۱وختی یوشِع پِیر و سالخورده شُد، خُداوند دَزُو گُفت: ”تُو پِیر و سالخورده شُدے و ھنوز زمِینِ کَلو باقی مَنده که باید تَصَرُف شُنه؛ ۲زمِینی که باقی مَنده اینی اَسته: پگِ سرزمِینِ فَلَسطِینیا و جِشُوریا ۳از شِیحور که دَ شرقِ مِصر اَسته تا سرحدِ عِقرون طرفِ شمال که از جُملِه سرزمِینِ کِنعانیا حِساب مُوشه؛ یعنی سرزمِینِ پَنج حُکمرانِ فَلَسطِینیا که دَ بَلِه غَزه، اَشدود، اَشقِلون، جَت، عِقرون و عَوّه حُکمرانی مُونه؛ ۴دَ جنُوب تمامِ سرزمِینِ کِنعانیا و میعاره که دَ صَیدونیا تعلُق دَره تا اَفیق و تا سرحدِ اَموریا؛ ۵سرزمِینِ جِبَلیا و پگِ لِبنان سُون شَرق، از بَعل‌جاد که دَ دامونِ کوهِ حِرمون اَسته تا لِبوحمات؛ ۶پگِ باشِنده های کوھِستو از لِبنان تا مِسرِفوت‌مایم یعنی پگِ صَیدونیا. ما خود مه اُونا ره از پیشِ رُوی بَنی اِسرائیل هَی مُونُم؛ تُو تنها امُو سرزمی ره دَ وسِیلِه پِشک دَ عنوانِ مُلکیَت بَلدِه بَنی اِسرائیل تقسِیم کُو، امُو رقم که دَز تُو اَمر کدیم. ۷پس آلی امُو سرزمی ره بَلدِه نُه طایفه و نِیم طایفِه مَنَسّی دَ عِنوانِ مُلکیَت تقسِیم کُو.“
۸رئوبینیا و جادیا قد دِیگه نِیمِ طایفِه مَنَسّی، مُلک خُو ره که مُوسیٰ دَ اُو طرفِ دریای اُردُن سُون شَرق دَزوا دَدُد، گِرِفت، امُو رقم که مُوسیٰ خِدمتگارِ خُداوند دَزوا تقسِیم کدُد. ۹ اُو عَروعیر ره که دَ بَغلِ درِّه اَرنون اَسته و شاری ره که دَ مَنِه دَرّه قرار دَره و پگِ دَشتِ میدِبا ره تا دِیبون، ۱۰و پگِ شارای سِیحون پادشاهِ اَموریا ره که دَ حِشبون تا سرحدِ عمونیا حُکمرانی مُوکد، ۱۱و جِلعاد و سرزمِینِ جِشُوریا، مَعکیا، پگِ کوهِ حِرمون و تمامِ باشان ره تا سَلِخه، ۱۲و تمامِ سرزمِینِ عوج پادشاهِ باشان ره که دَ عَشتاروت و اِدرَعی حُکمرانی مُوکد، دَزوا دَد؛ عوج از جَمِ باقی‌مَنده های رِفائیا بُود. اَمیا ره مُوسیٰ شِکست دَده امزُو سرزمی هَی کد. ۱۳مگم بَنی اِسرائیل جِشُوریا و مَعکیا ره هَی نَکد؛ پس مردُمِ جِشُور و مَعکه تا اِمروز دَ مینکلِ اِسرائیل زِندگی مُونه.
۱۴لیکِن دَ طایفِه لاوی مُوسیٰ هیچ مُلک نَدَد، چراکه هدیه های خاصِ خُداوند، خُدای اِسرائیل تقسِیمِ ازوا اَسته، امُو رقم که خُداوند دَزوا گُفت.
