۱ یَهودائے بادشاه یِهۆیاکیمئے دئورئے سئیمی سالا، بابِلئے بادشاه نِبوکَدنِزَّر آتک و اورشَلیمی اَنگِرّ کرت. ۲ چه هُداوندئے رَزایا یَهودائے بادشاه، یِهۆیاکیمی پرۆش دات. بادشاهئے جند و هُدائے لۆگئے لهتێن دَرپی گۆن وت بابلئے سرڈگارا، وتی هُدائے لۆگا آورت و دَرپی وتی هُدائے لۆگئے هزانَگا اێر کرتنت.
۳ پدا بادشاها وتی دربارئے کارمَستِر، اَشپِناز هُکم دات که چه اِسراییلی چُکّان لهتێن اَنچێن بیار که چه بادشاهی نَسل و شرپمندێن هاندانان ببنت، ۴ اَنچێن وَرنا که هچّ پئیمێن بدَنی ائیبِش مان مبیت و رنگا ڈئولدار ببنت، هر ڈئولێن هکمتا بلَد بئیگئے لاهک، زانتکار و زوت‌پَهم ببنت و بادشاهئے بارگاها اۆشتگا بِکَرزنت. پدا اے وَرنایان بابِلئے اَرَمایی زبان و لبزانکا بوانێن. ۵ بادشاها اِشانی هر رۆچیگێن وراک و شراب چه وتی جندئے وراک و شرابا گچێن کرت و هُکمی دات که تان سئے سالا اِشان شَرّ بوانێنێت و زانتکار کنێت و پدا منی هِزمتا بۆشتارێنێت. ۶ اِشانی نیاما چه یَهودایا آورتگێن دانیال، هَنانیا، میشاێل و اَزَریا هئوار اَتنت. ۷ دربارئے کارمَستِرا آیانا نۆکێن نام پِر کرت. دانیالئے نامی بِلتِشازَر، هَنانیائے شَدرَک، میشاێلئے میشَک و اَزَریائے اَبِدنِگۆ کرت.
۸ دانیالا اِراده کرت که من وتا گۆن شاهی وراک و شرابان پلیتَ نکنان. گڑا آییا گۆن دربارئے کارمسترا دزبندی کرت که اگن تئو رَزا دئیئے، من اے وراکانَ نئوَران و وتا پلیتَ نکنان. ۹ نون هُدایا کارمسترئے دلا په دانیالا مِهر و همدردی پێدا کرت، ۱۰ بله کارمَستِرا اَنگت گۆن دانیالا گوَشت: ”منا چه وتی واجهێن بادشاها تُرسیت. آییا وت په شما وراک و شراب گچێن کرتگ. اگن آ بگندیت که شما چه وتی اے دگه همسرۆکێن وَرنایان نِزۆرتر اێت، گُڑا؟ اے پئیما، شما بادشاهئے دستا منی سرا بُرّاێنێت.“ ۱۱ کارمَستِر اشپنازا په دانیال، هَنانیا، میشاێل و اَزَریایا یکّ اپسَرے داشتگ‌اَت. دانیالا گۆن همے اپسرا گوَشت: ۱۲ ”مهربانی بکن و مارا تان ده رۆچا بچکّاس و بچار، بِلّ که مارا په ورگا تهنا سبزی و په نۆشگا تهنا آپ دئیگ ببیت. ۱۳ پدا مارا گۆن هما وَرنایان دێم په دێم بکن و بچار که شاهی وراکان ورگا اَنت. اگن ما نزۆرتر بوتێن، رَندا گۆن ما هما پئیما بکن که تئیی دلَ گوَشیت.“ ۱۴ گڑا اپسرا آیانی هبر مَنّت و تان ده رۆچا آ چکّاستنت.
۱۵ دهێن رۆچانی هلاسیا، دیستِش که آ، چه اے دگه وَرنایان جاندْراهتر و پزّۆرتر اَنت که شاهی وراکِش وارتگ‌اَت. ۱۶ گڑا اپسرا شاهی وراک و شراب، چه آیانی وراکا در کرتنت و آیانا سبزیَ دات. ۱۷ اے چارێن وَرنا، هُدایا لبزانک و هکمتئے هر پئیمێن زانت و هُنر دئیان کرتنت. دانیال هر وڑێن الهام و شُبێن و وابانی مانایا هم بلَد اَت.
۱۸ گڑا بادشاه نِبوکَدنِزَّرئے گیشّێنتگێن سئیێن سال که سَرجم بوتنت، دربارئے کارمسترا اے سجّهێن وَرنا آورت و بادشاهئے بارگاها پێش کرتنت. ۱۹ وهدے بادشاها گۆن آیان گپّ و تْران کرت، دیستی که دگه کَس دانیال، هَنانیا، میشاێل و اَزَریائے پئیما نه‌اِنت. گڑا اے چارێن بادشاهئے جندئے هِزمتا دارگ بوتنت. ۲۰ بادشاها هرچے که جُست کرتنت، دیستی که اے مردم هر پئیمێن هِکمت و سرپدیا چه مُلکئے سجّهێن جادوگر و ساهِران ده سَری شَرتر اَنت. ۲۱ دانیال، تان کورُش بادشاهئے دئورئے ائولی سالا همۆدا منت.