۱اوخته اِلیاشِیب پیشوای بُزُرگ قد پیشوایونِ همکار خُو باله شُده درگِه گوسپندو ره دُوباره آباد کد. اُونا اُو ره تقدِیس کد و پَلّه‌های درگه ره شَند؛ اَرے، اُونا اُو ره تا بُرجِ صد و تا بُرجِ حَنَنئیل تقدِیس کد. ۲پالُوی ازوا ره مَردای اَریحا دُوباره آباد کد و پالُوی ازوا ره زَکّور باچِه اِمری. ۳اَولادِه هَسِناه درگِه ماهی ره دُوباره آباد کد و چَت شی ره قد تِیرها پوشَنده پَلّه‌های درگه، پُشتبند‌ها و میخ های شی ره شَند. ۴پالُوی ازوا ره مِریموت باچِه اوریا نوسِه هَقوص بازسازی کد، پالُوی ازُو ره مِشُلام باچِه بِرِکیا، نوسِه مِشیزَبئیل بازسازی کد و پالُوی ازُو ره صادوق باچِه بعنا. ۵پالُوی ازُو ره مردُمِ تِقوعَه بازسازی کد، لیکِن کٹه‌کَلونای ازوا دَ کارای که سرکارگرا بَلدِه ازوا دَده بُود شانِه خُو ره خَم نَکد.
۶یویاداع باچِه فاسیَح و مِشُلام باچِه بِسودیا درگِه یِشاناه ره بازسازی کد و چَت شی ره قد تِیرها پوشَنده پَلّه‌های درگه، پُشتبند‌ها و میخ های شی ره شَند. ۷پالُوی ازوا ره مِلَتیای جِبعونی، یادونِ میرونوتی و مَردای جِبعه و مِصفه که دَ اِختیارِ والی غَربِ دریای فَرات بُود، بازسازی کد. ۸پالُوی ازوا ره عُزِیئیل باچِه حَرهایا که زَرگر بُود، بازسازی کد و پالُوی ازُو ره حَنَنیا که عَطرساز بُود. پس اُونا دیوالِ اورُشَلیم ره تا دیوالِ بَرتُو دُوباره آباد کد. ۹پالُوی ازُو ره رِفایا باچِه حُور که حُکمرانِ نِیمِ یگ ناحیِه اورُشَلیم بُود، بازسازی کد. ۱۰پالُوی ازُو ره یِدایا باچِه حَرُوماف که رُوی دَ رُوی خانِه شی بُود، بازسازی کد و پالُوی ازُو ره حَطُوش باچِه حَشَبنیا. ۱۱مَلکیا باچِه حارِیم و حَشُوب باچِه فَحَت-موآب یگ قِسمَتِ دِیگه و بُرجِ تنُور‌ها ره بازسازی کد. ۱۲پالُوی ازوا ره شَلُّوم باچِه هَلوحیش حُکمرانِ نِیمِ یگ ناحیِه اورُشَلیم و دُخترون شی بازسازی کد. ۱۳حانُون و مردُمای زانوَح درگِه دَرّه ره بازسازی کد. اُونا اُو ره دُوباره آباد کده پَلّه‌های درگه، پُشتبند‌ها و میخ های شی ره شَند و یگ هزار توغَی دیوال ره ام تا درگِه خاک‌اَنداز دُوباره آباد کد. ۱۴مَلکیا باچِه رِکاب حُکمرانِ ناحیِه بَیت-هَکارِیم درگِه خاک‌اَنداز ره بازسازی کد. اُو امُو درگه ره دُوباره آباد کده پَلّه‌ها، پُشتبند‌ها و میخ های شی ره شَند. ۱۵شَلُون باچِه کُلحوزِه حُکمرانِ ناحیِه مِصفه درگِه چِشمه ره بازسازی کد. اُو امُو درگه ره دُوباره آباد کد و چَت شی ره پوشَنده پَلّه‌های درگه، پُشتبند‌ها و میخ های شی ره شَند و دیوالِ حَوضِ شِلَح ره که دَ نزدِیکِ باغِ پادشاه بُود تا زِینه‌های که از شارِ داوُود تاه میمَد، ام بازسازی کد. ۱۶بعد ازُو ره