۱و خُداوند قد مُوسیٰ گپ زَده گُفت: ۲”قد بَنی اِسرائیل توره بُگی و ازوا تَیاق بِگِیر، از هر خانَوارِ بابه‌کَلونا یگ تَیاق که از پگِ رهبرای خانَوارِ بابه‌کَلونای ازوا دوازده تَیاق شُنه؛ نامِ ھر کس ره دَ بَلِه تَیاق شی نوِشته کُو. ۳نامِ ھارُون ره دَ بَلِه تَیاقِ لاوی نوِشته کُو، چُون بَلدِه کٹِه هر خانَوارِ بابه‌کَلونای ازوا باید یگ تَیاق بَشه. ۴و اُونا ره دَ خَیمِه مُلاقات دَ پیشِ رُوی صندُوقِ عهد بیل، دَ جایی که ما قد شُمو توره مُوگیُم. ۵اوخته کسی ره که ما اِنتِخاب مُونُم تَیاق شی شِگوفه مُونه. دَ امزی رقم ما نِق نِقی ره که بَنی اِسرائیل دَ خِلاف شُمو مُونه از حُضُور خُو بَند مُونُم.“ ۶پس مُوسیٰ قد بَنی اِسرائیل توره گُفت و پگِ رهبرای ازوا بَلدِه ازُو تَیاق های خُو ره دَد، از هر رهبر یگ تَیاق دَ مُطابِقِ خانَوارِ بابه‌کَلونای ازوا بُود، جُمله دوازده تَیاق؛ و تَیاقِ هارُون ام دَ مینکلِ ازوا بُود. ۷اوخته مُوسیٰ تَیاق ها ره دَ حُضُورِ خُداوند دَ خَیمِه صندُوقِ شهادَت ایشت. ۸صَباحِ امزُو روز وختِیکه مُوسیٰ دَ خَیمِه عهد داخِل شُد، دِید که تَیاقِ ھارُون که بَلدِه خانَوارِ لاوی بُود شِگوفه کده؛ اُو پُنڈُوق کده شِگوفه کدُد و بادامِ رَسِیده اَوُردُد. ۹اوخته مُوسیٰ پگِ تَیاق ها ره از حُضُورِ خُداوند دَ پیشِ تمامِ بَنی اِسرائیل بُرو اَوُرد و اُونا تَیاق ها ره توخ کد و هر کس تَیاق خُو ره گِرِفت.
۱۰و خُداوند دَ مُوسیٰ گُفت: ”تَیاقِ ھارُون ره دَ پیشِ رُوی صندُوقِ شهادَت پس بیل تا دَ عِنوانِ نَمُونِه عِبرَت بَلدِه مردُمای سرکَش نِگاه شُنه؛ و تاکه نِق نِقِ ازوا که دَ خِلافِ ازمه یَه بَند شُنه، نَشُنه که اُونا بُمُره.“ ۱۱پس مُوسیٰ امُو رقم کد و چِیزی ره که خُداوند دَز شی اَمر کدُد، دقِیق امُو رقم انجام دَد.
۱۲اوخته بَنی اِسرائیل دَ مُوسیٰ عرض کده گُفت: ”اینه، مو نیست و نابُود مُوشی! اَرے، پگ مو نابُود مُوشی! ۱۳ھر کسی که دَ جایگاهِ خُداوند نزدِیک مُوشه مُومُره. آیا پگ مو باید بُمُری؟“