۱خُداوند قد مُوسیٰ و هارُون گپ زَده گُفت: ۲”وختی دَ پوستِ جِسمِ یگ نفر اَماس، دانه یا لَکِه روشو پَیدا شُنه و اُو دَ پوستِ جِسم شی رقمِ مَرَضِ کولی بَشه، اُو باید دَ پیشِ هارُون پیشوا یا دَ پیشِ یکی از باچه های شی که پیشوا اَسته اَوُرده شُنه. ۳پیشوا امُو مَرَض ره که دَ پوستِ جِسمِ ازُو نفر پَیدا شُده، توخ کنه. اگه مُوی دَ امزُو جای مَرَض سفید شُده بَشه و ام معلُوم شُنه که مَرَض غَوُجتَر از پوستِ جِسم شی اَسته، اوخته اُو مَرَضِ کولی اَسته. پس وختِیکه پیشوا اُو ره معاینه کد باید اُو ره ناپاک اِعلان کُنه. ۴ولے اگه امُو لَکِه روشو دَ پوستِ جِسم شی سفید بَشه و ام معلُوم شُنه که از پوست غَوُجتَر نِییه و مُوی شی ام سفید نَشُده، اوخته پیشوا امُو نفر ره بَلدِه هفت روز نِگاه کنه. ۵پیشوا دَ روزِ هفتُم اُو ره بسم معاینه کُنه و اگه دِید که امُو مَرَض جای-دَ-جای اَسته و دَ رُوی پوست تِیت نَشُده، اوخته پیشوا اُو ره بَلدِه هفت روزِ دِیگه نِگاه کُنه. ۶پیشوا دَ روزِ هفتُم اُو ره بسم توخ کُنه؛ اگه مَرَض کمرَنگ شُده بَشه و دَ رُوی پوست تِیت نَشُده بَشه، پیشوا اُو ره پاک اِعلان کُنه؛ اُو فقط دانه اَسته. اوخته اُو نفر باید کالای خُو ره بُشویه و پاک حِساب مُوشه. ۷ولے اگه دانه دَ رُوی پوست تِیت شُنه بعد ازُو که خود ره بَلدِه پاک اِعلان شُدو دَ پیشوا نِشو دَده، اوخته اُو باید بسم خود ره دَ پیشوا نِشو بِدیه. ۸و پیشوا اُو ره توخ کُنه. اگه دانه دَ رُوی پوست تِیت شُده بَشه، پیشوا باید اُو ره ناپاک اِعلان کنه؛ اُو مَرَضِ کولی اَسته.
۹وختِیکه یَگو کس دَ مَرَضِ کولی گِرِفتار مُوشه، اُو باید دَ دِیرِ پیشوا اَوُرده شُنه. ۱۰اوخته پیشوا اُو ره توخ کنه و اگه دَ پوست شی اماسِ سفید بَشه و مُوی امزُو جای ره سفید کده بَشه و گوشتِ خام دَ اَماس معلُوم شُنه، ۱۱اُو دَ پوستِ جِسم شی یگ مَرَضِ کولی پیشرَفته اَسته. پیشوا باید اُو ره ناپاک اِعلان کنه و اُو ره نِگاه نَکُنه، چراکه اُو ناپاک اَسته. ۱۲اگه مَرَضِ کولی دَ پوست کَلو تِیت شُده بَشه، دَ اندازِه که تمامِ پوستِ نفرِ مرِیض ره از سر تا پای پوشَنده بَشه، یعنی تا جای که پیشوا دِیده مِیتنه، ۱۳اوخته پیشوا اُو ره توخ کنه و اگه مَرَضِ کولی تمامِ جِسم شی ره پوشَنده بَشه، پیشوا اُو ره پاک اِعلان کنه، چراکه تمامِ جِسم شی سفید شُده، اُو پاک اَسته. ۱۴لیکِن اگه گوشتِ خام دَ پوست شی معلُوم شُنه، اُو ناپاک اَسته. ۱۵پس پیشوا گوشتِ خام ره توخ کُنه و اُو ره ناپاک اِعلان کُنه. گوشتِ خام ناپاک اَسته، چُون اُو مَرَضِ کولی یَه. ۱۶ولے اگه گوشتِ خام دُوباره سفید شُنه، اُو باید بسم دَ دِیرِ پیشوا بوره ۱۷و پیشوا اُو ره معاینه کُنه؛ اگه امُو مَرَض دَ سفیدی تَبدِیل شُدُد، اوخته پیشوا اُو ره پاک اِعلان کنه؛ اُو پاک اَسته.
