۱ زمونږ د جلاوطنۍ د دولسم کال د دولسمې میاشتې په لومړۍ ورځ څښتن ماته وویل: ۲ «ای فاني انسانه، د مصر د پاچا فرعون دپاره د وېر سندره ووایه. هغه ته زما له خوا دا پیغام ورسوه:
‹نورو قومونو منځ کې
ګڼې خپل ځان لکه زمري په شان
خو په رښتیا یې د بحیرې د بلا په شان
ته اوبه شړپوې خپلو سیندونو کې
ته اوبه خړوې په خپلو پښو باندې
او چټلوې سیندونه
۳ څښتن تعالی داسې وایي:
زه به په تا باندې خپل جال کړم خپور
د ډېرو قومونو په مرسته
به دې غاړې ته راکاږم
۴ تا به وغورځوم ځمکه باندې
تا به ګوزار کړم په میدان باندې
زه به راوړم ټول مرغان د نړۍ چې کښېني تا باندې
حیوانات به راوغواړم زه چې ماړه شي په تا باندې
۵ زه به په غرونو کې خپره کړمه ستا غوښه
زه به ډکې کړم درې ستا په هډوکو باندې
۶ تر غرونو پورې به لمده کړم ځمکه
ستا په وینو باندې
شي به ډکې درې ورباندې
۷ کله چې مړه کړم ستا د ژوند شمع
زه به پټ کړم اسمانونه
پټ به کړم ستوري په تیاره کې
لمر به پټ کړمه په ورېځو کې
سپوږمۍ به نه کوي رڼا
۸ زه به ټولې رڼاګانې د اسمان کړم تیاره
راولم به ستا وطن باندې تیاره
ما څښتن تعالی داسې ویلي دي.
۹ کله چې زه ستاسو د بربادۍ خبر په هغو وطنونو کې چې تاسو یې نه پېژنئ، خپور کړم، نو د ډېرو قومونو د خلکو زړونه به خفه شي. ۱۰ کوم کار چې زه به یې ستا سره کوم په هغه باندې به ډېر قومونه ولړزیږي. کله چې زه خپله توره وخوځوم، نو پاچاهان به له وېرې ورپیږي. په کومه ورځ چې ته سقوط وکړې، نو هغوی ټول به د خپل ژوند په خاطر له وېرې لړزیږي.›
۱۱ څښتن تعالی د مصر پاچا ته داسې وایي: ‹ته به د بابل پاچا د تورې سره مخامخ شې. ۱۲ زه به د ډېر ظالم قوم غښتلي عسکر ولېږم چې په تا باندې حمله وکړي. بيا به ستا ډېر خلک په جنګ کې ووژل شي.
له منځه به یوسي هغوی غرور د مصر
له منځه به لاړ شي ټول خلک د مصر
۱۳ زه به حلالې کړم ستا ټولې پادې
چې څریږي د ویالو په غاړه
هلته به نه وي نور انسان یا حیوان
چې کړي چټلې اوبه
۱۴ هو، زه به کړم صافې ستا اوبه
ستا سیندونه به روان کړم ارام
ما څښتن تعالی داسې ویلي دي.
۱۵ کله چې زه کړم مصر وران او ویجاړ
او ټولو شیانو نه یې کړمه خالي
کله چې ووژنم ټول اوسېدونکي یې
نو شي به پوه هغوی چې زه څښتن یم›
۱۶ پورته سندره به د ویر د یوې سندرې په توګه وویلی شي. د ټولو قومونو ښځې به د ویر دا سندره په مصر او د هغه په ټولو اوسېدونکو باندې د ویر کولو په وخت کې ووایي. ما څښتن تعالی داسې ویلي دي.»
۱۷ زمونږ د جلاوطنۍ د دولسم کال د دولسمې میاشتې په پنځلسمه ورځ څښتن ماته وویل: ۱۸ «ای فاني انسانه، د مصر د ټولو خلکو په خاطر ویر وکړه. هغوی د دنیا د نورو قوي قومونو سره د ځمکې لاندې د مړو دنیا ته ولېږه.
