۱دَ سالِ چارصد و هشتادُمِ بعد از بُر شُدونِ بَنی اِسرائیل از سرزمِینِ مِصر، دَ سالِ چارُمِ پادشاهی سُلَیمان دَ بَلِه اِسرائیل، دَ ماهِ «زِیو» که ماهِ دوّمِ سال بُود، سُلَیمان آباد کدونِ خانِه خُداوند ره شُروع کد. ۲خانِه ره که سُلَیمان پادشاه بَلدِه خُداوند آباد کد، دِرازی شی شصت توغَی، بَر شی بِیست توغَی و بِلندی شی سی توغَی بُود. ۳دالیزِ پیشِ رُوی جای مُقَدَّسِ خانه رقمِ بَرِ خانه، بِیست توغَی بُود و دِرازی شی از دیوالِ پیشِ رُوی خانه دَه توغَی. ۴اُو بَلدِه خانه کِلکِینای چَوکات‌دار جور کد. ۵و دَ دیوال های دُو طرف و پُشتِ خانه منزِل ها آباد کد، یعنی دَ دیوال های دُو طرف و پُشتِ خانِه که جای مُقَدَّس و مُقَدَّستَرِین جای مَنِه شی بُود؛ و دَ امزُو منزِل ها دَور تا دَور اُتاق ها آباد کد. ۶منزِلِ اوّل شی پَنج توغَی بَر، منزِلِ دوّم شی شَش توغَی بَر و منزِلِ سِوّم شی هفت توغَی بَر دَشت؛ چُون اُو دَ دُو طرف و پُشتِ خانه تاق ها جور کد تا تِیرهای چَتِ هر منزِل دَ دیوالِ خانه دَر نَیه. ۷بَلدِه آباد کدونِ خانه از سنگای که دَ کانِ سنگ تَهیه شُدُد، اِستِفاده مُوشُد تا دَ وختِ آباد کدونِ خانه آوازِ چکُش و تیشه و دِیگه اَسبابِ آینی شِنِیده نَشُنه. ۸درگِه اُتاق های منزِلِ اوّل طرفِ جنُوبِ خانه بُود که از اُونجی زِینه ها دَ منزِلِ دُو مورفت و از منزِلِ دُو دَ منزِلِ سِه. ۹پس سُلَیمان خانه ره آباد کده دَ آخِر رَسَند و سرِ خانه ره قد تِیرها و تَخته های چیوِ سَرو پوشَند. ۱۰اُو دَ دُو طرف و پُشتِ خانه منزِل ها آباد کد که بِلندی هر منزِل پَنج توغَی بُود و قد تِیر های سَرو دَ خانه چَسپَنده شُدُد.
۱۱دَ امزُو غَیت کلامِ خُداوند دَ سُلَیمان اَمده گُفت: ۱۲”دَ بارِه امزی خانه که تُو آباد مُونی، اگه مُطابِقِ قَوانِین مه رفتار کنی، دستُورای مَره دَ جای بیری و پگِ احکام مَره نِگاه کده دَ مُطابِقِ ازوا زِندگی کنی، اوخته وعده های خُو ره که قد آتِه تُو داوُود کدُدُم بَلدِه تُو پُوره مُونُم. ۱۳و ما دَ مینکلِ بَنی اِسرائیل جای-دَ-جای مُوشُم و قَوم خُو اِسرائیل ره ایله نَمُونُم.“
۱۴پس سُلَیمان خانه ره آباد کد و دَ آخِر رَسَند. ۱۵اُو دیوال های خانه ره از مَنِه شی تَخته های سَرو گِرِفت، یعنی از قفِ خانه تا چَت شی ره از داخِل قد چیو سَرو پوشَند و دَ قفِ خانه تَخته های صَنوبَر فرش کد. ۱۶اُو از آخِرِ خانه بِیست توغَی اندازه کد و از قف شی تا چَت تَخته های سَرو گِرِفته یگ اُتاق آباد کد؛ اُو امی اُتاق ره دَ داخِلِ خانه آباد کد تا یگ جای خاص یعنی مُقَدَّستَرِین جای بَشه. ۱۷ بخشِ اوّلِ خانه، یعنی جای مُقَدَّس که پیشِ رُوی مُقَدَّستَرِین جای، بُود، چِل توغَی دِرازی دَشت. ۱۸دَ چیو های سَروِ مَنِه خانه کاڈُو ها و گُل ها کنده‌کاری شُدُد. مَنِه خانه پگ شی چیوِ سَرو بُود و هیچ سنگ دِیده نَمُوشُد. ۱۹اُو مُقَدَّستَرِین جای ره که دَ مَنِه خانه بُود آماده کد تا صندُوقِ عهدِ خُداوند ره دَ اُونجی بیله. ۲۰مُقَدَّستَرِین جای که دَ داخِل بُود، بِیست توغَی دِرازی، بِیست توغَی بَر و بِیست توغَی بِلندی دَشت؛ سُلَیمان اُو ره قد طِلّای خالِص پوشَند. اُو قُربانگاهی ره که از چیوِ سَرو بُود ام پوشَند. ۲۱اُو مَنِه خانه یعنی جای مُقَدَّس ره ام قد طِلّای خالِص پوشَند و زنجِیرای طِلّایی ره دَ پیشِ رُوی مُقَدَّستَرِین جای گِرِفت که قد طِلّا پوشَنده شُدُد. ۲۲دَ امزی رقم اُو تمامِ خانه ره قد طِلّا پوشَند تا پگِ خانه تکمِیل شُد. اُو امچُنان قُربانگاهی ره که دَ پیشِ رُوی مُقَدَّستَرِین جای بُود کامِلاً قد طِلّا پوشَند.
