۱اوخته دُخترونِ صِلُفِحاد باچِه حِفِر، نوسِه جِلعاد، کوسِه ماخِیر، اَولادِه مَنَسّی که دَ اَولادِ بابه های مَنَسّی باچِه یوسُف تعلُق دَشت پیش اَمَد. نام های دُخترونِ صِلُفِحاد اینیا بُود: مَحله، نوعه، حُجله، مِلکه و تِرصه. ۲اُونا دَ پیشِ مُوسیٰ، اِلعازار پیشوا، کٹه‌کَلونا و تمامِ جماعت دَ دانِ درگِه خَیمه مُلاقات ایسته شُده گُفت: ۳”آتِه مو دَ بیابو مُرد؛ اُو دَ جَمِ امزُو کسا نَبُود که قد گروهِ قورَح دَ خِلافِ خُداوند یگجای شُد، بَلکِه اُو دَ گُناهِ خود خُو مُرد و اُو صاحِبِ باچه نَبُود. ۴پس چرا باید نامِ آتِه مو بخاطری که باچه نَدَشت از بَینِ اَولادِ بابِه شی گُل شُنه؟ لُطفاً بَلدِه ازمو ام دَ مینکلِ بِرارونِ آتِه مو زمی بِدی.“
۵پس مُوسیٰ عرضِ ازوا ره دَ حُضُورِ خُداوند اَوُرد. ۶و خُداوند قد مُوسیٰ گپ زَده گُفت: ۷”دُخترونِ صِلُفِحاد راست مُوگیه؛ تُو حتماً باید بَلدِه ازوا دَ مینکلِ بِرارونِ آتِه شی مُلکِ میراثی بِدی؛ اَرے، میراثِ آتِه ازوا ره بَلدِه ازوا تسلِیم کُو. ۸امچُنان دَ بَنی اِسرائیل بُگی که ’اگه یگ آدم بُمُره و باچه نَدَشته بَشه، شُمو باید میراثِ ازُو ره دَ دُختر شی تسلِیم کُنِید. ۹اگه دُختر ام نَدَشته بَشه، میراثِ ازُو ره دَ بِرارون شی تسلِیم کُنِید. ۱۰اگه بِرار نَدَشته بَشه، دَ بِرارونِ آتِه شی تسلِیم کُنِید. ۱۱و اگه آتِه ازُو بِرار نَدَشته بَشه، اوخته میراث ازُو ره دَ نزدِیکتَرِین قَوم شی که اَولادِ بابِه شی بَشه تسلِیم کُنِید تا میراثِ ازُو ره صاحِب شُنه. اِی باید بَلدِه بَنی اِسرائیل یگ حُکمِ شَرعی بَشه، امُو رقم که خُداوند دَ مُوسیٰ اَمر کد.‘“
۱۲دَمزُو غَیت خُداوند دَ مُوسیٰ گُفت: ”دَ بَلِه امزی کوهِ عَبارِیم بُر شُو و سرزمِینی ره که ما دَ بَنی اِسرائیل دَدیم، توخ کُو. ۱۳وختِیکه اُو ره دِیدی، تُو ام فَوت کده قد قَوم خُو یگجای مُوشی، امُو رقم که بِرار تُو هارُون قد ازوا یگجای شُد. ۱۴چُون دَ بیابونِ صِین وختِیکه جماعت دَ خِلاف مه شورِش کد، شُمو از اَمر مه سرپیچی کدِید و دَ پیشِ آوِ قاده، مُقَدَّس بُودون مَره دَ نظرِ جماعت ثابِت نَکدِید.“ اِی آو، آوِ مِرِیبای قادِش بُود، دَ بیابونِ صِین.
۱۵اوخته مُوسیٰ قد خُداوند گپ زَده گُفت: ۱۶”اَی خُداوند، خُدای روح های پگِ بَشر، از تُو خاھِش مُونُم که یَگو کس ره دَ بَلِه امزی جماعت تعیِین کُنی ۱۷تا دَ پیشِ رُوی ازوا بوره و دَ پیشِ رُوی ازوا بییه و اُونا ره بُرو بُبره و داخِل بَیره تا جماعتِ خُداوند رقمِ گوسپندوی بےچوپو اَلّی نَبَشه.“
۱۸پس خُداوند دَ مُوسیٰ گُفت: ”یوشِع باچِه نُون ره که یگ مَردِ صاحِبِ روحِ حِکمت اَسته بِگِیر و دِست خُو ره دَ بَلِه ازُو بیل؛ ۱۹و اُو ره دَ پیشِ رُوی اِلعازار پیشوا و تمامِ جماعت ایسته کُو و اُو ره دَ حُضُورِ پگِ ازوا مُقرَر کُو. ۲۰از اِختیارات خُو دَزُو بِدی تا تمامِ جماعتِ بَنی اِسرائیل ازُو اِطاعَت کُنه. ۲۱ یوشِع بَلدِه ھر مَوضوعِ مُهِم باید دَ پیشِ اِلعازار پیشوا ایسته شُنه تا اُو بَلدِه شی دَ وسِیلِه اُورِیم ام یوشِع و ام تمامِ بَنی اِسرائیل، یعنی پگِ جماعت.“
۲۲اوخته مُوسیٰ امُو رقم کد که خُداوند دَزُو اَمر کدُد: اُو یوشِع ره بُرد و اُو ره دَ پیشِ رُوی اِلعازار پیشوا و تمامِ جماعت ایسته کد ۲۳و دِستای خُو ره دَ بَلِه ازُو ایشته اُو ره مُقرَر کد. امُو رقم که خُداوند گُفتُد، اُو دَ وسِیلِه مُوسیٰ مُقرَر شُد.