۱۸اگه دَ پوستِ یَگو کس بیخ‌کٹه بُر شُده بَشه و خُوب شُده بَشه، ۱۹مگم دَ جای بیخ‌کٹه اماسِ سفید یا لَکِه روشونِ سفید مایل دَ سُرخی پَیدا شُنه، اُو باید دَ پیشوا نِشو دَده شُنه. ۲۰و پیشوا اُو ره توخ کُنه و اگه معلُوم شُد که لَکه غَوُجتَر از پوست اَسته و مُوی شی ام سفید شُده، اوخته پیشوا اُو ره ناپاک اِعلان کنه؛ اِی مَرَضِ کولی اَسته که از بیخ‌کٹه بُر شُده. ۲۱ولے اگه پیشوا اُو ره معاینه کُنه و مُوی بَلِه لَکه سفید نَبَشه و غَوُجتَر از پوست ام نَبَشه بَلکِه کم رَنگ بَشه، اوخته پیشوا اُو ره بَلدِه هفت روز نِگاه کنه. ۲۲اگه لَکه دَ پوست تِیت شُد، اوخته پیشوا اُو ره ناپاک اِعلان کنه. اُو مَرَضِ کولی اَسته. ۲۳لیکِن اگه لَکه دَ یگ جای مَنده بَشه و دَ پوست تِیت نَشُده بَشه، اُو داغِ بیخ‌کٹه اَسته. اوخته پیشوا اُو ره پاک اِعلان کنه.
۲۴وختِیکه دَ جِسمِ یَگو کس پوست مُوسوزه و گوشتِ جای سوختَگی لَکِه سفید یا سفیدِ مایل دَ سُرخی جور مُوشه، ۲۵پیشوا باید اُو ره توخ کنه. اگه مُوی بَلِه لَکه سفید شُده بَشه و لَکه غَوُجتَر از پوست معلُوم شُنه، اوخته اُو مَرَضِ کولی اَسته که از جای سوختَگی بُر شُده؛ پس پیشوا باید اُو ره ناپاک اِعلان کنه، چُون اُو مَرَضِ کولی اَسته. ۲۶ولے اگه پیشوا اُو ره معاینه کُنه و بِنگره که دَ لَکه مُوی سفید وجُود نَدره و غَوُجتَر از پوست نِییه و کم رَنگ اَسته، اوخته پیشوا اُو ره بَلدِه هفت روز نِگاه کنه. ۲۷و دَ روزِ هفتُم پیشوا بسم اُو ره توخ کنه؛ اگه لَکه دَ پوست تِیت شُده بَشه، پیشوا اُو ره ناپاک اِعلان کنه. اُو مَرَضِ کولی اَسته. ۲۸ولے اگه لَکه دَ یگ جای باقی مَنده بَشه و دَ پوست تِیت نَشُده بَشه و کم رنگ بَشه، اوخته پیشوا اُو ره پاک اِعلان کنه، چُون اُو داغِ سوختَگی اَسته.