۱۹ هغوی ته ووایه:
‹تاسو فکر کوئ چې زیات ښایسته یئ
د نورو څخه؟
تاسو به لاړ شئ د مړو دنیا ته
یئ به پراته بې دینه خلکو سره›
۲۰ د مصر خلک به د هغو خلکو په شان له منځه لاړ شي چې په جنګ کې وژل شوي دي. د هغوی د ټولو د وژلو دپاره توره تیاره ده. د مصر ډېر خلک به د وژنې دپاره بوتلل شي. ۲۱ غښتلي جنګیالي به د مړو له دنیا څخه د مصریانو او د هغوی د ملاتړو په اړه ووایي: ‹هغه بېدینه خلک چې په جنګ کې وژل شوي دي، هغوی راغلي دي او دلته پراته دي!›
۲۲ آشور هلته دی او شاوخوا ته یې د خپلو هغو عسکرو قبرونه دي چې په جنګ کې وژل شوي دي ۲۳ او د هغوی قبرونه د مړو د دنیا په ډېره ژوره کنده کې پراته دي. د هغه ټول عسکر په جنګ کې وژل شوي دي او د هغوی قبرونه د ده د قبر شاوخوا پراته دي. کله چې هغوی ژوندي وو، نو هغوی به خلک سخت وېرول.
۲۴ عیلام هم هلته دی او د هغه ټول عسکر د هغه د قبر شاوخوا پراته دي. هغوی ټول په جنګ کې وژل شوي وو او د مړو دنیا ته بېدینه لاړل. کله چې هغوی ژوندي وو، نو هغوی به نور قومونه سخت وېرول، خو اوس هغوی د هغو خلکو په شان چې د هغوی څخه مخکې مړه شوي وو، مړه او شرمېدلي پراته دي. ۲۵ عیلام د هغو خلکو په منځ کې پروت دی چې په جنګ کې وژل شوي دي او شاوخوا ته یې د خپلو عسکرو قبرونه دي. هغوی ټول بېدینه وو او په جنګ کې وژل شوي وو. کله چې هغوی ژوندي وو، نو هغوی به په خلکو کې وېره خپروله، خو اوس هغوی مړه او شرمېدلي پراته دي او د هغو خلکو په سرنوشت باندې اخته دي چې په جنګ کې وژل شوي دي.
۲۶ د ماشک او توبال د عسکرو قبرونه هم هلته دي. هغوی ټول بېدینه وو او په جنګ کې وژل شوي وو، ځکه کله چې هغوی ژوندي وو، نو هغوی به خلک سخت وېرول. ۲۷ هغوی د پخوا زمانې د جنګیالیو په شان په قدر او عزت نه وو ښخ شوي. هغه جنګیالي د خپلو وسلو سره د مړو دنیا ته لاړل. د هغوی تورې د هغوی د سرونو لاندې ایښې وې او سپرونه یې په مړو باندې پراته وو. کله چې دا جنګیالي ژوندي وو، نو هغوی به خلک سخت وېرول. ۲۸ نو تاسو مصریان به د هغو بېدینه خلکو په منځ کې ټوټې ټوټې پراته یئ، کوم چې په جنګ کې وژل شوي دي.
۲۹ د ادوم د پاچاهانو او نورو ټولو واکمنانو قبرونه هم هلته دي. هغوی قوي عسکر وو، خو اوس هغوی د هغو بېدینه خلکو سره چې په جنګ کې وژل شوي وو، د مړو په دنیا کې پراته دي.
۳۰ د شمال د ټولو مشرانو او د صیدونیانو قبرونه هم هلته دي. د هغوی زور به په یو وخت کې د خلکو د سختې وېرې سبب کېده، خو اوس هغوی په شرم او رسوایۍ سره د هغو خلکو سره چې په جنګ کې وژل شوي دي، د مړو دنیا ته لاړل او بېدینه پراته دي. هغوی د هغو خلکو سره په شرم او رسوایۍ کې شریک شول چې د مړو دنیا ته تللي دي.
۳۱ څښتن تعالی داسې وایي: ‹کله چې فرعون او د هغه لښکر هغوی وویني، نو هغوی ته به دا تسلي راپیدا شي چې یوازې د هغوی عسکر نه دي وژل شوي. ۳۲ ما په فرعون باندې خلک وېرول، خو هغه او د هغه ټولې لښکرې به ووژل شي او د هغو نورو ټولو بېدینه خلکو سره به ښخ شي چې په جنګ کې وژل شوي دي.›»