۱ داود یوځل بیا د اسراییلو غوره شوي عسکر راټول کړل، چې شمېر یې دېرش زره تنه وو. ۲ داود او هغه ټول کسان چې د هغوی سره وو د یهودا د ښار بعله ته لاړل، د دې دپاره چې د خدای د لوظ صندوق چې د مطلق قادر څښتن نوم ورباندې دی، راوړي - هغه څښتن چې تخت یې د اسماني مخلوقاتو د مجسمو دپاسه دی. ۳ هغوی د خدای د لوظ صندوق د غویانو په یوې نوې ګاډۍ کې کېښود او هغه یې د ابیناداب د کور څخه چې په غونډۍ باندې ؤ، راوړ. د ابیناداب زامنو عزه او اخیو د ګاډۍ د لارښوونې دپاره د هغې سره تلل ۴ او اخیو د ګاډۍ په مخکې روان ؤ. ۵ داود او نورو ټولو اسراییلیانو په خپل ټول توان سره څښتن ته د درناوي په خاطر نڅا ګانې کولې او سندرې یې ویلې. هغوی ربابونه، چنګونه، چمبې او شرنګېدونکی زنګ غږول.
۶ څنګه چې دوی د ناکون درمند ځای ته ورسېدل، غویان وښویېدل او عزه خپل لاس وراوږد کړ او د لوظ صندوق یې ونیوه. ۷ څښتن په عزه باندې د هغه د بې پروایۍ په خاطر ډېر په قهر شو. د دې ګناه له امله خدای هغه وواژه او هغه د خدای د لوظ د صندوق په څنګ کې مړ شو. ۸ نو داود په قهر شو، ځکه چې څښتن په قهر سره عزه ته سزا ورکړه او تر نن ورځې پورې هغه ځای د فارز عزه په نوم یادیږي. ۹ په هغه ورځ داود د څښتن څخه ډېر ووېرېده او ویې ویل: «اوس به څنګه وکولای شم چې د څښتن د لوظ صندوق د ځان سره یوسم؟» ۱۰ نو هغه ونه غوښتل چې صندوق د ځان سره د داود ښار ته یوسي. نو هغه خپله اصلي لاره پرېښودله او د هغې په ځای یې صندوق د عوبید ادوم جتي کور ته یووړ. ۱۱ د څښتن د لوظ صندوق درې میاشتې هلته پاتې شو او څښتن عوبید ادوم او د هغه ټولې کورنۍ ته برکت ورکړ.
۱۲ داود پاچا خبر شو چې څښتن عوبید ادوم، د هغه کورنۍ او شتمنۍ ته چې هغه درلودله د خدای د لوظ د صندوق په خاطر برکت ورکړ. نو هغه د لوظ صندوق د عوبید ادوم د کور څخه واخیست چې د یو لوی جشن په نیولو سره یې اورشلیم ته یوسي. ۱۳ کله چې هغو کسانو چې د څښتن د لوظ صندوق یې وړلو، شپږ قدمونه واخیستل، داود یو غویی او یو چاغ خوسی قرباني کړل. ۱۴ داود د کتان پېشبند اغوستی ؤ او په خپل ټول توان سره یې څښتن ته د درناوي په خاطر نڅا کوله. ۱۵ نو داود او ټولو اسراییلیانو د خوشحالۍ په چیغو او د سرنیو په اواز سره د څښتن د لوظ صندوق اورشلیم ته راوړ.
۱۶ کله چې صندوق د داود ښار ته راوړل شو، د شاوول لور میکال له کړکۍ څخه وکتل او ویې لیدل چې داود پاچا د څښتن په مخکې ټوپونه وهي او نڅا کوي، نو هغه یې په خپل زړه کې سپک وګاڼه. ۱۷ هغوی د څښتن د لوظ صندوق راوړ او هغه یې په خپل ځای باندې په خېمه کې کېښود چې داود د هغه دپاره ودرولې وه. بیا داود څښتن ته سوځېدونکې او د سلامتۍ نذرانې وړاندې کړې. ۱۸ کله چې داود د نذرانو د وړاندې کولو څخه وزګار شو، هغه د خلکو دپاره د مطلق قادر څښتن په نوم برکت وغوښت. ۱۹ هغه د اسراییلو ټول ولس، هم سړیو او هم ښځو، هر یو ته، یوه ډوډۍ، یوه ټوټه غوښه او د ممیزو یوه کلچه ووېشله. بیا ټول خلک خپلو کورونو ته لاړل.
۲۰ کله چې داود خپل کور ته راستون شو چې د خپلې کورنۍ دپاره برکت وغواړي، د هغه ښځه میکال د شاوول لور د هغه مخې ته ورووتله او ورته ویې ویل: «د اسراییلو پاچا نن خپل نوم لوړ کړ او د خپلو خدمتګارانو د وینځو په نظر کې یې خپل ځان لکه د یو کم عقل په شان لوڅ کړ.» ۲۱ داود ځواب ورکړ: «ما څښتن ته د درناوي په خاطر نڅا کوله، چې زه یې ستا د پلار او د هغه د ټولې کورنۍ په ځای غوره کړی یم او زه یې د خپل قوم اسراییلو مشر جوړ کړی یم. او زه به په راتلونکې کې هم د څښتن په مخکې خوشحالي کوم. ۲۲ زه به خپل ځان د دې څخه نور هم رسوا کړم. ښایي ستا باور به دا وي چې زه هېڅ هم نه یم، خو د دې وینځو په خیال کې زه به د قدر وړ اوسم!»
۲۳ نو د مرګ تر ورځې پورې د شاوول د لور میکال اولاد پیدا نه شو.