۱حمد-و-ثنا دَ خُداوند!
بَلدِه خُداوند سرُودِ نَو بِخانِید،
حمد-و-ثناءِ ازُو ره دَ مینکلِ جماعتِ مومنِین شی بُگِید.
۲بیلِید که اِسرائیل دَ حُضُورِ خالِق خُو خوشی کنه،
و باشِنده های صَھیون دَ حُضُورِ پادشاهِ خُو خوشحال بَشه.
۳بیلِید که رَقص و بازی کده نامِ ازُو ره سِتایش کنه
و قد دَیره و بَربط بَلدِه ازُو سرُود بِخانه،
۴چراکه خُداوند از قَوم خُو راضی اَسته؛
اُو آدمای سِتَمدِیده ره قد تاجِ نِجات آرایش مُونه.
۵بیلِید که مومنِین دَ امزی اِفتخار خوشی کنه
و دَ بَلِه جاگه های خُو قد خوشی سرُود بِخانه.
۶بیلِید که سِتایشِ خُدا دَ دانِ ازوا
و شمشیرِ دُودَم دَ دِستای ازوا بَشه
۷تا از مِلَّت ها اِنتِقام بِگِیره،
و قَوم ها ره دَ جَزای شی بِرسَنه،
۸تا پادشایونِ ازوا ره دَ زنجِیر بسته کنه
و کٹه‌کَلونای ازوا ره قد زَولانه های آینی،
۹تا حُکمِ نوِشته شُده ره دَ بَلِه ازوا اِجرا کنه.
اِی بَلدِه پگِ مومنِینِ ازُو یگ اِفتخار اَسته.
حمد-و-ثنا دَ خُداوند!