۱ څښتن ماته وویل: ۲ «ای فاني انسانه، د اسراییلو د واکمنانو په ضد نبوت وکړه. هغوی ته ووایه چې زه څښتن تعالی هغوی ته داسې وایم: ‹ای د اسراییلو شپنو، افسوس ستاسو په حال! تاسو په خپلو ځانونو باندې پام کوئ، ایا خپلو پسونو ته باید پاملرنه ونه کړئ؟ ۳ تاسو د هغوی وازګه خورئ، د هغو د وړیو نه جوړ شوي کالي اغوندئ، چاغ پسونه حلالوئ او هغه خورئ، خو هېڅکله په خپلو رمو باندې پام نه کوئ. ۴ تاسو د کمزورو پسونو ساتنه نه ده کړې، د ناروغو پسونو علاج مو نه دی کړی، د مات شویو هډوکو رغونه مو نه ده کړې، هغو چې خپله لاره ورکه کړې ده، هغه مو بېرته نه دي راوستي او ورک شوي مو نه دي لټولي. د دې په ځای په هغو باندې مو په زورزیاتي حکومت کړی دی. ۵ په دې خاطر چې هغو پسونو شپون نه درلود، نو هرې خواته خواره واره شول او د وحشي حیواناتو د خوراک شول. ۶ نو زما پسونه په غرونو او لوړو غونډیو باندې سرګردانه ګرځېدل. هغوی د ځمکې په مخ خواره واره شول او هېچا نه لټول او نه یې کوښښ کاوه چې هغه راپیدا کړي.›
۷ نو ای شپنو، زما کلام ته غوږ ونیسئ. ۸ زه څښتن تعالی تاسو ته داسې وایم، څرنګه چې زما پسونو شپون نه درلود، نو وحشي حیواناتو ورباندې حمله وکړه، هغوی یې ووژل او ویې خوړل. زما شپنو د پسونو د لټولو کوښښ ونه کړ. هغوی په خپلو ځانونو باندې پام کاوه او په پسونو باندې یې پام نه کاوه. ۹ نو ای شپنو، زما کلام ته غوږ ونیسئ. ۱۰ زه څښتن تعالی داسې وایم چې زه ستاسو په ضد یم. زه به تاسو سره حساب وکړم او بیا به هېڅکله تاسو پرېنږدم چې د هغوی شپانه اوسئ. بیا به هېڅکله تاسو پرېنږدم چې یوازې په خپلو ځانونو باندې پام وکړئ. زه به خپل پسونه ستاسو د خولې نه خلاص کړم او تاسو به پرېنږدم چې هغوی وخورئ.»
۱۱ «زه څښتن تعالی تاسو ته داسې وایم چې زه به په خپله خپل پسونه ولټوم او په هغو باندې به پام وکړم. ۱۲ لکه څنګه چې شپانه خپل ورک شوي پسونه لټوي او هغه بېرته راټولوي، زه به هم خپل پسونه چې په هغې تیاره او بدبخته ورځ خواره واره شوي وو، ولټوم او د ټولو ځایونو نه به یې بېرته راولم. ۱۳ زه به هغوی د پردیو وطنونو نه راوباسم، هغوی به سره راټول کړم او بېرته به یې خپل وطن ته راولم. زه به هغوی د اسراییلو په غرونو، تنګیو او د وطن په ټولو مېشته شوي ځایونو کې ماړه کړم. ۱۴ زه به هغوی په ښو واښو باندې ماړه کړم او د هغوی څړځایونه به د اسراییلو په لوړو غرونو باندې وي. هغوی به په ښو څړځایونو کې ارام ومومي او د اسراییلو په غرونو کې به پرېمانه واښه وخوري. ۱۵ زه به خپله د خپلو پسونو شپون اوسم او د هغوی دپاره به د ارام کولو ځای پیدا کړم. ما څښتن تعالی داسې ویلي دي.
