۱ یعقوب چې هرڅه درلودل هغه یې واخیستل او بیرشبع ته لاړ او هلته یې د خپل پلار اسحاق خدای ته قربانۍ وړاندې کړې. ۲ خدای د یعقوب سره د شپې په رویا کې خبرې وکړې او ورته ویې ویل: «ای یعقوبه، ای یعقوبه!» هغه ځواب ورکړ: «زه حاضر یم.» ۳ هغه وویل: «زه خدای یم، ستا د پلار خدای. مصر ته د تللو څخه مه وېرېږه، ځکه چې هلته به ستا څخه یو لوی قوم جوړ کړم. ۴ زه به ستا سره مصر ته لاړ شم او په یقین سره به ستا اولاده بېرته دې وطن ته راولم. کله چې ته مړ شوې، نو یوسف به دې ښخ کړي.»
۵ نو یعقوب د بیرشبع څخه روان شو. د هغه زامنو خپل پلار یعقوب، خپل اولادونه او خپلې ښځې واخیستلې او په هغو ګاډیو کې یې سپرې کړلې چې فرعون د هغوی د راوستلو دپاره لېږلې وې. ۶ همدارنګه هغوی خپل حیوانات او شتمني چې په کنعان کې یې ګټلي وو، واخیستل او یعقوب او د هغه ټوله اولاده مصر ته لاړل. ۷ نو هغه د ځان سره خپل زامن، لمسیان، خپلې لورګانې، لمسیانې او خپله ټوله اولاده مصر ته بوتلل.
۸ د یعقوب د کورنۍ غړي چې د هغه سره مصر ته راغلل دا دي: د یعقوب مشر زوی روبین. ۹ د روبین زامن: حنوک، فلو، حزرون او کرمي. ۱۰ شمعون او د هغه زامن: یموییل، یامین، اوحد، یاکین، صوحر او شاوول د کنعانۍ ښځې زوی. ۱۱ لاوي او د هغه زامن: جرشون، قهات او مراري. ۱۲ یهودا او د هغه زامن: عیر، اونان، شیله، فارص او زارح. (خو عیر او اونان په کنعان کې مړه شوي وو.) د فارص زامن حصرون او حامول وو. ۱۳ یساکار او د هغه زامن: تولاع، فوه، یوب او شمرون. ۱۴ زبولون او د هغه زامن: سارد، ایلون او یاحلییل. ۱۵ دا د لیه زامن وو چې په بینالنهرین کې یې یعقوب ته وزېږول چې په هغو کې د هغې لور دینه هم شامله وه. د لیه د اولادې ټول شمېر دري دېرش تنه وو.
۱۶ جاد او د هغه زامن: صفیون، حجي، شوني، اصبون، عیري، ارودي او ارییلي. ۱۷ اشیر او د هغه زامن: یمنه، یشوه، یشوي، بریعه او د هغوی خور سارح وه. او د بریعه زامن حابر او ملکییل وو. ۱۸ دغه شپاړس تنه د یعقوب اولاده وه چې د زلفې څخه پیدا شوي وو او زلفه هغه وینځه وه چې لابان خپلې لور لیه ته ورکړې وه.
۱۹ د یعقوب د ښځې راحیل زامن: یوسف او بنیامین. ۲۰ په مصر کې د اون د کاهن لور اسنات یوسف ته منسي او افرایم وزېږول. ۲۱ بنیامین او د هغه زامن: بالع، باکر، اشبیل، جیرا، نعمان، ایحي، رش، مفیم، حفیم او آرد. ۲۲ دغه څوارلس تنه د یعقوب اولاده وه چې د راحیل څخه پیدا شوي وو.
۲۳ دان او د هغه زوی حوشیم. ۲۴ نفتالي او د هغه زامن: یحصییل، جوني، یصر او شلیم. ۲۵ دغه اووه تنه د یعقوب اولاده وه چې د بلهې څخه پیدا شوي وو او بلهه هغه وینځه وه چې لابان خپلې لور راحیل ته ورکړې وه.
۲۶ د هغو کسانو شمېر چې په خپله د یعقوب د نسل څخه وو او د هغه سره مصر ته تللي وو، ټول شپږشپېته تنه وو چې په هغو کې د یعقوب د زامنو ښځې شاملې نه وې. ۲۷ د یوسف زامن چې په مصر کې پیدا شول دوه تنه وو. نو د یعقوب د کورنۍ غړي چې مصر ته تللي وو ټول اویا تنه وو.
۲۸ یعقوب یهودا د ځان څخه مخکې یوسف ته ولېږه چې د جوشن لاره ورته وروښایي. کله چې هغوی د جوشن سیمې ته ورسېدل، ۲۹ یوسف خپله جنګي ګاډۍ تیاره کړه او جوشن ته د خپل پلار د لیدلو دپاره روان شو او څنګه چې یې هغه ولیده، په غېږ کې یې ونیوه او ډېر یې وژړل. ۳۰ یعقوب یوسف ته وویل: «اوس زه مرګ ته تیار یم، ځکه چې ته مې ولیدلې او پوه شوم چې تراوسه پورې ژوندی یې.»
۳۱ نو بیا یوسف خپلو ورونو او د خپل پلار کورنۍ ته وویل: «زه ځم او د فرعون سره خبرې کوم او ورته به ووایم چې زما ورونه او زما د پلار ټوله کورنۍ چې په کنعان کې اوسېدل، ماته راغلي دي. ۳۲ دا خلک شپانه دي او حیوانات ساتي او خپلې رمې، پادې او هرڅه چې یې درلودل د ځان سره یې راوړي دي. ۳۳ کله چې فرعون تاسو راوغواړي او پوښتنه درڅخه وکړي چې تاسو څه کسب کوئ، ۳۴ نو تاسو باید ځواب ورکړئ چې مونږ د هلکتوب څخه د خپلو نیکونو په شان تراوسه پورې حیوانات ساتو. نو بیا به تاسو ته اجازه درکړي چې د جوشن په سیمه کې واوسېږئ.» یوسف دا خبره په دې خاطر وکړه چې مصریان د شپنو څخه کرکه کوي.