کِتابِ اِستِر

فصلِ دَهُم

۱خشایارشاه دَ بَلِه سرزمِین خُو دَ شُمُولِ باشِنده‌های ساحِل‌های دریا جَزیه قرار دَد. ۲تمامِ کارای پُرقُدرت و قَوی خشایارشاه و بیانِ عظَمَتِ موردِخای که چِطور پادشاه اُو ره بُزُرگ جور کد، دَ کِتابِ تَوارِیخِ پادشایونِ ماد و فارس نوِشته یَه. ۳موردِخای یهُودی بعد از خشایارشاه نفرِ دوّمِ مَملَکَت بُود. اُو دَ مینکلِ یهُودیا یگ مَردِ بُزُرگ بُود و بِرارونِ یهُودی شی که تِعداد ازوا غَدر کَلو بُود اُو ره دوست دَشت، چراکه اُو خُوبی قَوم خُو ره طلب مُوکد و دَ خَیرِ تمامِ نسل خُو توره مُوگُفت.