۱ داریوشا دلا شئور کرت که وتی بادشاهیا یکّ سد و بیست والی بداریت که آییئے بادشاهیئے سجّهێن کارانی زمّهوار ببنت و ۲ اے والیانی سرا سئے سروزیر دارگ ببیت. دانیال چه اے سئیێنان یکّے اَت. والیانا، همے سروزیرانی دێما هساب دئیگی اَت تانکه بادشاها تاوانے مرسیت. ۳ دانیال، وتی اجبێن روهئے سئوبا، زوت چه اے سروزیر و والیان دێما در آتک. چه دانیالئے لاهکیا، بادشاها هئیال کرت که سجّهێن مُلکئے زمّهواریان هماییا بدنت. ۴ گڑا اے دگه سروزیر و والی دانیالئے هکومتی کارانی تها رَدی شۆهاز کنگا لگّتنت، بله آیان په دانیالئے اێر جنگ و مئیاریگ کنگا هچّ نیمّونے دست نکپت. آ، وپادارے اَت، چه وتی کاران نادلگۆش نه‌اَت و نه که سِلکاریے کرتی. ۵ نون اے مردمان گوَشت: ”مارا اے مرد، دانیالئے هلاپا دگه هچّ نیمّونے دستَ نکپیت، ابێد چه اَنچێن گپّێا که آییئے هُدائے شَریَتئے بارئوا ببیت.“
۶ گڑا اے سروزیر و والی یکجاه بوت و بادشاهئے کِرّا آتکنت و گوَشتش: ”بادشاه داریوش! مُدام زندگ باتئے. ۷ او بادشاه! تئیی سجّهێن سروزیر، هاکم، والی، سَلاهکار و سرداران وت‌مان‌وتا شئور کرتگ که تئو یکّ شاهی هُکمے بدئیئے که هرکَس تان آیۆکێن سی رۆچا ترا ابێد، دگه هُدا یا دگه مردمێئے کِرّا دْوا بلۆٹیت، شێرانی گارا دئور دئیگَ بیت. ۸ او بادشاه! نون هُکم بدئے و اے پَرمانا دَسهَتّ کن تانکه بدل بوت مکنت. اے ڈئولا اے هُکم، ماد و پارسئے کانونے جۆڑَ بیت که بدل کنگَ نبیت.“ ۹ گڑا بادشاه داریوشا پَرمان دَسهَتّ کرت.
۱۰ نون وهدے دانیال سهیگ بوت که چُشێن پَرمانے دَسهَتّ کنگ بوتگ، وتی لۆگئے هما بُرزی کۆٹیا شت که دریگی دێم په اورشَلیما پَچَ بوتنت و اَنچۆ که مُدام کرتگ‌اَتی، رۆچے سئے رندا کۆنڈانَ کپت، دْواییَ کرت و وتی هُدائے شُگریَ گپت. ۱۱ گڑا اے مرد مُچّ بوت و آتکنت و دیستِش که دانیال وتی هُدائے کِرّا دْوا و پریات کنگا اِنت. ۱۲ بادشاهئے کرّا شتنت و شاهی پرمانئے بارئوا هبرِش کرت و گوَشتِش: ”او بادشاه! تئو پَرمانے دَسهَتّ نکرتگ که هرکَس تان سی رۆچا ترا ابێد دگه هُداێئے یا که دگه مردمێئے کِرّا دْوا بلۆٹیت، شێرانی گارا دئور دئیگَ بیت؟“بادشاها پسّئو دات: ”هئو، اے راست اِنت. ماد و پارسئے کانونئے هسابا اے بدل بوتَ نکنت.“ ۱۳ نون آیان گۆن بادشاها گوَشت: ”دانیال که چه یَهودائے دَرانڈێهان یکّے، تئیی جند و تئیی دَسهَتّ کرتگێن پَرمانی هچّ دلگۆش نکرتگ، او بادشاه! رۆچے سئے رندا اَنگت وتی هُدائے کِرّا دْوا لۆٹگا اِنت.“ ۱۴ بادشاها که اے هبر اِشکت، سکّ پرێشان بوت. اِرادهی کرت که دانیالا رَکّێنان و تان بێگاها همے جُهدا اَت که چۆن آییا برَکّێنیت.