۱۵مُوسیٰ دَ طایفِه اَولادِه رئوبین دَ مُطابِقِ اَولادِ بابه های ازوا زمی دَد. ۱۶مُلکِ ازوا از عَروعیر که دَ بَغلِ دَرِّه اَرنون اَسته شُروع مُوشُد تا شاری که دَ مَنِه دَرّه اَسته تا اَواری پالُوی میدِبا، ۱۷حِشبون و پگِ شارای گِرد-و-بَر شی که دَ اَواری اَسته، یعنی دِیبون، باموت بَعل، بَیت بَعل مِعون، ۱۸یَھصه، قِدیموت، میفاعت، ۱۹قِریَتایم، سِبمه، صِرِت-شَحَر که دَ بَلِه تِپِه دَرّه اَسته، ۲۰بَیت فِغور، پَیدَمونِ پیسگه و بَیت یشِیموت اِدامه دَشت، ۲۱یعنی پگِ شارای اَواری و تمامِ مَملَکَتِ سِیحون پادشاهِ اَموریا که دَ حِشبون حُکمرانی مُوکد، دَزوا تعلُق مِیگِرِفت. مُوسیٰ سِیحون و رهبرای مِدیان، یعنی اِوی، راقَم، صُور، حور و رِبَع ره که مِیر های سِیحون بُود و دَ امزُو سرزمی زِندگی مُوکد، شِکَست دَد. ۲۲بَنی اِسرائیل بِلعام باچِه بِعور ره که پالگری مُوکد ام قد شمشیر کُشت؛ اَرے، اُو ام دَ جمِ کُشته شُده ها بُود. ۲۳سرحدِ اَولادِه رئوبین دریای اُردُن و بغلای شی بُود. اِی مُلکِ اَولادِه رئوبین دَ مُطابِقِ اَولادِ بابه های ازوا بُود قد شارا و آغِیلای شی.
۲۴مُوسیٰ دَ طایفِه جاد، یعنی دَ اَولادِه جاد دَ مُطابِقِ اَولادِ بابه های ازوا زمی دَد. ۲۵و مُلکِ ازوا یَعزیر و تمامِ شارای جِلعاد و نِیمِ سرزمِینِ عمونیا بُود و تا عَروعیر که رُوی دَ رُوی رَبه اَسته اِدامه دَشت؛ ۲۶امچُنان از حِشبون تا رامَت-مِصفه و بِطونِیم؛ و از مَحَنایِیم تا سرحدِ دبِیر ۲۷و دَ مَنِه دَرّه بَیت ھارام، بَیت نِمره، سُکوت و صافون و باقی مَملَکَتِ سِیحون پادشاهِ حِشبون و دریاچِه اُردُن و بغلای شی تا آخِرِ دریای کِنِرِت اُو طرفِ دریای اُردُن سُون شَرق. ۲۸اینَمی مُلکِ اَولادِه جاد دَ مُطابِقِ اَولادِ بابه های ازوا بُود قد شارا و آغِیلای شی.
۲۹مُوسیٰ دَ نِیمِ طایفِه مَنَسّی ام زمی دَد که دَ نِیمِ طایفِه مَنَسّی دَ مُطابِقِ اَولادِ بابه های ازوا تعلُق گِرِفت. ۳۰مُلکِ ازوا از مَحَنایِیم شُروع مُوشُد و پگِ باشان، یعنی تمامِ مَملَکَتِ عوج پادشاهِ باشان و تمامِ آغِیلای یائیر که دَ باشان بُود، جُمله شصت شار ۳۱و نِیمِ جِلعاد و عَشتاروت و اِدرَعی که شارای مَملَکَتِ عوج دَ باشان بُود دَزوا تعلُق مِیگِرِفت؛ اَمیا دَ اَولادِه ماخِیر باچِه مَنَسّی یعنی دَ نِیمِ اَولادِه ماخِیر دَ مُطابِقِ اَولادِ بابه های ازوا تحوِیل دَده شُد.
۳۲اینَمیا زمِینی بُود که مُوسیٰ دَ دَشت های موآب دَ اُو طرفِ دریای اُردُن دَ شَرقِ اَریحا دَ عِنوانِ مُلکیَت تقسِیم کد. ۳۳مگم دَ طایفِه لاوی مُوسیٰ هیچ مُلک-و-زمی نَدَد، چراکه حقِ خُداوند، خُدای اِسرائیل تقسِیمِ ازوا اَسته، امُو رقم که دَزوا گُفت.