۱سارای خاتُونِ اَبرام، دَزشی اَولاد نَکد. اُو یگ کنِیزِ مِصری دَ نامِ هاجر دَشت. ۲و سارای دَ اَبرام گُفت: ”خُداوند از پَیدا کدونِ اَولاد مَره محرُوم کده. پس تُو قد کنِیز مه یگجای شُو تا شاید دَ وسِیلِه ازُو صاحِبِ اَولاد شُنُم.“ و اَبرام تورِه سارای ره قبُول کد. ۳پس سارای خاتُونِ اَبرام کنِیز خُو هاجرِ مِصری ره گِرِفته دَ شُوی خُو اَبرام دَد که اُو ره خاتُو کنه و اِی واقِعه بعد از دَه سال بُود-و-باشِ اَبرام دَ سرزمِینِ کِنعان رُخ دَد. ۴و اَبرام قد هاجر خاو کد و اُو حامِله شُد. هاجر وختی دِید که حامِله شُده، اُو بی‌بی خُو ره تَوهِین-و-تحقِیر کد.
۵و سارای دَ اَبرام گُفت: ”ظُلمی که دَ حقِ ازمه شُده دَ گردونِ ازتُو یَه. مه کنِیز خُو ره دَ بَغل تُو اَندختُم، مگم وختی اُو دِید که حامِله اَسته، مَره تَوهِین-و-تحقِیر کد. خُداوند خود شی دَ بَینِ ازمه و ازتُو قضاوَت کُنه.“ ۶اَبرام دَ سارای گُفت: ”کنِیز تُو دَ دِستِ خود تُو یَه؛ هر رقم که خوش دَری قد شی بُکُو.“ پس سارای قد هاجر سرِ بَد رفتاری ره گِرِفت و اُو از پیش شی دُوتا کد.
۷و ملایکِه خُداوند دَ هاجر دَ نزدِیکِ یگ چشمه که دَ سرِ راهِ منطقِه شُور بُود، ظاهِر شُد ۸و گُفت: ”اَی هاجر، کنِیزِ سارای! از کُجا اَمَدے و دَ کُجا موری؟“ اُو گُفت: ”ما از پیشِ بی‌بی خُو سارای دُوتا کدیم.“ ۹اوخته ملایکِه خُداوند دَزُو گُفت: ”پیشِ آغِه خُو پس بورُو و خود ره دَ دِستِ ازُو تسلِیم کُو.“ ۱۰ملایکِه خُداوند اِدامه دَده دَزُو گُفت: ”ما نسل تُو ره غَدر کَلو مُونُم، دَ اندازِه که از کَلونی، کس حِساب نَتَنه.“ ۱۱امچُنان ملایکِه خُداوند دَزُو گُفت: ”اینه، تُو حامِله اَستی و یگ باچه مِیزَیی؛ نامِ ازُو ره اِسماعیل بیل چراکه خُداوند آه-و-نالِه مظلُومانِه تُو ره شِنِیده. ۱۲اُو یگ آدم جور مُوشه که رقمِ خَرِ وَحشی رفتار مُونه و دِست شی دَ جاغِه هر کس اَسته و دِستِ هر کس دَ جاغِه ازُو؛ و اُو قد بِرارای خُو جاغه دَ جاغه زِندگی مُونه.“ ۱۳و هاجر خُداوند ره که قد شی گپ زَدُد، دَمزی نام کُوی کد: «تُو خُدای اَستی که مِینگری،» و قد خود خُو گُفت: ”آیا اُو که مَره مِینگره، ما ام اُو ره دِیدیم؟“ ۱۴امزی خاطر امُو چاه «بِئیر-لاحَی-روئی» گُفته مُوشُد؛ امُو چاه دَ بَین قادِش و بارِد اَسته. ۱۵پس هاجر دَ اَبرام یگ باچه دَ دُنیا اَوُرد و اَبرام باچِه خُو ره که هاجر زَیید، اِسماعیل نام ایشت. ۱۶اَبرام هشتاد و شَش ساله بُود که هاجر اِسماعیل ره بَلدِه شی دَ دُنیا اَوُرد.