۱رهبرای خانَوارِ بابه‌کَلونا، یعنی کٹه‌کَلونای اَولادِ بابِه جِلعاد باچِه ماخِیر نوسِه مَنَسّی که از اَولادِ بابه های یوسُف بُود، پیش اَمَد و دَ حُضُورِ مُوسیٰ و دَ حُضُورِ رهبرا یعنی کٹه‌کَلونای اَولادِ بابه های بَنی اِسرائیل عرض کده ۲گُفت: ”خُداوند دَ بادار مو اَمر کد که زمی ره دَ وسِیلِه پِشک تقسِیم کده دَ بَنی اِسرائیل بِدیه؛ و امچُنان دَ بَلِه بادار مو از طرفِ خُداوند اَمر شُد که تقسِیمِ بِرار مو صِلُفِحاد ره دَ دُخترون شی بِدیه. ۳پس اگه اُونا قد باچه های طایفه های دِیگه توی کُنه، اوخته تقسِیمِ ازوا از مُلکِ بابه‌کَلونای مو گِرِفته مُوشه و دَ مُلکِ طایفِه اِضافه مُوشه که اُونا دَ اُونجی توی مُونه؛ دَمزی رقم از تقسِیمِ میراثِ ازمو گِرِفته مُوشه. ۴وختِیکه سالِ جشنِ بَنی اِسرائیل بِرَسه، تقسِیمِ ازوا دَ مُلکِ طایفِه اِضافه مُوشه که اُونا دَ اُونجی توی مُونه و تقسِیمِ ازوا بَلدِه همیشه از مُلکِ طایفِه بابه‌کَلونای مو گِرِفته مُوشه.“
۵پس مُوسیٰ دَ بَنی اِسرائیل مُطابِقِ تورِه خُداوند اَمر کده گُفت: ”طایفِه اَولادِه یوسُف راست مُوگیه. ۶اینَمی چِیزی اَسته که خُداوند دَ بارِه دُخترونِ صِلُفِحاد اَمر کده: اُونا قد هر کسی که دَ نظرِ ازوا خوش خورد توی کُنه، مگم تنها باید دَ مَنِه اَولادِ بابِه طایفِه آتِه خُو توی کُنه ۷تا هیچ میراثِ بَنی اِسرائیل از یگ طایفه دَ طایفِه دِیگه مُنتَقِل نَشُنه، بَلکِه بَنی اِسرائیل هر کُدَم شی باید میراثِ طایفِه بابه‌کَلونای خُو ره نِگاه کُنه. ۸هر دُخترِ که دَ یکی از طایفه های بَنی اِسرائیل صاحِبِ میراث اَسته باید قد یگ نفر که از اَولادِ بابِه طایفِه آتِه شی اَسته توی کُنه تا بَنی اِسرائیل هر کُدَم شی صاحِبِ میراثِ بابه‌کَلونای خود خُو بَشه. ۹هیچ مُلک از یگ طایفه دَ طایفِه دِیگه دَده نَشُنه، بَلکِه هر طایفِه بَنی اِسرائیل میراثِ خود خُو ره نِگاه کُنه.“
۱۰پس امُو رقم که خُداوند دَ مُوسیٰ اَمر کدُد، دُخترونِ صِلُفِحاد امُو رقم کد؛ ۱۱و مَحله، تِرصه، حُجله، مِلکه و نوعَه دُخترونِ صِلُفِحاد قد باچه های کاکا های خُو توی کد. ۱۲اُونا دَ مَنِه اَولادِ بابه های اَولادِه مَنَسّی باچِه یوسُف توی کد و میراثِ ازوا دَ طایفِه اَولادِ بابِه آتِه ازوا باقی مَند.
۱۳اینَمیا احکام و دستُورای بُود که خُداوند دَ وسِیلِه مُوسیٰ دَ دَشت های موآب دَ نزدِیکِ دریای اُردُن رُوی دَ رُوی شارِ اَریحا دَ بَنی اِسرائیل اَمر کد.