نِحِمیا باچِه عَزبُوق حُکمرانِ نِیمِ ناحیِه بَیت-صُور، تا رُوی دَ رُوی قبرِ داوُود و تا نَوُرِ کَنده شُده و پایگاهِ عسکرا بازسازی کد. ۱۷بعد ازُو ره لاویا بازسازی کد که دَ وسِیلِه رحُوم باچِه بانی شُروع شُد و پالُوی ازُو ره حَشبیا حُکمرانِ نِیمِ ناحیِه قعِیله از طرفِ مردُمِ منطقِه خُو بازسازی کد. ۱۸بعد ازُو ره دِیگه بِرارونِ ازوا بازسازی کد که دَ وسِیلِه بَوّای باچِه حیناداد حُکمرانِ نِیمِ ناحیِه قعِیله شُروع شُد. ۱۹پالُوی ازُو ره که یگ قِسمَتِ دِیگه، رُوی دَ رُوی دامونِ سَلاح‌خانه دَ کَجی بُود، عِزِر باچِه یِشُوعَ حُکمرانِ مِصفه بازسازی کد. ۲۰بعد ازُو ره که یگ قِسمَتِ دِیگه از کَجی تا درگِه خانِه اِلیاشِیب پیشوای بُزُرگ بُود، بارُوک باچِه زَبّای قد شور-و-شَوق بازسازی کد. ۲۱بعد ازُو ره که یگ قِسمَتِ دِیگه از درگِه خانِه اِلیاشِیب تا آخِرِ خانِه اِلیاشِیب بُود، مِریموت باچِه اوریا نوسِه هَقوص بازسازی کد. ۲۲بعد ازُو ره پیشوایونی که مَردای منطقه‌های گِردوبَر بُود، بازسازی کد. ۲۳بعد ازوا ره بِنیامِین و حَشُوب که دَ رُوی دَ رُوی خانِه ازوا بُود، بازسازی کد و بعد ازوا ره عَزَریا باچِه مَعَسیا نوسِه عَنَنیا که دَ پالُوی خانِه شی بُود، بازسازی کد. ۲۴بعد ازُو ره که یگ قِسمَتِ دِیگه از خانِه عَزَریا تا کَجی بُود و دیوال دَور مُوخورد، بِنُّوی باچِه حیناداد بازسازی کد. ۲۵فلال باچِه اُوزای پیشِ رُوی کَجی و بُرجی ره که از بَلنه خانِه پادشاه بُر شُدُد و نزدِیکِ حَولی پَیره‌دارخانه بُود، بازسازی کد. بعد ازُو ره پِدایاه باچِه فرعوش ۲۶و خِدمتگارای خانِه خُدا که دَ بِلندی عوفِل زِندگی مُوکد، تا رُوی دَ رُوی درگِه آو طرفِ شَرق و بُرجِ بُر شُدَگی، بازسازی کد. ۲۷بعد ازوا ره که یگ قِسمَتِ دِیگه بُود، از رُوی دَ رُوی بُرجِ کٹِه بُر شُدَگی تا دیوالِ عوفِل، مردُمِ تِقوعَه بازسازی کد. ۲۸باله‌تَر از درگِه اَسپو ره پیشوایو بازسازی کد، هر کُدَم شی رُوی دَ رُوی خانِه خُو ره. ۲۹بعد ازوا ره صادوق باچِه اِمّیر که دَ رُوی دَ رُوی خانِه شی بُود، بازسازی کد و بعد ازُو ره شِمَعیا باچِه شِکَنیا که درگه‌وانِ درگِه شَرقی بُود، بازسازی کد. ۳۰بعد ازُو ره که یگ قِسمَتِ دِیگه بُود، حَنَنیا باچِه شِلِمیا و حانُون باچِه شَشُمِ صالاف بازسازی کد. بعد ازوا ره مِشُلام باچِه بِرِکیا که دَ رُوی دَ رُوی خانِه شی بُود، بازسازی کد. ۳۱بعد ازُو ره مَلکیای زَرگر تا خانِه خِدمتگارای خانِه خُدا و تُجارا که رُوی دَ رُوی درگِه جَم شُدو بُود و تا باله-خانِه کُنج بازسازی کد. ۳۲و دیوالِ مینکلِ باله-خانِه کُنج و درگِه گوسپندو ره زَرگرا و تُجارا بازسازی کد.