۱اوخته دِیدُم که جانوَرِ وَحشی از دریا بُر مُوشه. اُو دَه شاخ و هفت سر دَشت که دَ بَلِه شاخای شی دَه تاج بُود و دَ بَلِه سر های شی نام های کُفرآمیز نوِشته شُدُد. ۲امُو جانوَرِ وَحشی ره که دِیدُم رقمِ پلَنگ بُود و پایای شی رقمِ پایای خِرس و دان شی رقمِ دانِ شیر. اَژدار قُدرت و تَخت و اِختیاراتِ کَلون خُو ره دَزُو دَد. ۳یکی از سر های ازُو رقمی معلُوم مُوشُد که زَخمِ کُشِنده خورده بَشه، ولے امُو زَخمِ کُشِندِه شی جور شُدُد. تمامِ دُنیا حَیرو مَندُد و از پُشتِ امزُو جانوَرِ وَحشی مورفت. ۴مردُم امُو اَژدار ره که اِختیارات خُو ره دَ جانوَرِ وَحشی دَده بُود پرَستِش کد و اُونا امُو جانوَرِ وَحشی ره ام پرَستِش کد و گُفت: ”کِی مِثلِ امزی جانوَرِ وَحشی اَسته؟ کِی مِیتَنه دَ ضِدِ ازی جنگ کُنه؟“ ۵بَلدِه ازُو یگ دان دَده شُد که توره های پُرکِبر و کُفرآمیز بُگیه و بَلدِه ازُو اِجازه دَده شُد که مُدَتِ چِل و دُو ماه از اِختیارات خُو اِستِفاده کُنه. ۶اُو دان خُو ره دَ کُفرگویی واز کد تا دَ ضِدِ خُدا، نام شی، جایگاهِ شی و تمامِ مَوجُوداتِ که دَ عالمِ باله اَسته کُفر بُگیه. ۷بَلدِه ازُو اِجازه دَده شُد که قد مُقَدَّسِین جنگ کُنه و دَ بَلِه ازوا زور شُنه و بَلدِه ازُو دَ بَلِه هر طایفه و قَوم و زِبو و مِلَّت اِختیار دَده شُد. ۸و ما دِیدُم که تمامِ باشِنده های رُوی زمی امُو جانوَرِ وَحشی ره پرَستِش مُونه، تمامِ کسای که نامِ ازوا دَ شُروعِ پَیدایشِ عالم دَ کِتابِ حَیاتِ باره نوِشته نَشُده، یعنی دَ کِتابِ حَیاتِ بارِه که حلال شُد. ۹هر کس که گوشِ شِنَوا دَره، گوش بِگِیره:
۱۰اگه قرار بَشه که کُدَم کس دَ اسِیری بوره،
اُو دَ اسِیری موره؛
اگه قرار بَشه که کُدَم کس قد شمشیر کُشته شُنه،
اُو قد شمشیر کُشته مُوشه.
امِینجی صَبر-و-حَوصِله و ایمانِ مُقَدَّسِین دَ کار اَسته.
۱۱اوخته یگ جانوَرِ وَحشی دِیگه ره دِیدُم که از زمی بُر مُوشه. اُو رقم باره اَلّی دُو شاخ دَشت و رقمِ اَژدار توره مُوگُفت. ۱۲اُو تمامِ اِختیاراتِ جانوَرِ وَحشی اوّل ره دَ حُضُور شی دَ کار مُوبُرد و زمی و باشِنده های شی ره وادار مُوکد که جانوَرِ وَحشی اوّل ره پرَستِش کُنه، امُو ره که زَخمِ کُشِندِه شی جور شُدُد. ۱۳اُو مُعجزه های بُزُرگ نِشو مِیدَد، حتیٰ دَ پیشِ نظرِ مردُم آتِش ره از آسمو دَ زمی بارَند. ۱۴اُو باشِنده های رُوی زمی ره دَ وسِیلِه مُعجزه های گُمراه کد که بَلدِه ازُو اِجازه دَده شُد تا دَ حُضُورِ جانوَرِ وَحشی اوّل نِشو بِدیه. اُو امی کار ره کده دَزوا گُفت که یگ مُجَسمه جور کُنه، مُجَسمِه امزُو جانوَرِ وَحشی ره که دَ وسِیلِه شمشیر زخمی شُدُد، ولے هنوز زِنده بُود. ۱۵دَ جانوَرِ دوّم اِجازه دَده شُد که دَ مُجَسمِه جانوَرِ وَحشی دَم بِدیه تا مُجَسمِه امزُو جانوَر توره بُگیه و تمامِ کسای ره که مُجَسمِه جانوَرِ وَحشی اوّل ره پرَستِش نَمُوکد، بُکُشه. ۱۶امچُنان اُو پگ ره وادار کد، ریزه و کٹه، دَولتمَند و غرِیب، غُلام و آزاد ره که دَ بَلِه دِستِ راست یا دَ پیشانِه ازوا نشان ایشته شُنه ۱۷تا هیچ کس نَتَنه که خرِید و فروش کُنه، بغَیر از کسای که نشان دَره، یعنی نام یا عَدَدِ نامِ امزُو جانوَرِ وَحشی ره دَره.
۱۸دَ اِینجی حِکمت دَ کار اَسته: هر کس که دانایی-و-بِینایی دَره، عَدَدِ جانوَرِ وَحشی ره حِساب کُنه، چُون اِی عَدَدِ یگ آدم اَسته و عَدَدِ شی شَش صد و شصت و شَش اَسته.