۱پیشوایو و لاویای که قد زِروبابِل باچِه شِئَلتِیئیل و یِشُوعَ پس اَمَدُد، اینیا اَسته: سِرایا، اِرمیا، عِزرا، ۲اَمَریا، مَلُوک، حَطُوش، ۳شِکنیا، رحُوم، مِریموت، ۴عِدّو، گِنتوی، اَبیا، ۵میامِین، مَعَدیا، بِلگاه، ۶شِمَعیا، یویارِیب، یِدَعیا، ۷سَلّو، عاموق، حِلقیا و یِدَعیا. امی نفرا رهبرای پیشوایو و همکارای ازوا دَ زمانِ یِشُوعَ بُود.
۸از لاویا: یِشُوعَ، بِنُّوی، قدمِیئیل، شِرِبیا، یهُودا و مَتَنیا که قد همکارای خُو مسئُولِ سرُود‌های شُکرگُزاری بُود؛ ۹و بَقبُقیا و عُنّی همکارای ازوا که رُوی دَ رُوی ازوا بَلدِه خِدمت ایسته مُوشُد.
۱۰یِشُوعَ آتِه یویاقِیم بُود، یویاقِیم آتِه اِلیاشِیب، اِلیاشِیب آتِه یویاداع، ۱۱یویاداع آتِه یوناتان و یوناتان آتِه یَدُّوعَ.
۱۲دَ زمانِ یویاقِیم کٹه‌کَلونای اَولادِ بابه‌های پیشوایو اینیا بُود:
۲۲دَ زمانِ اِلیاشِیب، یهویاداع، یوحانان و یَدُّوعَ نامِ کٹه‌کَلونای اَولادِ بابه‌های لاویا و پیشوایو ثَبت شُد؛ اِی کار دَ دَورونِ پادشاهی داریوشِ فارسی رُخ دَد. ۲۳ نامِ کٹه‌کَلونای اَولادِ بابه‌های لاویا دَ کِتابِ تارِیخ تنها تا روزای زِندگی یوحانان باچِه اِلیاشِیب ثَبت شُد. ۲۴کٹه‌کَلونای لاویا اینیا بُود: حَشَبیا، شِرِبیا، یِشُوعَ باچِه قدمِیئیل و همکارای ازوا که رُوی دَ رُوی ازوا ایسته مُوشُد و حمد-و-ثنا گُفته شُکرگُزاری مُوکد؛ اُونا مُطابِقِ اَمرِ داوُود مَردِ خُدا دِسته دِسته رُوی دَ رُوی یگدِیگِه خُو ایسته مُوشُد. ۲۵مَتَنیا، بَقبُقیا، عوبَدیا، مِشُلام، طلمون و عقُوب درگه‌وانا بُود و از ذخِیره-خانه‌های که دَ نزدِیکِ درگه‌ها بُود نِگاهوانی مُوکد. ۲۶امی نفرا دَ زمانِ یویاقِیم باچِه یِشُوعَ، اَولادِه یوصاداق و دَ زمانِ نِحِمیای والی و عِزرای پیشوا و کاتِب خِدمت مُوکد.
۲۷دَ غَیتِ وَقف کدونِ دیوالِ اورُشَلیم اُونا لاویا ره از تمامِ جای های که زِندگی مُوکد، سُراغ کده دَ اورُشَلیم اَوُرد تا وَقف کدونِ دیوالِ اورُشَلیم ره قد خوشحالی، قد سرُود‌های شُکرگُزاری و قد سَنج و بَربط و چَنگ جشن بِگِیره. ۲۸پس دِسته های سرُودخانا از گِردوبَرِ اورُشَلیم و از آغِیلای نِطوفاتیا جَم شُد، ۲۹امچُنان از بَیت-جِلجال و از منطقه‌های جِبَع و عَزمَوِت، چُون سرُودخانا بَلدِه خُو دَ گِردوبَرِ اورُشَلیم آغِیلا آباد کدُد. ۳۰پیشوایو و لاویا اوّل خودون خُو ره پاک کد، و بعد ازُو مراسِمِ پاک کدونِ مردُم، درگه‌ها و دیوال ره دَ جای اَوُرد.
