تیموتاوس ته د پولوس رسول دوهم لیک

دوهم فصل

د عیسی مسیح وفادار عسکر

۱نو ای زما زویه، په هغه فضل سره چې په عیسی مسیح کې دی، قوي اوسه. ۲کومې خبرې چې تا د ډېرو شاهدانو په مخکې زما څخه اورېدلي دي، هغه داسې وفادارو کسانو ته وسپاره چې نورو ته د تعلیم ورکولو وړ وي. ۳لکه د عیسی مسیح د یو ښه عسکر په شان زما سره په کړاوونو کې شریک شه. ۴هېڅ عسکر خپل ځان په ملکي کارونو کې نه راګېروي، ځکه چې د هغه مقصد د خپل قوماندان خوشحاله ساتل دي. ۵همدارنګه هېڅ لوبغاړی نه شي کولای چې د لوبو په سیالۍ کې جایزه تر لاسه کړي، ترڅو د هغې لوبې قوانین مراعت نه کړي. ۶کوم دهقان چې زحمت یې ویستلی وي، هغه باید لومړنی کس وي چې د خپلو حاصلاتو برخه واخلي. ۷څه چې زه درته وایم د هغو په هکله فکر وکړه، نو بیا به څښتن درته پوهه درکړي چې په ټولو شیانو باندې پوه شې.

۸یاد ساته عیسی مسیح چې د داود د نسل څخه دی او هغه د مرګ نه وروسته راژوندی شوی دی. دا هغه زېری دی چې زه یې اعلانوم ۹او د همدې زېري له امله دی چې زه کړاوونه وینم، تر دې چې د یو مجرم په شان په زنځیرونو تړل شوی یم. خو د خدای کلام په زنځیر تړل کېدای نه شي. ۱۰نو زه دا هرڅه د خدای د غوره شویو په خاطر زغمم، ترڅو هغوی هم هغه خلاصون او تلپاتې جلال چې په عیسی مسیح کې دی، تر لاسه کړي. ۱۱دا خبرې رښتیا دي:

«که چېرې مونږ د هغه سره مړه شوي یو، نو د هغه سره به ژوند هم کوو.

۱۲که چېرې مونږ صبر او زغم ولرو، نو د هغه سره به پاچاهي کوو هم.

که چېرې مونږ د هغه نه انکار وکړو، نو هغه به هم زمونږ نه انکار وکړي.

۱۳که چېرې مونږ بې وفا شو، نو هغه به وفادار پاتې شي،

ځکه چې هغه نه شي کولای د خپل ځان نه انکار وکړي.»

د خدای د خوښې خدمتګار

۱۴دا شیان خلکو ته ور په یاد کړه او د خدای په حضور کې ورته حکم وکړه چې د لغتونو په سر شخړه ونه کړي، ځکه چې دا هېڅ ګټه نه لري، بلکې اورېدونکو ته زیات زیان رسوي. ۱۵ډېر کوښښ وکړه ترڅو خپل ځان د خدای په نظر کې داسې وښایې چې هغه دې خوښ کړي، لکه د یو مزدور په شان چې په خپل کار نه شرمیږي او په سمه توګه د حقیقت د پیغام تعلیم ورکوي. ۱۶خو د بې دینه او بېځایه خبرو نه ځان وساته، ځکه چې دا خلک نور هم د بې ایمانۍ خواته وړي. ۱۷نو د هغوی خبرې لکه د ناسور زخم په شان دي چې ټول بدن ته خپریږي چې په دې ډله کې هیمناوس او فیلیتس شامل دي چې داسې خبرې کوي. ۱۸دغو کسانو چې د حقیقت لاره پریښې ده، وایي چې د بیا راژوندي کېدلو ورځ لا پخوا رارسېدلې ده او په دې ډول هغوی ځینې خلک د خپل ایمان څخه اړوي. ۱۹خو خدای چې کوم بنیاد ایښی دی، هغه ټینګ دی او په هغه باندې داسې لیکل شوي دي: «څښتن خپل خلک پېژني» او «څوک چې د هغه نوم په خوله یادوي، باید د بدۍ نه لاس واخلي.»

۲۰په یو لوی کور کې یوازې د سرو زرو او سپینو زرو لوښي نه وي، بلکې د لرګیو او خاورین لوښي هم وي. د هغو څخه ځینې یې د ځانګړو کارونو دپاره او ځینې یې د عادي کارونو دپاره دي. ۲۱نو له دې امله که چېرې څوک خپل ځان د بدیو نه پاک کړي نو هغه به داسې لوښی شي چې د ځانګړو کارونو دپاره به ورڅخه کار اخیستل کیږي، ځکه چې هغه وقف شوی دی او د خپل بادار دپاره ګټور دی او هر ډول نېک کار ته تیار دی.

۲۲نو د ځوانۍ د وخت د نفساني غوښتنو څخه ځان وساته او د هغو کسانو سره چې په پاک زړه څښتن ته دعا کوي، د عدالت، ایمان، مینې او سلامتۍ دپاره هلې ځلې کوه. ۲۳خو د کم عقلتوب او جهالت بحثونو نه ځان ساته، ځکه چې ته پوهېږې چې د هغو پای شخړه ده. ۲۴د څښتن خدمتګار باید جګړه مار نه اوسي بلکې په ټولو باندې مهربانه اوسي، ښه ښوونکی او زیات صبر او زغم ولري. ۲۵په نرمۍ سره دې خپل مخالفین اصلاح کړي. کېدای شي چې خدای هغوی ته موقعه ورکړي چې توبه وباسي، ترڅو حقیقت وپېژني. ۲۶بیا کېدای شي چې د هغوی سره عقل پیدا شي او د شیطان د دام نه چې په کې راګېر شوي دي او مجبوره کړي یې دي چې د هغه اراده پوره کړي، خلاص شي.