۲۹اگه یَگو مرد یا خاتُو دَ بَلِه سر یا زِناق خُو مَرَضِ جلدی دَشته بَشه، ۳۰پیشوا امُو مَرَض ره توخ کُنه و اگه اُو غَوُجتَر از پوست معلُوم شُنه و مُوی زَردِ برِیگ دَزشی بَشه، پیشوا اُو ره ناپاک اِعلان کُنه، چراکه اُو کَلی اَسته، یعنی مَرَضِ کولی سر یا زِناق. ۳۱ولے اگه پیشوا امُو مَرَضِ کَلی ره توخ کُنه و معلُوم شُنه که غَوُجتَر از پوست نِییه و مُوی سیاه دَزشی وجُود نَدره، اوخته پیشوا امُو نفر ره که مَرَضِ کَلی گِرِفته بَلدِه هفت روز نِگاه کُنه. ۳۲و دَ روزِ هفتُم پیشوا بسم امُو مَرَضِ کَلی ره توخ کنه؛ اگه کَلی تِیت نَشُده بَشه و مُوی زَرد دَزشی وجُود نَدَشته بَشه و غَوُجتَر از پوست معلُوم نَشُنه، ۳۳اوخته امُو نفر باید مُوی خُو ره کَل کنه، ولے جای کَلی-گِرِفته ره کَل نَکُنه و پیشوا اُو ره بَلدِه هفت روزِ دِیگه نِگاه کنه. ۳۴دَ روزِ هفتُم پیشوا بسم جای کَلی گِرِفته ره توخ کنه. اگه کَلی دَ پوست تِیت نَشُده بَشه و غَوُجتَر از پوست معلُوم نَشُنه، اوخته پیشوا باید اُو ره پاک اِعلان کنه. اُو نفر باید کالای خُو ره بُشویه و اُو پاک مُوشه. ۳۵لیکِن اگه بعد از پاک اِعلان شُدون شی، کَلی دَ پوست تِیت شُنه، ۳۶پیشوا باید اُو ره معاینه کنه. اگه کَلی دَ پوست تِیت شُده بَشه، بَلدِه پیشوا لازِم نِییه که مُوی زَرد ره بُپاله، اُو نفر ناپاک اَسته. ۳۷ولے اگه دَ نظر شی کَلی دَ یگ جای مَنده بَشه و مُوی سیاه ام از شی بُر شُده، اوخته کَلی جور شُده و اُو نفر پاک اَسته. پس پیشوا باید اُو ره پاک اِعلان کنه.
۳۸اگه یگ مرد یا خاتُو دَ پوستِ جِسم خُو لَکه لَکِه سفید دَشته بَشه، ۳۹پیشوا باید اُو ره معاینه کنه. اگه لَکه ها دَ پوستِ جِسم شی سفیدِ کم رَنگ بَشه، اُو لَکِه بےضَرَر اَسته که دَ پوست بُر شُده؛ اُو نفر پاک اَسته.
۴۰اگه یگ مرد مُوی سر شی رفته بَشه، اُو کَل شُده، ولے پاک اَسته. ۴۱اگه مُوی ازُو از پیشانِه شی رفته بَشه، پیشانِه ازُو کَل شُده، ولے اُو پاک اَسته. ۴۲لیکِن اگه دَ سرِ کَلِ ازُو یا دَ پیشانِه کَل شی لَکِه سفیدِ مایل دَ سُرخی بَشه، اوخته اُو مَرَضِ کولی اَسته که از سرِ کَل شی یا از پیشانِه کَل شی بُر شُده. ۴۳پیشوا باید اُو ره توخ کنه. اگه اماسِ امزُو لَکه دَ سرِ کَلِ ازُو یا دَ پیشانِه کَل شی سفیدِ مایل دَ سُرخی بَشه، رقمِ مَرَضِ کولی دَ پوستِ جِسم، ۴۴اوخته اُو نفر کولی گِرِفته یَه و ناپاک اَسته. پیشوا باید اُو ره ناپاک اِعلان کُنه، چُون مَرَضِ کولی دَ سرِ ازُو اَسته.
۴۵کسی ره که مَرَضِ کولی گِرِفته بَشه، اُو باید جاغِه خُو ره چَک کُنه، مُوی سر خُو ره جنگل ایله بِدیه و تَینه حِصِّه رُوی خُو ره پُوٹ کنه و چِیغ زَده بُگیه: ’ناپاک اَستُم! ناپاک!‘ ۴۶اُو تا زمانی ناپاک مُومنه که دَ مَرَضِ کولی گِرِفتار اَسته؛ اُو ناپاک اَسته. اُو باید تنها زِندگی کُنه و جای بُود-و-باشِ ازُو بُرو از خَیمه‌گاه بَشه.
