۱ د اریحا خلکو د اسراییلیانو له وېرې د ښار دروازې کلکې وتړلې او د هغه ساتنه کېدله. هېچا نه شو کولای چې ښار ته ننوځي یا د ښار څخه ووځي. ۲ څښتن یوشع ته وویل: «زه اریحا د هغه د پاچا او د هغه د زړورو عسکرو سره تاته تسلیموم. ۳ ته او ستا عسکر باید شپږ ورځې د ورځې یوځل د ښار څخه ګردچاپېره وګرځئ. ۴ اووه کاهنان چې د هر یو سره سرنی وي هغوی دې د لوظ د صندوق په مخکې روان شي. په اوومه ورځ په داسې حال کې چې کاهنان به خپل سرني ووهي، تاسو ټول اووه ځله د ښار څخه ګردچاپېره وګرځئ. ۵ بیا دې هغوی په لوړ اواز سره سرني ووهي. څنګه چې تاسو هغه واورئ، ټول خلک دې په لوړ اواز چیغې ووهي، نو د ښار دېوالونه به راپرېوځي. بیا به ټول لښکر مخامخ ښار ته ننوځي.» ۶ یوشع کاهنان راوغوښتل او هغوی ته یې وویل: «د لوظ صندوق واخلئ او اووه تنه د سرنیو سره د هغه په مخکې حرکت وکړئ.» ۷ بیا هغه قوم ته حکم وکړ: «د ښار څخه ګردچاپېره وګرځئ او وسله وال ساتونکي دې د څښتن د لوظ د صندوق په مخکې روان وي.»
۸ څنګه چې یوشع قوم ته وینا وکړه، هغه اووه کاهنان چې سرني یې وړل هغوی مخکې روان شول، خپل سرني یې وهل او د څښتن د لوظ صندوق د هغوی پسې ؤ. ۹ وسله وال ساتونکي د هغو کاهنانو په مخکې چې سرني یې وهل روان وو او شاتنۍ ساتونکې ډله د صندوق پسې روانه وه. په دې ټول وخت کې سرني وهل کېدل. ۱۰ خو یوشع په قوم باندې امر وکړ: «چیغې مه وهئ، ترڅو پورې چې زه تاسو ته امر ونه کړم تاسو به هېڅ نه وایئ.» ۱۱ نو یوشع وویل چې د څښتن د لوظ صندوق دې یوځل د ښار څخه ګردچاپېره وګرځوي. بیا ټول خلک بېرته کمپ ته راغلل او هلته یې شپه تېره کړه.
۱۲ یوشع سهار وختي پاڅېده او کاهنانو او خپلو کسانو ته یې هماغه امر وکړ. نو هغو کاهنانو چې د لوظ د صندوق د وړلو حکم ورته شوی ؤ هغه په خپلو اوږو باندې کېښود. ۱۳ بیا هغوی لکه د تېرې ورځې په شان په هماغه ترتیب سره د ښار ګردچاپېره وګرځېدل. لومړی هغه ساتونکي چې مخکې روان وو، بیا هغه کاهنان چې د ګرځېدلو په حال کې به یې هر وخت سرني وهل، ورپسې هغه کاهنان چې د څښتن د لوظ صندوق یې وړلو او په اخره کې شاتنۍ ساتونکې ډله. ۱۴ نو په دوهمه ورځ هغوی بیا یوځل د ښار څخه ګردچاپېره وګرځېدل او وروسته کمپ ته راستانه شول. هغوی شپږ ورځې دا کار وکړ.
۱۵ په اوومه ورځ هغوی سهار وختي پاڅېدل او په همدې ډول اووه ځلې د ښار څخه ګردچاپېره وګرځېدل. دا یوازېنۍ ورځ وه چې هغوی اووه ځلې داسې وکړل. ۱۶ په اووم ځل کله چې کاهنانو سرني ووهل، یوشع په قوم باندې امر وکړ: «چیغې ووهئ! ځکه چې څښتن دا ښار تاسو ته درکړی دی! ۱۷ دا ښار او هرڅه چې په کې دي هغه باید څښتن ته د نذرانې په توګه بیخي له منځه یووړل شي. یوازې راحاب بدلمنه او د هغې کورنۍ دې ژوندي پاتې شي، ځکه چې هغې زمونږ جاسوسان پټ کړي وو. ۱۸ خو تاسو باید هېڅ شی چې له منځه وړل کیږي وانخلئ، که تاسو یې واخلئ، نو د اسراییلو په کمپ باندې به مصیبت او تباهي راولئ. ۱۹ ټول سپین زر او سره زر او د برنجو او اوسپنې شیان په ځانګړې توګه د څښتن دي او د هغه په خزانه کې باید کېښودل شي.»
۲۰ نو کاهنانو سرني ووهل. څنګه چې قوم د سرنیو غږ واورېده، هغوی په لوړ اواز چیغې ووهلې او ناڅاپه د اریحا د ښار دېوالونه راولوېدل. نو بیا ټول لښکر نېغ په نېغه غونډۍ ته وروخوت. هغوی ښار ته ننوتل او هغه یې ونیوه. ۲۱ هغوی په خپلو تورو باندې په ښار کې ټول خلک یعنې سړي، ښځې، ځوان او زوړ ټول ووژل. همدارنګه هغوی غویان، پسونه او خره هم ووژل.
۲۲ نو بیا یوشع هغو دوو کسانو ته چې جاسوسي یې کړې وه وویل: «تاسو د هغې بدلمنې کور ته ورننوځئ او لکه څنګه چې مو د هغې سره وعده کړې وه، هغه او د هغې کورنۍ راوباسئ.» ۲۳ نو هغوی لاړل او راحاب یې د هغې د مور او پلار، ورونو او د هغې د ټولې کورنۍ سره راوویستل. هغوی د راحاب ټوله کورنۍ یو خوندي ځای ته چې د اسراییلو کمپ ته نژدې ؤ یووړله. ۲۴ بیا د اسراییلو لښکرو ټول ښار د هرڅه سره وسوځاوه، خو هغوی سپین زر او سره زر او د برنجو او اوسپنې شیان د څښتن د کور په خزانه کې کېښودل. ۲۵ خو یوشع د راحاب بدلمنې او د هغې د کورنۍ او ټولو خپلوانو ژوند وژغوره، ځکه چې هغې هغه جاسوسان پټ کړي وو چې یوشع اریحا ته لېږلي وو. (د هغې اولاده تر نن ورځې پورې په اسراییلو کې اوسیږي.)
۲۶ کله چې اریحا ورانه شوه، نو یوشع په کلکه خبرداری ورکړ: «هرڅوک چې د اریحا د ښار د بیا ودانولو هڅه وکړي، څښتن به په هغه باندې لعنت ووایي:
هرڅوک چې کېږدي بنیاد د هغه
نو له لاسه وربه کړي خپل مشر زوی
هرڅوک چې جوړې کړي د هغه دروازې
نو له لاسه وربه کړي خپل کشر زوی»
۲۷ نو څښتن د یوشع سره مل ؤ او د هغه شهرت په ټول هېواد کې خپور شو.