۱ نِبوکَدنِزَرا وتی بادشاهی دئورئے دومی سالا واب دیست. آییئے اَرواه بێتاهیر بوت و آ وابَ نکپت. ۲ گڑا بادشاها جادوگر، ساهِر، جِنّ‌بَند و نجومیانی لۆٹاێنگئے هُکم دات که آییئے وابان مانا بکننت. آ، آتک و بادشاهئے دێما اۆشتاتنت. ۳ بادشاها گۆن آیان گوَشت: ”من وابے دیستگ و منی اَرواه په اے وابئے مانائے زانگا بێتاهیر اِنت.“ ۴ گڑا نجومیان گۆن بادشاها اَرَمایی زبانا گوَشت: ”او بادشاه! مُدام زندگ باتئے. مارا وابا بگوَش. ما په تئو ماناییَ کنێن.“ ۵ بادشاها گۆن نجومیان گوَشت: ”منی گپّ یکّے. اگن شما منی وابا مگوَشێت و مانا مکنێت، شما ٹُکّر ٹُکّر کنگَ بێت و شمئے لۆگ تباه کنگ و هاکۆٹ جۆڑ کنگَ بنت. ۶ بله اگن شما وابا بگوَشێت و مانا بکنێت، شمارا چه منی نێمگا ٹێکی و تهپه، مُزّ و مزنێن شرپ و اِزّتے رسیت. پمێشکا منا منی واب و وابئے مانایا بگوَشێت.“
۷ آیان یکّ رندے پدا گوَشت: ”جی بادشاه! مارا وابا بگوَش، ما ماناییَ کنێن.“ ۸ بادشاها گوَشت: ”من سَدَّک آن که شما په وهدزئوالیا اے هبران کنگا اێت. شما گندگا اێت که منی هُکم یکّ و ٹِکّ اِنت ۹ که اگن شما منا وابا مگوَشێت، په شما سِزا یکّێن اِنت. شما وت‌مان‌وتا شئور کرتگ که منی دێما چَپّ و چۆٹێن هبر بکنێت و درۆگ ببندێت تان هما وهدا که وهد و جاوَر بدل بِبنت. پمێشکا شما وت منا وابا بگوَشێت، گڑا نون منَ زانان که شما مانایی هم کرتَ کنێت.“
۱۰ نجومیان، بادشاهئے پسئوا گوَشت: ”او بادشاه! دنیایا هچّ چُشێن مردمے نێست که اے کارا کرت بکنت. هچّ بادشاها، هرچُنت که مزن و زۆراور ببیت، هچبر چه هچّ جادوگر، ساهر و نجومیا چُشێن پَرمایشے نکرتگ. ۱۱ اے کارا که تئوِ بادشاه لۆٹگا ائے، سکّ گران اِنت. چه هُدایان اَبێد، اے هبرا کسّ بادشاها گوَشتَ نکنت، و هُدا وَه اِنسانانی نیاما نَنِشتگ‌اَنت.“
۱۲ گۆن اے هبرانی اِشکُنگا، بادشاه چه زَهرا سکّ هِژم گپت و هُکمی دات که بابِلئے سجّهێن داناێن مردم گار و گُمسار کنگ ببنت. ۱۳ گڑا پرمانے دئیگ بوت که دانا کُشگ ببنت. دانیال و آییئے سنگتانی شۆهازا هم در کپتنت که بکُشَنتِش. ۱۴ نون دانیالا گۆن جَلّادانی سَرمَستِر، آریوکا که بابِلئے دانایانی کُشَگا در کپتگ‌اَت، په هِکمت و دانایی هبر کرت. ۱۵ دانیالا چه بادشاهئے داشتگێن سرمستر، آریوکا جُست کرت: ”بادشاها چێا چُشێن ترُندێن پرمانے داتگ؟“ آریوکا، دانیال هال دات که چے بوتگ. ۱۶ نون دانیال شت و گۆن بادشاها دزبندی‌ای کرت که منا کمّے وهد بدئے، من تئوِ بادشاهئے وابا گوَشان و مانا کنان.