۳۱اوخته ما کٹه‌کَلونای یهُودا ره دَ بَلِه دیوال اَوُردُم و دُو دِستِه کٹِه سرُودخانا ره بَلدِه شُکرگُزاری تعیِین کدُم. یگ دِستِه ازوا طرفِ راست حَرکت کده دَ بَلِه دیوال سُون درگِه خاک‌اَنداز رفت ۳۲و از پُشتِ ازوا اینی نفرا رَیی شُد: هوشَعیا، نِیمِ کٹه‌کَلونای یهُودا ۳۳قد عَزَریا، عِزرا، مِشُلام، ۳۴یهُودا، بِنیامِین، شِمَعیا و اِرمیا؛ ۳۵امچُنان بعضی باچه‌های پیشوایو قد شیپُورها: زِکریا باچِه یوناتان، باچِه شِمَعیا، باچِه مَتَنیا، باچِه مِیکایا، باچِه زَکّور یکی از اَولادِه آساف ۳۶و همکارای شی شِمَعیا، عَزَرئیل، مِلَلای، جِلَلای، ماعای، نِتَنئیل، یهُودا و حَنانی قد آلاتِ مُوسِیقی که داوُود مَردِ خُدا هِدایت دَدُد؛ و عِزرای کاتِب پیش پیشِ ازوا مورفت. ۳۷وختِیکه اُونا دَ درگِه چشمه رسِید، مُستَقِیم از زِینه‌های شارِ داوُود دَ سربَلَکی دیوال باله رفت و از بَلِه خانِه داوُود تیر شُده تا درگِه آو طرفِ شَرق پیش رفت.
۳۸ دِستِه دوّمِ شُکرگُزاری طرفِ چَپ حَرکت کد و ما قد نِیمِ مردُم دَ بَلِه دیوال از پُشتِ ازوا رفتُم. مو از بُرجِ تنُور دَ دیوالِ بَرتُو تیر شُدی، ۳۹بعد ازُو از بَلِه درگِه اِفرایم، درگِه یِشاناه، درگِه ماهی، بُرجِ حَنَنئیل و بُرجِ صد تا درگِه گوسپندو رفتی؛ و اُونا دَ درگِه پَیره‌دارا ایسته شُد. ۴۰اوخته هر دُو دِستِه که شُکرگُزاری مُوکد دَ خانِه خُدا ایسته شُد و ما و نِیمِ کٹه‌کَلونای که قد ازمه بُود، ام ایسته شُدی. ۴۱پیشوایو یعنی اِلیاقِیم، مَعَسیا، مِنیامِین، مِیکایا، اِلیوعینای، زِکریا و حَنَنیا که دَ دِست خُو شیپُورها دَشت ۴۲و مَعَسیا، شِمَعیا، اِلعازار، عُزّی، یوحانان، مَلکیا، عیلام و عازِر ام ایسته شُد؛ و سرُودخانا دَ رهبری یِزرَحیا سرُود میخاند. ۴۳دَ امزُو روز مردُم قُربانی‌های کَلو تقدِیم کده خوشحالی کد، چُون خُدا اُونا ره خوشحال کدُد و خوشی کٹه دَدُد؛ خاتُونو و بچکِیچا ام خوشحالی مُوکد و آوازِ خوشحالی اورُشَلیم از جای‌های دُور شِنِیده مُوشُد.
۴۴دَ امزُو روز چندِین مَرد تعیِین شُد تا مسئُولِ اُتاق‌های ذخِیره بَلدِه هدیه‌ها، نَوبَرِ حاصِلات و دَه-یگ‌ها بَشه و دَ امزُو اُتاق‌ها حِصّه های پیشوایو و لاویا ره از زمِینای شارا مُطابِقِ حُکمِ شریعت جم کنه، چُون مردُمِ یهُودا از پیشوایو و لاویای که بَلدِه خِدمت ایسته مُوشُد، خوش بُود. ۴۵ پیشوایو و لاویا خِدمتِ خُدای خُو ره مُوکد و مَراسِمِ طهارَت ره دَ جای میوُرد؛ امُو رقم سرُودخانا و درگه‌وانا ام مُطابِقِ اَمرِ داوُود و باچِه شی سُلَیمان وظِیفِه خُو ره انجام مِیدَد. ۴۶چُون از زمانِ داوُود و آساف یعنی از قدِیم رهبرای سرُودخانا وجُود دَشته و سرُود‌های سِتایشی و شُکرگُزاری بَلدِه خُدا خانده مُوشُده. ۴۷دَ زمانِ زِروبابِل و زمانِ نِحِمیا پگِ اِسرائیل خَرچِ روزانِه سرُودخانا و درگه‌وانا و دِیگه لاویا ره بَلدِه ازوا مِیدَد. وختِیکه اُونا تقسِیمِ لاویا ره بَلدِه ازوا مِیدَد، لاویا از تقسِیم خُو یگ حِصِّه شی ره دَ اَولادِه هارُون یعنی دَ پیشوایو مِیدَد.