۲۳اُو دَ مَنِه مُقَدَّسترِین جای دُو کِرُوبی از چیوِ دِرختِ زَیتُون جور کد که هر کُدَم شی دَه توغَی قد دَشت. ۲۴یگ بالِ کِرُوبی پَنج توغَی بُود و بالِ دِیگِه شی ام پَنج توغَی؛ و از یگ نوکِ بال تا دِیگه نوکِ بال شی دَه توغَی بُود. ۲۵کِرُوبی دوّم ام دَه توغَی بُود که هر دُو کِرُوبی یگ اندازه و یگ شکل بُود. ۲۶قدِ یگ کِرُوبی دَه توغَی بُود و قدِ کِرُوبی دِیگه ام دَ امزُو اندازه. ۲۷اُو کِرُوبی ها ره دَ مَنِه خانه دَ مُقَدَّستَرِین جای ایشت؛ بال های کِرُوبی ها واز بُود، دَ اندازِه که بالِ یگ کِرُوبی دَ یگ دیوال و بالِ کِرُوبی دِیگه دَ دیوالِ دِیگه ڈَکه مُوکد و بال های دِیگِه ازوا دَ مینکلِ خانه قد یگدِیگِه خُو نوک دَ نوک بُود. ۲۸اُو کِرُوبی ها ره ام قد طِلّا پوشَند.
۲۹اُو دَ تمامِ دیوال های چارطرفِ خانه نَقش های کِرُوبی ها، دِرختونِ خُرما و گُل ها ره کنده‌کاری کد، یعنی دَ دیوال های جای مُقَدَّس و مُقَدَّستَرِین جای. ۳۰اُو قفِ خانه ره قد طِلّا پوشَند، ام جای مُقَدَّس و ام مُقَدَّستَرِین جای ره.
۳۱و بَلدِه درگِه مُقَدَّستَرِین جای پَله های درگه ره از چیوِ دِرختِ زَیتُون جور کد که تِیرِ سر و بازُو ها قد خودِ درگه برابرِ پَنجُم حِصِّه دیوال بُود. ۳۲اُو دَ بَلِه امزُو دُو پَلِه درگه که از چیوِ زَیتُون بُود، نَقش های کِرُوبی ها، دِرختونِ خُرما و گُل ها ره کنده‌کاری کد و قد طِلّا پوشَند. اَرے، اُو کِرُوبی ها و دِرختونِ خُرما ره قد طِلّای چکُشکاری شُده پوشَند. ۳۳اُو امچُنان بَلدِه درگِه جای مُقَدَّس بازُو های درگه ره از چیوِ دِرختِ زَیتُون جور کد که قد خودِ درگه برابرِ چارُم حِصِّه دیوال بُود. ۳۴و دُو پَلِه امزی درگه از چیوِ دِرختِ صَنوبَر بُود، دُو تَختِه پَلِه اوّلی ام قت مُوشُد و دُو تَختِه پَلِه دوّمی ام قت مُوشُد. ۳۵دَ بَلِه ازوا نَقش های کِرُوبی ها، دِرختونِ خُرما و گُل ها ره کنده‌کاری کد و اُونا ره قد طِلّای چکُشکاری شُده که دَ اندازِه ازوا جور کدُد پوشَند. ۳۶اُو حَولی داخِلی ره قد سِه قطار سنگای تَراش شُده و یگ قطار تِیرهای دِرختِ سَرو آباد کد.
۳۷تادَوِ خانِه خُداوند دَ ماهِ «زِیو» دَ سالِ چارُمِ پادشاهی سُلَیمان ایشته شُد ۳۸و دَ سالِ یازدَھُم دَ ماهِ «بُول» که ماهِ هشتُم بُود، خانه از تمامِ لِحاظ دَ مُطابِقِ مُشَخَصات خُو تکمِیل شُد. پس سُلَیمان اُو ره دَ دَورونِ هفت سال آباد کد.