۱ دا د آدم د اولادې لست دی. کله چې خدای انسان پیدا کړ، هغه یې د خپل ځان په شان پیدا کړ. ۲ هغوی یې نر او ښځه پیدا کړل او برکت یې ورته ورکړ او هغوی یې انسانان وبلل. ۳ آدم د یوسلو دېرش کالو ؤ چې د هغه زوی پیدا شو چې د هماغه په شان ؤ او په هغه باندې یې شیت نوم کېښود. ۴ د شیت د پیدا کېدلو څخه وروسته آدم اته سوه کاله نور هم ژوندی ؤ او نور زامن او لورګانې یې پیدا شوې. ۵ نو آدم د نهه سوه دېرشو کالو په عمر ؤ چې مړ شو.
۶ شیت د یوسلو پنځو کالو ؤ چې د هغه زوی انوش پیدا شو. ۷ او وروسته له هغې چې دی د انوش پلار شو، شیت اته سوه اووه کاله ژوند وکړ او نور زامن او لورګانې یې پیدا شوې ۸ او په نهه سوه دولس کلنۍ کې مړ شو.
۹ انوش د نوي کالو په عمر ؤ چې زوی یې پیدا شو او د هغه نوم یې قینان کېښود. ۱۰ وروسته له دې چې هغه د قینان پلار شو انوش اته سوه پنځلس کاله ژوند وکړ او نور زامن او لورګانې یې پیدا شوې ۱۱ او په نهه سوه پنځه کلنۍ کې مړ شو.
۱۲ قینان اویا کلن ؤ چې د هغه زوی مهللییل پیدا شو. ۱۳ وروسته له دې چې هغه د مهللییل پلار شو، قینان اته سوه څلوېښت کاله ژوند وکړ او نور زامن او لورګانې یې پیدا شوې ۱۴ او په نهه سوه لس کلنۍ کې مړ شو.
۱۵ مهللییل پنځه شپېته کلن ؤ چې د هغه زوی یارد پیدا شو. ۱۶ مهللییل د یارد د زېږېدلو څخه وروسته اته سوه دېرش کاله ژوند وکړ او نور زامن او لورګانې یې پیدا شوې ۱۷ او په اته سوه پنځه نوي کلنۍ کې مړ شو.
۱۸ یارد د یوسلو دوه شپېته کالو ؤ چې د هغه زوی خنوخ پیدا شو. ۱۹ وروسته له دې چې هغه د خنوخ پلار شو، یارد اته سوه کاله ژوند وکړ او نور زامن او لورګانې یې پیدا شوې ۲۰ او په نهه سوه دوه شپېته کلنۍ کې مړ شو.
۲۱ خنوخ د پنځه شپېته کالو ؤ چې د هغه زوی متوشالح پیدا شو. ۲۲ وروسته له دې چې هغه د متوشالح پلار شو، خنوخ درې سوه کاله د خدای سره په دوستۍ کې تېر کړل او نور زامن او لورګانې یې پیدا شوې. ۲۳ خنوخ درې سوه پنځه شپېته کاله ژوند وکړ. ۲۴ هغه د خدای سره په دوستۍ کې خپل ژوند تېر کړ او له هغې نه وروسته هغه د سترګو څخه پناه شو، ځکه چې خدای هغه پورته بوته.
۲۵ متوشالح د یوسلو اووه اتیا کالو ؤ چې د هغه زوی لمک پیدا شو. ۲۶ وروسته له دې چې هغه د لمک پلار شو، متوشالح اووه سوه دوه اتیا کاله ژوند وکړ او نور زامن او لورګانې یې پیدا شوې ۲۷ او په نهه سوه نهه شپېته کلنۍ کې مړ شو.
۲۸ لمک د یوسلو دوه اتیا کالو ؤ چې د هغه زوی پیدا شو. ۲۹ لمک وویل: «دا به زمونږ دپاره په ستونزو، په سخت کار او د لاسونو په تڼاکو کې تسلي وي چې مونږ یې په هغې ځمکې باندې کوو چې څښتن ورباندې لعنت ویلی دی.» نو په هغه باندې یې نوح نوم کېښود. ۳۰ وروسته له دې چې نوح پیدا شو، لمک پنځه سوه پنځه نوي کاله ژوند وکړ او نور زامن او لورګانې یې پیدا شوې ۳۱ او په اووه سوه اووه اویا کلنۍ کې مړ شو.
۳۲ وروسته له دې چې نوح د پنځه سوه کالو شو، د هغه درې زامن پیدا شول چې سام، حام او یافت نومېدل.