۱۷ دانیال، لۆگا شت و وتی سنگت، هَنانیا، میشاێل و اَزَریایی هال داتنت. ۱۸ گوَشتی: ”چه آسمانی هُدایا رهم بلۆٹێت و دْوا کنێت که اے راز په ما پدَّر ببیت تانکه ماشُما و بابِلئے اے دگه دانا کُشگ مبێن.“
۱۹ گڑا هما شپا اے راز په دانیالا، شُبێنێا پدّر کنگ بوت. نون دانیالا آسمانی هُدائے ستا کرت. ۲۰ گوَشتی:
”هدائے ناما اَبد تان اَبد ستا و سنا بات،
چێا که هکمت و زۆر هماییئیگ اَنت.
۲۱ هما اِنت که وهد و مۆسمان بدلَ کنت،
هما اِنت که بادشاهان دورَ کنت یا تَهتا نادێنیت،
هما اِنت که دانایان هکمتَ دنت و سرپدێنان زانتَ بَکشیت،
۲۲ هما اِنت که چێر و اندێمێن رازان پدّرَ کنت،
هما اِنت که زانت تهاریا چے هست و
رُژنایی هماییئے همراه اِنت.
۲۳ او منی پت و پیرکانی هُدا!
من تئیی شُگرا گران و تئیی تئوسیپا کنان،
چێا که تئو منا زۆر و هکمت داتگ.
انّون هم اے تئو ائے که په من هما چیزِّت زاهر کرتگ
که ما چه تئو لۆٹتگ،
چێا که تئو نون بادشاهئے جێڑه په ما پدّر کرتگ.“
۲۴ رندا دانیال، آریوکئے کرّا شت، هماییئے کِرّا که بادشاها بابِلئے دانایانی کُشگئے هُکم داتگ‌اَت. گۆن آییا گوَشتی: ”بابِلئے دانایان مَکُش. منا بادشاهئے کِرّا بر. من آییئے وابا مانا کنان.“ ۲۵ گڑا آریوکا زوتّ زوتّا دانیال، بادشاهئے کِرّا برت و گوَشتی: ”من چه یَهودائے دَرانڈێهان مردے در گێتکگ که تئوِ بادشاهئے وابا مانا کرتَ کنت.“ ۲۶ بادشاها گۆن دانیالا که دومی نامی بِلْتِشازَر اَت، گوَشت: ”تئو منی دیستگێن وابا و آییئے مانایا منا گوَشتَ کنئے؟“ ۲۷ دانیالا گۆن بادشاها گوَشت: ”هما رازا که تئوِ بادشاه آییئے جُستا ائے، هچّ دانا، ساهر، جادوگر و اِستارزانتے په تئو پدّر کرتَ نکنت، ۲۸ بله آسمانا هُداے هست که رازان پدّرَ کنت و هماییا په تئوِ بادشاه نِبوکَدنِزَرا زاهِر کرتگ که آیۆکێن رۆچان چے بیت. اے تئیی واب اِنت و هما شُبێن اَنت که وهدے تئو وتی نپادئے سرا تچک اَتئے، تئیی سرئے تها چکرّگا اَتنت.
۲۹ او بادشاه! نپادئے سرا تئیی هئیال آیۆکێن وهدئے نێمگا شتنت که بارێن چے بئیگی اِنت. هما که رازان پدّرَ کنت، ترا پێشی داشت که آیۆکێن وهدا چے بیت. ۳۰ بله اے راز په من اے سئوبا پدّر کنگ نبوتگ، که من چه اے دگه مردمان داناتر آن. پمێشکا پدّر کنگ بوتگ که من تئیی وابا په تئوِ بادشاها مانا بکنان تانکه تئو وتی دلئے هئیالان سرپد ببئے. ۳۱ او بادشاه! تئو چارگا اَتئے و بلاهێن بُتے دیستِت. اے مزنێن و سکّێن درپشناکێن بُتے اَت که تئیی دێما مِکّ اَت و گِندَگا تُرسناک اَت. ۳۲ اے بُتئے سر، چه پَهکێن تلاها اَڈّ بوتگ‌اَت. دلبند و باسْکی چه نُگرها، لاپ و رانی بْرِنجئیگ اَتنت، ۳۳ ڈیلّنگ آسِن، پادانی نێم آسِن و نێم پَتکگێن گِلئیگ اَتنت. ۳۴ تئو اَنگت چارگا اَتئے و سِنگے سِندَگ بوت، مردمی دستێا نسِست. سِنگ آتک و بُتئے آسن و گِلێن پادان لگِّت و پرۆشتنتی. ۳۵ پدا آسِن، پتکگێن گِل، بْرنج، نُگره و تلاه، سَرجما یکجاه هورت بوتنت، اَنچُش که گرماگان جۆهانئے پُگ و پلار هورتَ بنت، و گواتا رُپت و بُرتنت تان آیانی هچّ نشانے پَشت نکپت. بله هما سِنگ که بُتا لگّت، بلاهێن کۆهے جۆڑ بوت و سجّهێن زمینی گپت.
