدِیم کد. ۲۸شریعت، اِنسان های ضعِیف ره دَ عِنوانِ پیشوایونِ بُزُرگ مُقَرر مُونه، مگم کلامِ قَسم که بعد از شریعت اَمَد، باچه ره مُقَرر کد که بَلدِه همیشه کامِل شُده.