۱۶ زه به ورک شوي پسونه ولټوم، بېلارې شوي به بېرته راولم، د مات شویو هډوکو رغونه به وکړم او کوم چې ناروغه شوي دي د هغو علاج به وکړم، خو چاغ او قوي پسونه به له منځه یوسم، ځکه زه به د هغوی دپاره باانصافه شپون اوسم.
۱۷ نو ای زما رمې، زه څښتن تعالی تاسو ته داسې وایم چې زه به ستاسو هر یو په هکله قضاوت وکړم او ښه حیوان به د بد حیوان نه او پسونه د سېرلیو نه بېل کړم. ۱۸ ایا دا ستاسو دپاره بس نه ؤ چې په خپله ښه واښه خورئ، خو کوم واښه چې تاسو نه پاتې کیږي، هغه ترپښو لاندې کوئ؟ ایا دا ستاسو دپاره بس نه ؤ چې صافې اوبه څښئ، خو پاتې اوبه چټلوئ؟ ۱۹ ولې زما نور پسونه هغه واښه خوري چې تاسو ترپښو لاندې کړي دي او هغه اوبه څښي چې تاسو چټلې کړې دي؟
۲۰ نو اوس زه څښتن تعالی تاسو ته داسې وایم: ‹ګورئ، زه به په خپله ستاسو د چاغو او ډنګرو پسونو ترمنځ قضاوت وکړم. ۲۱ تاسو کمزوري پسونه په خپلو اوږو، ورنونو او ښکرونو باندې یوې خواته ټېله کړي دي او د رمې نه مو هغوی خواره واره کړي دي. ۲۲ په دې خاطر به زه خپله رمه وژغورم او نور به یې پرېنږدم چې ظلم ورسره وشي. زه به د خپل هر یو حیوان په هکله قضاوت وکړم او ښه به د بد نه بېل کړم. ۲۳ زه به هغوی ته د خپل خدمتګار داود په شان بل پاچا ورکړم چې د هغوی یوازینی شپون شي او په هغوی باندې به پام وکړي. ۲۴ زه به د هغوی څښتن خدای یم او زما د خدمتګار داود په شان یو پاچا به د هغوی واکمن وي. ما څښتن داسې ویلي دي.›»
۲۵ «زه به د هغوی سره د سولې او امن لوظ وکړم. د هغوی وطن به د خطرناکو حیواناتو نه خلاص کړم، ترڅو زما پسونه وکولای شي په امن سره په صحرا کې واوسیږي او په ځنګلونو کې ویده شي.
۲۶ زه به نوموړې سیمې او په اورشلیم کې زما د غونډۍ شاوخوا حاصلخېزه کړم. زه به په سم موسم کې باران ووروم او دا به د برکت سبب وګرځي. ۲۷ ونې به مېوې ونیسي، ځمکې به حاصلات ورکړي او هر یو به په خپل وطن کې په امن سره ژوند تېر کړي. کله چې زه د خپلو خلکو جغونه مات او هغوی د غلامۍ نه خلاص کړم، بیا به هغوی پوه شي چې زه څښتن یم. ۲۸ پردي قومونه به هغوی لوټ نه کړي او وحشي حیوانات به هغوی ونه وژني او نه به یې وخوري. هغوی به په امن کې واوسیږي او هېڅوک به هغوی ونه وېروي. ۲۹ زه به هغوی ته داسې ځمکه ورکړم چې په حاصل ورکولو کې مشهوره وي. نور به هغوی له قحطۍ او لوږې ونه مري او پردي قومونه به نور هغوی ته سپکاوی ونه کړي. ۳۰ نو بیا به هغوی په دې پوه شي چې زه د اسراییلو څښتن خدای د هغوی سره یم او هغوی یعنې د اسراییلو قوم، زما خلک دي. ما څښتن تعالی داسې ویلي دي.
۳۱ ای زما پسونو، تاسو زما د څړځایونو پسونه یئ، تاسو زما قوم یئ او زه ستاسو خدای یم. څښتن تعالی داسې وایي.»