۱ آکوبا وتی چُکّ گْوانک جت و گوَشتنت: ”یکجاه بێت، من شمارا گوَشان که آیۆکێن رۆچان چے بیت.
۲ یکجاه بێت و گۆش دارێت،
او آکوبئے چُکّان!
وتی پت اِسراییلئے هبران گۆش دارێت.
۳ او روبِن! تئو منی ائولی چُکّ ائے،
منی واک و تْوان ائے،
منی مردانَگیئے ائولی نشان ائے،
مڑاه و زۆرئے شان ائے.
۴ چۆ آپا بێلَگام ائے،
مستر نون تئو نمانئے،
که وتی پتئے نپادان، منی گَندَلان سر کپتئے و
پَلیتِت کرتنت.
۵ شَمون و لاوی برات اَنت،
زَهمِش شِدّتی سِلاه اَنت.
۶ هچبر اِشانی مجلسا منِنداتان،
گۆن اِشان همدیوان مباتان،
که چه وتی هِژما مردمِش کُشتگ‌اَنت و
په وتی دِلوَشّیا سانڈِش لَنگ کرتگ‌اَنت.
۷ نالَت بات اِشانی ترُندێن هِژما،
اِشانی بێرَهمێن کَهرا.
آکوبئے مُلکا یکّ یَکِّشَ کنان،
اِسراییلئے مُلکا شِنگ و شانگ.
۸ او یَهودا! تئیی برات ترا نازێننت،
تئیی دست دژمنانی گُٹّا سکَّ بیت،
تئیی پتئے چُکّ تئیی دێما کۆنڈانَ کپنت.
۹ یَهودا شێری گُلُّڑے.
او منی چُکّ! تئو چه شکاران آتکگئے.
یَهودا چۆ شێرا سْراپَ کنت،
چۆ مادگێن شێرا کَمینَ کنت.
کئیی مجال اِنت که پادی بکنت؟
۱۰ بادشاهی اَسا چه یَهودائے دستا نرئوت و
هاکمیئے دَزلَٹّ چه آییئے پادانی دێما دورَ نبیت
تان هما وهدا که اَسلیگێن واهُندَ کئیت و
کئوم آییئے پرمانبردارَ بنت.
۱۱ آ وتی هرا انگوری درچکێا بندیت و
کُرّگا گچێنی شاهڑێا،
وتی پۆشاکان گۆن شرابا شۆدیت،
وتی پُچّان گۆن انگورئے هۆنا.
۱۲ آییئے چمّ چه شرابا سُهرتِرَ بنت و
دنتان چه شیرا اِسپێت‌تِر.
۱۳ زِبولون تئیاب‌دَپا جَهمنندَ بیت،
په بۆجیگان بَندِنے بیت و
سیمسری تان سئیدونا سرَ بیت.
۱۴ ایسّاکار زۆرمندێن هرے
که دوێن تَنگانی نیاما تَچک اِنت.
۱۵ گندیت که آرامجاه شَرّ اِنت و زمین وشّ،
وتی بَڈّا په بارا اێرَ دنت و
په بیگاریا تئیارَ بیت.
۱۶ دان اِسراییلئے کَبیلهے بیت و
په وتی مردمان اِنساپَ کاریت.
۱۷ دان رهسرا مارے بیت،
کِشکئے کَشا سْیَه‌مارے،
اَسپانی سْرُمبان ڈنگَ جنت
که سوار پُشتکا بکپیت.
۱۸ او هُداوند! وداریگ آن
که تئو برَکّێنئے.
۱۹ اُرُش کنۆک جادا اَنگِرَّ کننت،
بله جاد آیانی پادانی پونزانی سرا بیڑَ بارت.
۲۰ آشِرئے نگن چرپَ بیت،
مهلوکا شاهی وراکَ دنت.
۲۱ نَپتالی آزات بوتگێن آسْکے و
ڈئولدارێن آسکَلُکَ کاریت.
۲۲ ایسُّپ پُرسَمرێن اَنگورے،
چَمّگئے لَمبا برآوَرێن اَنگورے.
شاهڑی، دیوالان سرَ کپنت.
۲۳ تیرکَمان جنۆکان په زهرناکی آییئے سرا اُرُش کرت و
په بدواهی تیرِش جت.
۲۴ بله ایسُّپئے کَمان برجاه منت و
باسکی مُهر و مُهکم اَتنت،
آکوبئے زۆرمندێن هُدائے دستئے برکتا،
اِسراییلئے شپانکئے برکتا،
اِسراییلئے تَلارئے برکتا،
۲۵ تئیی پتئے هُدائے برکتا، که ترا مدتَ کنت،
پُرواکێن هُدائے برکتا، که ترا برکتَ دنت.
گۆن آسمانئے برکتان، چه بُرزا،
گۆن جُهلانکیئے برکتان، چه جَهلا و
گۆن چُکدان و گْوَرانی برکتان ترا برکتَ دنت.
۲۶ تئیی پتئے برکت
چه اَبدی کۆهانی برکتان بالاتر اَنت،
چه کوَهنێن جُمپانی نْیامَتان گێشتر اَنت.
اے سَرجما ایسُّپئے سرا بگواراتنت،
ایسُّپئے پێشانیگئے سرا
که وتی براتانی شهزادگ اِنت.
۲۷ بِنیامین دِرّۆک و وَرۆکێن گُرکے،
سُهبان شکار اێرَ بارت و
بێگاهان آوار بهرَ کنت.“
۲۸ اے اِسراییلئے دوازدهێن کَبیله اَتنت و اے هما هبر اَتنت که آیانی پتا برکت دئیگئے وهدا گۆن آیان کرتنت. هر یکّێارا هماییئے هسابا برکتی دات.
۲۹ نون آکوبا وتی چُکّ چۆ سۆج داتنت: ”من گۆن وتی مُرتگێن مردمان هئوار بئیگی آن. منا منی پت و پیرُکانی کرّا، هما گارا کبر کنێت که اِپرون هیتّیئے ڈگارا اِنت، ۳۰ هما گارا که مَکپێلَهئے ڈگارا، مَمرِهئے نزّیکّا، کَنهانئے مُلکا اِنت و اِبراهێما چه اِپرون هیتّیا گۆن ڈگارا هۆر بها زرت که کبرستانے بکنتی. ۳۱ اۆدا اِبراهێم و آییئے جَن سارَه کبر کنگ بوتگ‌اَنت، اِساک و آییئے جَن رِبِکّا کبر کنگ بوتگ‌اَنت و من لیاه هم همۆدا کبر کرتگ. ۳۲ ڈگار و آییئے تهئے گار چه هیتّیان بها زورگ بوتگ‌اَنت.“
۳۳ وهدے آکوبا وتی چُکّانی سۆج دئیگ هلاس کرت، نپادئے سرا وتی پادی تچک کرتنت، گُڈّی دَمی کشّت و گۆن وتی مُرتگێن مردمان هئوار بوت.