۱۵ گڑا اے مرد پدا یکجاه بوت و بادشاهئے کِرّا آتکنت و گوَشتش: ”بچار، او بادشاه! ماد و پارسئے کانون اِنت که بادشاهئے دَسهَتّ کرتگێن هچّ هُکم و پَرمان بدل بوتَ نکنت.“ ۱۶ گڑا بادشاها هُکم دات و دانیال آرگ و شێرانی گارا دئور دئیگ بوت. بادشاها گۆن دانیالا گوَشت: ”تئیی هما هُدا وَت ترا برَکّێنات که تئو مُدام آییئے هِزمتا کنئے.“ ۱۷ پدا سِنگے آرگ و گارئے دپا اێر کنگ بوت. بادشاها گۆن وتی جندئے و وتی میر و مهتِرانی مُندریکّان گارئے دپ مُهر جت تانکه دانیالئے جاوَر بدل بوت مکنت. ۱۸ پدا بادشاه وتی کَلاتا شت. سجّهێن شپا وراکی نئوارت و واب نکپت. آییئے بارگاها هچّ پئیمێن شاتکامی کنگ نبوت.
۱۹ سُهبا ماهله، اَنچۆ که رۆچا ٹِکّ کرت، بادشاه پاد آتک و زوتّ زوتّا شێرانی گارئے نێمگا شت. ۲۰ وهدے گارئے نزّیکّا رست، گۆن دردناکێن تئوارێا کوکّاری کرت و گۆن دانیالا گوَشتی: ”او دانیال! او زندگێن هُدائے هِزمتکار! بارێن ترا تئیی هما هُدایا چه شێران رَکّێنت کرت که تئو مُدام آییئے هِزمتا کنئے؟“ ۲۱ گڑا دانیالا پسّئو دات: ”او بادشاه! مُدام زندگ باتئے. ۲۲ منی هُدایا وتی پرێشتگے راه دات که شێرانی دپی بست. شێران منا هچّ تاوان ندات. او بادشاه! همینچک که من هدائے دێما بێگُناه آن، همینچک تئیی دێما هم من هچّ رَدێن کارے نکرتگ.“
۲۳ نون بادشاه سکّ گَل بوت و هُکمی دات که دانیال چه گارا در کنگ ببیت. گڑا دانیال چه گارا در کنگ بوت. ٹَپّے هم پِری نێست‌اَت چێا که آییا وتی هُدائے سرا تئوکل کرتگ‌اَت. ۲۴ نون بادشاها هُکم دات و هما مردم آرَگ بوتنت که دانیالئے هلاپا پندلِش سازتگ‌اَت. آ گۆن جَن و چُکّان شێرانی گارا دئور دئیگ بوتنت. اَنگت گارئے جُهلانکیا سر نبوتگ‌اَتنت که شێران گِپتنت و آیانی سجّهێن هَڈّ پرۆشتنت.
۲۵ پدا بادشاه داریوشا په سجّهێن کئوم، راج و هر زبانئے مردمان که تێوَگێن سرزمینا جهمنند اَتنت، نبشته کرت: ”شما گێشا گێشتر اێمِن باتێت. ۲۶ من جارَ جنان که منی بادشاهیئے هر کُنڈئے مردم، چه دانیالئے هُدائے تُرسا بلرزنت و هماییا شرپ بدئینت.
چێا که هما زندگێن هُدا اِنت و
مُدامَ مانیت.
آییئے بادشاهی هچبر تباه و بربادَ نبیت و
آییئے هُکمرانی هچبر هلاسَ نبیت.
۲۷ هما نجاتَ دنت و رَکّێنیت،
آسمان و زمینئے سرا
اجبّتێن نشانی و مۆجزه پێشَ داریت.
هماییا دانیال چه شێرانی دَپا رَکّێنتگ.“
۲۸ نون اے مرد دانیالا، داریوش و پارسێن کورشئے بادشاهی دئورا دێمرئوی کرت.