۱روزِ یگشمبِه دَ وختِ روز واز شُدو اُونا مَوادهای خوشبُوی ره که آماده کدُد قد خُو گِرِفته دَ سرِ قبر رفت ۲و دِید که سنگ از دانِ قبر لول دَده شُده. ۳مگم وختِیکه اُونا داخِلِ قبر رفت، جَسَدِ مَولا عیسیٰ ره دَ اُونجی پَیدا نَتنِست. ۴دَ حالِیکه اُونا حَیرو مَندُد، بےبلغه دُو نفر که کالای سفیدِ جَلو دَشت دَ پالُوی ازوا ایسته شُد. ۵خاتُونو ترس خورده قد رُوی خُو دَ زمی خَم شُد، مگم اُونا دَ خاتُونو گُفت: ”چرا زِنده ره دَ مینکلِ مُرده ها مُوپالِید؟ ۶اُو دَ اِینجی نِیَسته، اُو دُوباره زِنده شُده. دَ یاد خُو بَیرِید وختِیکه اُو دَ جلِیلیه بُود چِطور قد شُمو گپ زَده ۷گُفت که «باچِه اِنسان» باید دَ دِستِ گُناهکارا تسلِیم دَده شُنه و دَ صلِیب میخکوب شُنه و دَ روزِ سِوّم دُوباره زِنده شُنه.“
۸اوخته خاتُونو تورِه عیسیٰ ره دَ یاد خُو اَوُرد ۹و از سرِ قبر پس اَمَد و پگِ امزی چِیزا ره دَ یازده رسُول و دِیگرو نَقل کد. ۱۰ امُو خاتُونو مریَمِ مَجدَلیه، یونا، مریَم آبِه یعقُوب و چند خاتُونِ دِیگه بُود که امی چِیزا ره دَ رسُولا گُفت. ۱۱مگم تورای خاتُونو بَلدِه ازوا مِثلِ ایله‌گویی معلُوم شُد و اُونا باوَر نَکد. ۱۲لیکِن پِترُس باله شُد و دَوِیده دَوِیده سُون قبر رفت؛ وختِیکه رسِید، خَم شُده مَنِه قبر ره توخ کد و تنها کفن ره دِید و بَس. اوخته اُو حَیرو شُده پس سُون خانه رفت.
۱۳دَمزُو روز دُو نفر از پَیرَوا طرفِ یگ آغِیل مورفت که عِمائوس نام دَشت و امُو آغِیل تقرِیباً دُو ساعت از اورُشَلیم دُور بُود. ۱۴اُونا قد یگدِیگِه خُو دَ بارِه پگِ امزی چِیزای که رُخ دَدُد، توره مُوگُفت. ۱۵دَ حالِیکه اُونا توره مُوگُفت و جَر-و-بَحث مُوکد، عیسیٰ خود شی دَزوا نزدِیک شُد و قد ازوا همراه شُد. ۱۶مگم از چِیمای ازوا قُدرتِ شِناس گِرِفته شُدُد تا عیسیٰ ره شِنَخته نَتَنه. ۱۷اُو دَزوا گُفت: ”شُمو دَ بَینِ راه قد یگدِیگِه خُو دَ بارِه چی نقل مُونِید؟“
اُونا ایسته شُد و غَمگی معلُوم مُوشُد. ۱۸اوخته یکی ازوا که کلیوپاس نام دَشت دَ جواب شی گُفت: ”آیا دَ مینکلِ مُسافِرا دَ اورُشَلیم تُو تنها کسی اَستی که از چِیزای که دَ اِی روزا رُخ دَد خبر نَدَری؟“
۱۹عیسیٰ ازوا پُرسان کد: ”از کُدَم چِیزا؟“
اُونا دَزشی گُفت: ”از چِیزای که قد عیسای ناصِری رُخ دَد. اُو پَیغمبری بُود که دَ حُضُورِ خُدا و تمامِ مردُم دَ گُفتار و دَ کِردار خُو قَوی بُود. ۲۰ولے پیشوایونِ عالی مقام و رهبرای مو اُو ره تسلِیم کد تا دَ مَرگ محکُوم شُنه و اُو دَ صلِیب میخکوب شُد، ۲۱دَ حالِیکه مو اُمِید دَشتی که اُو امُو کس اَسته که اِسرائیل ره نِجات مِیدیه. دَ پالُوی پگِ امزی توره ها فِعلاً سِه روز امزُو واقِعه تیر شُده. ۲۲علاوِه ازی، چند خاتُو که از جَمِ ازمو یَه، مو ره حَیرو کد، چُون اُونا اِمروز صَباح‌گاه دَ سرِ قبر رفت ۲۳و جَسَدِ عیسیٰ ره پَیدا نَتنِست. اوخته اُونا پس اَمَد و دَز مو نقل کد که ملایکه ها ره دَ رویا دِیده و ملایکه ها گُفته که عیسیٰ زِنده شُده. ۲۴پس چند نفرِ ازمو سرِ قبر رفت و وَضعیَت ره امُو رقم دِید که خاتُونو نَقل کدُد؛ لیکِن اُونا عیسیٰ ره نَدِید.“
۲۵اوخته عیسیٰ دَزوا گُفت: ”اَی آدمای نافام و کُند ذِهن، باوَر کدونِ پگِ تورای پَیغمبرا چِیقس بَلدِه شُمو سخت اَسته! ۲۶آیا لازِم نَبُود که مسیح امی رَنج ها ره بِنگره و بعد ازُو دَ بُزُرگی-و-جلال خُو بِرَسه؟“ ۲۷اوخته اُو از نوِشته های مُوسیٰ و پگِ پَیغمبرا شُروع کده چِیزای ره که دَ بارِه خود شی دَ تمامِ نوِشته های مُقَدَّس بُود، بَلدِه ازوا تشریح کد.