۳۶ واب اِش اَت. نون ما اِشیا تئوِ بادشاهئے دێما مانا کنێن. ۳۷ او بادشاه! تئو بادشاهانی بادشاه ائے. هما ائے که آسمانی هُدایا ترا بادشاهی، کُدرت، زۆر و واک و شان و شئوکت داتگ و ۳۸ هر جاگه که انسان، جنگلی جانوَر و بالی مُرگ زندگ اَنت، هُدایا ترا اے سجّهێنانی سرا هُکمران کرتگ. تلاهێن سر، تئو ائے.
۳۹ چه ترا پد، دگه بادشاهیے کئیت که چه تئییگا کمزۆرتِرَ بیت. پدا سئیمی، بْرنجێن بادشاهیے کئیت که سجّهێن زمینئے سرا هُکمرانیَ کنت. ۴۰ پدا چارمی بادشاهیے کئیت که چۆ آسنا مُهر و مهکمَ بیت، چێا که آسن سجّهێن چیزّانَ پرۆشیت و شِنگ و شانگَ کنت. اَنچُش که آسن سجّهێن چیزّانَ پرۆشیت، اے بادشاهی هم، اے سجّهێن مُلکانَ پرۆشیت و ٹکّر ٹکّرَ کنت. ۴۱ اے پاد و پادانی لنکک که نێما پتکگێن گِل و نێما آسِنئیگ اَتنت و تئو دیستنت، اے بهر و بانگێن بادشاهیے بیت، بله اِشیئے تها آسِنئے مُهری مانَ بیت چێا که تئو آسِن گۆن پتکگێن گِلا هئوار دیست. ۴۲ چُش که پادانی لنکک، نێما آسن و نێما پتکگێن گلئیگ اَتنت، اے بادشاهیئے بهرے مُهکم و بهرے نزۆرَ بیت. ۴۳ هما ڈئولا که تئو آسن گۆن پتکگێن گلا هئوار دیست، کئوم و نَسل هئوار وَه بنت بله گۆن یکدومیا نلچّنت، اَنچُش که آسن گۆن گِلا نلچّیت.
۴۴ آ بادشاهانی وهدا، آسمانی هُدا دگه بادشاهیے اڈَّ کنت که هچبر تباهَ نبیت و دگه کئومێئے دستا هم دئیگَ نبیت. اے بادشاهی، آ دگه سجّهێن بادشاهیانَ پرۆشیت و هلاسَ کنت، بله وت تان اَبد برجمَ مانیت. ۴۵ اَنچُش که تئو دیست، سِنگ چه کۆهێا سِندگ بوت، مردمی دستێا نَسِست، و آسن، بْرنج، گِل، نُگره و تلاهی هورت کرتنت. او بادشاه! مزنێن هُدایا په تئو پدّر کرتگ که دێمتِرا چے بیت. پمێشکا واب راست اِنت و اِشیئے مانا هم پَکّا اِنت.“
۴۶ بادشاه نِبوکَدنِزَر دێم په چێر کپت و دانیالی سُجده کرت و هُکمی دات که دانیالئے دێما هئیراتے بکنێت و سۆچُکی چێرسۆچ بکنێت. ۴۷ بادشاها گۆن دانیالا گوَشت: ”بێشک تئیی هُدا، هُدایانی هُدا اِنت و بادشاهانی هُداوند اِنت و رازانی پدّر کنۆک، چێا که تئو اے راز پدّر کرت کرتگ.“ ۴۸ پدا بادشاها دانیال مسترێن اُگدهے و بازێن تهپه و ٹێکیے دات، بابِلئے دَمگئے هُکمرانی‌ای سَرجما هماییئے دستا دات و بابِلئے سجّهێن دانایانی سرمستری کرت. ۴۹ نون دانیالا گۆن بادشاها دزبندی کرت و بادشاها شَدرَک، میشَک و اَبِدنِگۆ بابِلئے دَمگئے کارانی مستر کرتنت. دانیال وت بادشاهئے دَربارا نِشت.