۱ گڑا موسّا و اِسراییلیان په هُداوندا اے نازێنک جت:
”من هُداوندا نازێنان،
چێا که هُداوند
په شان و شئوکت سۆبێن بوت.
آییا اَسپ و اَسپ‌سوار دریایا چَگَل داتنت.
۲ هُداوند منی زۆر و واک و منی نازێنک اِنت.
هُداوند په من نجاتے بوت.
منی هُدا اِنت،
منَ نازێنانی.
منی پتئے هُدا اِنت و
من آییا سَتا و سَنا کنان.
۳ هُداوند جنْگ کنۆکے،
نامی یَهوِه اِنت.
۴ پِرئونئے اَرّابه و لشکری دریایا چگل داتنت،
پِرئونئے شَرترێن اَپسر سُهرزِرا بُکِّتنت.
۵ جُهلێن آپان اَندێم کرتنت،
آ چۆ سِنگا جُهلانکیا اێر بُکِّتنت.
۶ او هُداوند! تئیی راستێن دست اَجَب زۆرمند اَت.
او هُداوند! تئیی راستێن دستا دُژمن شِنگێنت.
۷ تئو چه وتی مَزَن‌شانیا دژمن سَرشکون کرتنت.
تئو وتی هِژم راه دات و
تئیی هِژمئے آسا دژمن چۆ پَلارا وارتنت.
۸ چه تئیی پۆنزئے دَما
آپ سر په سر بوت،
تچۆکێن آپ چۆ دیوالا مُهر اۆشتاتنت.
جُهلێن آپ دریائے گُبّا بَدِتنت.
۹ دُژمنا گوَشت:
’من اِشانی رندا کپان و رسێنانِش،
مالانی آوارا بهرَ کنان و
وتی اَرواها سێراپَ کنان.
زهما کَشّان و
منی دستِش تباهَ کنت.‘
۱۰ بله تئو هُپّ کرت و
دریایا آ پۆشِتنت.
آ چۆ سْرُپا جُهلێن آپان اێر بُکّتنت.
۱۱ او هُداوند!
هُدایانی نیاما کئے تئیی پئیما اِنت؟
کئے تئیی پئیما پاکیا مَزَن‌شان اِنت؟
تئیی پُرشانێن کار سَتا کرزنت و
تئو هئیران کنۆکێن کارَ کنئے.
۱۲ تئو وتی راستێن دست شهار دات و
زمینا دُژمن اێر برتنت.
۱۳ تئو په مِهر
وتی مۆکِتگێن مهلوکئے رهبری کرت و
گۆن وتی زۆر و واکا
دێم په وتی پاکێن بارگاها
آیانی رهشۆنی کرت.
۱۴ کئومَ اِشکننت و لَرزنت.
بیمّے پیلِستیائے جَهمنندانی دِلا کپیت.
۱۵ اِدومئے سردارَ تُرسنت.
موآبئے زۆراوَرانی جانا دْرَهگے کپیت و
کَنهانئے سجّهێن جَهمنند دلترَکَّ بنت.
۱۶ بیمّ و دَهشَتے دلا کپیتِش.
چه تئیی باسکئے زۆرمندیا
آ سِنگ و سیاهَ بنت،
تان هما وهدا که
تئیی مهلوک بگوَزیت، او هُداوند،
تان هما وهدا که
تئیی مۆکِتگێن مهلوک بگوَزیت.
۱۷ او هُداوند، تئو وتی مهلوکا مُلکا کارئے و
وتی میراسئے کۆهئے سرا نادێنئے،
هما جاگها که تئو په وتی نِندگا اَڈّ کرتگ،
هما پاکێن جاگه که تئیی دستان تئیار کرتگ، او هُداوند!
۱۸ هُداوند اَبد تان اَبد هاکمیَ کنت.“
۱۹ وهدے پِرئونئے اَسپ و اَرّابه و اَسپ‌سواران دریایا مان دات، هُداوندا دریائے آپ آیانی سرا پِر گَردێنت، بله اِسراییلی دریائے تها، چه هُشک بوتگێن راها گوَستنت.
۲۰ پئیگمبرێن مَریم که هارونئے گُهار اَت، آییا کَنجَریے زرت و پاد آتک. سجّهێن جنێن کَنجَری جنان و ناچ کنانا پاد آتکنت گۆن. ۲۱ مَریما په آیان نازێنک جت:
”هُداوندا بنازێنێت،
چێا که هُداوند
په شان و شئوکت سۆبێن بوت.
آییا اَسپ و اَسپ‌سوار دریایا چَگَل داتنت.“
۲۲ گڑا موسّایا اِسراییلیانی رهشۆنی کرت. آ چه سُهرزِرئے تئیابا پاد آتک و شورئے گیابانا شُتنت. تان سئے رۆچا گیابانا سپرِش کرت بله هچّ آپِش ندیست. ۲۳ وهدے مارَها سر بوتنت، مارَهئے آپِش وارت نکرت که سۆر اَت. پمێشکا آ جاگهئے نام مارَه بوت. ۲۴ مهلوکا موسّائے سرا نُرُنڈِت و گوَشت: ”چے بوَرێن؟“ ۲۵ موسّایا هُداوندئے کرّا پریات کرت و هُداوندا موسّا داری ٹُکّرے پێش داشت. موسّایا دار آپا دئور دات و آپ شیرکن بوت.
اۆدا هُداوندا په مهلوکا هُکم و پَرمانے گیشّێنت و مهلوکی چَکّاست. ۲۶ هُداوندا گوَشت: ”اگن تئو په دلگۆش وتی هُداوندێن هُدائے تئوارا گۆش بدارئے و هما کاران بکنئے که آییئے چمّان شَرّ اَنت، اگن آییئے هُکمان دلگۆش بکنئے و آییئے سجّهێن پرمانان بِمَنّئے، هچّ چُشێن نادْراهیے تئیی سرا نئیاران که من مِسریانی سرا آورت، چێا که منِ هُداوند تئیی دْراه کنۆک آن.“
۲۷ آ اێلیما آتکنت. اێلیما آپئے دوازده چَمّگ و هپتاد بُن مَچّ هست‌اَت. اۆدا آپئے کرّا اُردِش کرت.