۲۸امی که اُونا دَ آغِیلِ عِمائوس نزدِیک شُد، عیسیٰ رقمی رفتار کد که پیشتَر موره. ۲۹مگم اُونا سخت شَلّه شُده گُفت: ”لُطفاً قد ازمو بُمَن، چراکه روز تیر شُده و شام نزدِیک اَسته. پس عیسیٰ داخِل رفت تا قد ازوا بُمنه.“
۳۰وختِیکه عیسیٰ قد ازوا دَ سرِ دِسترخو شِشت، اُو نان ره گِرِفته شُکرگُزاری کد و ٹوٹه کده دَزوا دَد. ۳۱بےبلغه چِیمای ازوا واز شُد و اُونا اُو ره شِنَخت؛ و اُو از نظرِ ازوا غَیب شُد. ۳۲اوخته اُونا قد یگدِیگِه خُو گُفت: ”آیا دِل های مو دَ درُون مو نَمِیتَپِید وختِیکه اُو دَ راه قد ازمو توره مُوگُفت و نوِشته های مُقَدَّس ره بَلدِه مو تشریح مُوکد؟“
۳۳و اُونا دَمزُو ساعت باله شُده پس دَ اورُشَلیم رفت. دَ اُونجی اُونا یازده یارِ عیسیٰ و مردُمای ره که قد ازوا جم شُدُد، پَیدا کد ۳۴که اُونا مُوگُفت: ”مَولا عیسیٰ واقِعاً دُوباره زِنده شُده و دَ شِمعون ظاهِر شُده!“
۳۵اوخته امُو دُو نفر ام نقل کد که دَ راه چی رُخ دَد و چی رقم اُونا عیسیٰ ره دَ وختِ نان ٹوٹه کدو شِنَخت.
۳۶دَ حالِیکه اُونا دَ امزی باره توره مُوگُفت، بےبلغه عیسیٰ خود شی دَ مینکل ازوا ایسته شُد و دَزوا گُفت: ”سلام علَیکُم.“
۳۷مگم اُونا وَحشَت زَده شُده ترس خورد و فِکر کد که یگ ره روح ره مِینگره. ۳۸عیسیٰ دَزوا گُفت: ”بَچی ترس خوردِید؟ چرا دَ دِل های شُمو شک پَیدا مُوشه؟ ۳۹دِستا و پایای مَره توخ کُنِید؛ بِنگرِید که خود مه اَستُم. دَز مه دِست بِزَنِید و بِنگرِید، چُون روح گوشت و استُغو نَدره، مگم رقمی که مِینگرِید ما دَرُم.“
۴۰وختِیکه امی توره ره گُفت اُو دِستا و پایای خُو ره دَزوا نِشو دَد. ۴۱دَ حالِیکه اُونا خوش و حَیرو بُود و هنوز نَمِیتنِست باوَر کنه، اُو دَزوا گُفت: ”کُدَم چِیز دَ اِینجی بَلدِه خوردو دَرِید؟“ ۴۲اُونا یگ مِقدار ماهی بِریو کده بَلدِه ازُو دَد ۴۳و اُو ماهی ره گِرِفته دَ پیشِ رُوی ازوا خورد.
۴۴اوخته عیسیٰ دَزوا گُفت: ”اینی تورای اَسته که وختی قد شُمو بُودُم گُفتُم، ’هر چِیزی که دَ تَوراتِ مُوسیٰ، نوِشته های اَنبیا و زبُور دَ بارِه مه نوِشته شُده، باید پُوره شُنه.‘“
۴۵بعد ازُو عیسیٰ ذِهنای ازوا ره روشو کد تا نوِشته های مُقَدَّس ره پَی بُبره ۴۶و دَزوا گُفت: ”اینی رقم نوِشته شُده، مسیح باید رَنج-و-عذاب بِنگره و دَ روزِ سِوّم از مُرده ها دُوباره زِنده شُنه؛ ۴۷و توبه و بخشِشِ گُناها دَ نامِ ازُو دَ تمامِ مِلَّت ها اِعلان شُنه و شُروعِ شی از اورُشَلیم بَشه. ۴۸شُمو شاهِدِ امزی چِیزا اَستِید. ۴۹اینه، ما روح اُلقُدس ره که آتِه مه وعده کده، دَز شُمو رَیی مُونُم. پس دَ شار بُمنِید تا وختِیکه از عالمِ باله قد قُدرتِ روح اُلقُدس پوشَنده شُنِید.“
۵۰اوخته عیسیٰ اُونا ره تا بَیت عَنیا بُرد و دَ اُونجی دِستای خُو ره باله کده اُونا ره بَرکت دَد. ۵۱دَ حالِیکه اُونا ره بَرکت مِیدَد، ازوا جدا شُده طرفِ آسمو بُرده شُد. ۵۲یارا اُو ره سَجده کد و قد خوشی کَلو پس دَ اورُشَلیم اَمَد. ۵۳دَ اُونجی اُونا همیشه وخت دَ خانِه خُدا بُود و خُدا ره حمد-و-ثنا مُوگُفت.