۴۷اگه پوپَنَک زَدگی دَ یگ کالا معلُوم شُنه، چی دَ یگ کالای پَشمی یا کالای کتانی، ۴۸یا دَ یگ چُوغ یا تارِ کتانی یا پاشُم، یا دَ چَرم یا دَ هر چِیزی که از چَرم جور شُده بَشه، ۴۹و امُو پوپَنَک زَدگی سَوزدیل یا سُرخدیل بَشه، چی دَ کالا یا دَ چُوغ یا دَ تار یا دَ چَرم یا دَ هر چِیزی که از چَرم جور شُده بَشه، اُو یگ پوپَنَک زَدگی اَسته و باید دَ پیشوا نِشو دَده شُنه. ۵۰اوخته پیشوا امُو پوپَنَک زَدگی ره توخ کنه و امُو چِیزی پوپَنَک زَدگی ره بَلدِه هفت روز نِگاه کنه. ۵۱دَ روزِ هفتُم بسم امُو پوپَنَک زَدگی ره توخ کنه. اگه پوپَنَک دَ کالا، یا دَ چُوغ یا دَ تار یا دَ چَرم، بَلدِه هر کارِ که امُو چَرم اِستِفاده مُوشه، تِیت شُده بَشه، اُو پوپَنَک زَدگی مُضِر اَسته؛ اُو چِیز ناپاک اَسته. ۵۲ پس پیشوا باید امُو کالا ره بُسوزَنه چی پوپَنَک زَدگی دَ چُوغ بَشه یا دَ تار یا دَ پاشُم یا دَ کتان یا دَ هر چِیزِ چَرمی، چراکه امُو پوپَنَک زَدگی مُضِر اَسته؛ اُو حتماً باید دَ آتِش سوختَنده شُنه. ۵۳لیکِن اگه پیشوا بِنگره که امُو پوپَنَک زَدگی دَ کالا یا دَ چُوغ یا دَ تار یا دَ هر چِیزی چَرمی که بَشه تِیت نَشُده، ۵۴اوخته پیشوا اَمر کنه که امُو چِیزِ پوپَنَک زَده ره بُشویه و اُو ره بَلدِه هفت روزِ دِیگه نِگاه کُنه. ۵۵پیشوا امُو چِیزِ پوپَنَک زَده ره که شُشته شُد بسم توخ کُنه. اگه رنگِ پوپَنَک زَدگی تغیِیر نَکده بَشه، حتیٰ اگه پوپَنَک زَدگی تِیت ام نَشُده بَشه، اُو ناپاک اَسته. اُو ره دَ آتِش بُسوزَن، چی پوپَنَک زَدگی دَ رُوی شی بَشه، چی دَ پُشت شی. ۵۶ولے اگه پیشوا بِنگره که پوپَنَک زَدگی بعد از شُشتو کم رنگ شُده، اوخته امُو پوپَنَک زَدگی ره از کالا یا از چَرم یا از چُوغ یا از تار پاره کده جدا کُنه. ۵۷اگه پوپَنَک زَدگی بسم دَ کالا یا چُوغ یا تار یا هر چِیزِ چَرمی که بَشه معلُوم شُنه، اوخته اُو پوپَنَک زَدگی اَسته که دُوباره بُر شُده. پس امُو چِیزی پوپَنَک زَده ره دَ آتِش بُسوزَنه. ۵۸ولے اگه امُو کالا یا چُوغ یا تار یا هر چِیزی چَرمی که بَشه بعد از شُشتو پوپَنَک زَدگی شی گُم شُنه، اوخته اُو باید بسم شُشته شُنه و اُو پاک اَسته.
۵۹اِی مُقرَرات دَ بارِه پوپَنَک زَدگی اَسته، چی دَ کالای پَشمی یا کتانی بَشه، چی دَ چُوغ یا دَ تار یا دَ هر چِیزِ چَرمی، تا پاکی یا ناپاکی ازوا اِعلان شُنه.“