۱اوخته عیسیٰ دَ وسِیلِه روح اُلقُدس دَ بیابو هِدایَت شُد تا اِبلِیس اُو ره وَسوَسه کنه. ۲اُو چِل شاو-و-روز روزه گِرِفت و بعد ازُو گُشنه شُد. ۳اوخته وَسوَسه‌گر دَ دِیرِ ازُو اَمَده گُفت: ”اگه تُو باچِه خُدا اَستی، دَ امزی سنگا بُگی که نان جور شُنه.“ ۴عیسیٰ دَ جوابِ ازُو گُفت: ” دَ کلامِ خُدا نوِشته شُده که،
’اِنسان تنها دَ وسِیلِه نان زِنده نِییه،
بَلکِه دَ وسِیلِه هر تورِه که از دانِ خُدا بُر مُوشه.‘“
۵اوخته اِبلِیس عیسیٰ ره دَ شارِ مُقَدَّس بُرد و دَ بِلندی خانِه خُدا ایستَلجی کد ۶و دَزُو گُفت: ”اگه تُو باچِه خُدا اَستی خود ره تا پورته کُو، چُون نوِشته شُده که،
’اُو دَ بارِه ازتُو دَ ملایکه های خُو حُکم مُونه
و اُونا تُو ره دَ بَلِه دِستای خُو مِیگِیره،
نَشُنه که پای تُو دَ کُدَم سنگ ڈَکه کُنه.‘“
۷عیسیٰ دَزُو گُفت: ”بسم نوِشته شُده که،
’خُداوند، خُدای خُو ره آزمایش نَکُو!‘“
۸بعد ازُو اِبلِیس اُو ره دَ بَلِه یگ کوهِ غَدر قِیل بُرده تمامِ مَملَکَتای دُنیا و شان-و-شَوکت شی ره دَزُو نِشو دَد ۹و دَزشی گُفت: ”اگه رُوی دَ خاک اُفتَده مَره سَجده کُنی، پگِ امزیا ره دَز تُو مِیدُم.“ ۱۰اوخته عیسیٰ دَز شی گُفت: ”دُور شُو، اَی شَیطو! چُون نوِشته شُده:
’خُداوند، خُدای خُو ره سَجده کُو
و تنها اُو ره عِبادت کُو.‘“
۱۱بعد ازُو اِبلِیس اُو ره ایله کد و ملایکه ها اَمَده اُو ره خِدمت کد.
۱۲وختی عیسیٰ شِنِید که یحییٰ دِستگِیر شُده، اُو پس دَ جلِیلیه رفت ۱۳و ناصِره ره ایله کده دَ شارِ کَفرناحُوم جای-دَ-جای شُد که دَ بَغلِ دریای جلِیلیه، دَ منطقه های زِبُولُون و نَفتالی بُود، ۱۴تا چِیزی که دَ وسِیلِه اشعیای نَبی گُفته شُدُد، پُوره شُنه:
۱۵”سرزمِینِ زِبُولُون و سرزمِینِ نَفتالی
دَ راهِ دریا، دَ اُو طرفِ دریاچِه اُردُن،
جلِیلیِه مِلَّت های غَیرِ یهُود،
۱۶قَومی که دَ ترِیکی زِندگی مُوکُنه
نُورِ بُزُرگ ره مِینگره
و دَ بَلِه کسای که دَ سرزمِینِ مَرگ و سایِه شی زِندگی مُونه،
یگ نُور روشَنی مُونه.“
۱۷امزُو زمان عیسیٰ دَ اِعلانِ پَیغام خُو شُروع کده گُفت: ”توبه کنِید، چراکه اَمَدونِ پادشاهی آسمو نزدِیک شُده.“
۱۸وختی عیسیٰ دَ لبِ دریای جلِیلیه قَدم مِیزَد، دُو بِرار یعنی شِمعونِ مشهُور دَ پِترُس و بِرار شی اَندریاس ره دِید که تورِ ماهی‌گِیری ره دَ دریا مِیندَزه، چُون اُونا ماهی‌گِیر بُود. ۱۹اُو دَزوا گُفت: ”از پُشتِ ازمه بیِید تا شُمو ره شِکارچی مردُم جور کنُم.“ ۲۰اُونا فَوری تور های ماهی‌گِیری خُو ره ایله کد و از پُشتِ ازُو رَیی شُد. ۲۱ عیسیٰ دَ حالِیکه ازُونجی مورفت، دُو بِرارِ دِیگه یعنی یعقُوب باچِه زِبدی و بِرار شی یوحَنّا ره دِید که قد آتِه خُو زِبدی دَ کِشتی شِشته و تور های ماهی‌گِیری خُو ره آماده مُونه. اوخته اُو اُونا ره کُوی کد ۲۲و اُونا فَوری کِشتی و آتِه خُو ره ایله کده از پُشتِ ازُو رَیی شُد.
۲۳ عیسیٰ دَ سراسرِ جلِیلیه مِیگشت و دَ عِبادت خانه های ازوا تعلِیم مِیدَد و خوشخبری پادشاهی خُدا ره اِعلان مُوکد و هر رقم مَرَض و ناجوری مردُم ره شفا مِیدَد.
۲۴پس نامِ ازُو دَ تمامِ سُوریه مشهُور شُد و اُونا تمامِ ناجورای ره که دَ مَرَض های رقم رقم و دَردها گِرِفتار بُود و ام جِندیا و مِرگی ها و شَل ها ره دَ پیشِ ازُو میوُرد و اُو اُونا ره شفا مِیدَد. ۲۵و جمعیَت های کٹه از جلِیلیه، دیکاپولِیس، اورُشَلیم، یهُودیه و از اُو طرفِ دریای اُردُن از پُشتِ ازُو رَیی شُد.