۱ څښتن موسی ته وویل: ۲ «فرض کړئ د کوم کس سره د بل چا کوم شی د امانت په توګه ایښی وي او هغه ورته دروغ ووایي چې هغه شی ورک شوی دی یا غلا شوی دی او په دې باندې د څښتن په وړاندې ګناه وکړي. یا فرض کړئ کوم شی غلا کړي یا یې د چا څخه په زور واخلي. ۳ یا کوم ورک شوی شی پیدا کړي او دروغ ووایي او یا قسم وخوري چې هغه یې نه دی موندلی، ۴-۵ نو په دې ډول که چېرې یو کس ګناه کوي، نو کوم شی چې هغه په غلا تر لاسه کړی وي، هغه دې بېرته ورکړي. په هغه ورځ چې دا ثابته شي چې هغه ګناهکار دی، نو د هغه خاوند ته دې پوره تاوان ورکړي او شل فیصده دې زیات هم ورکړي. ۶ نو هغه دې یو داسې پسه چې کوم عیب په کې نه وي او د تاوان د نذرانې په توګه څښتن ته وړاندې کیږي، کاهن ته راولي. هغه دې مناسبه بیه ولري. ۷ په دې ډول به کاهن د څښتن په حضور کې د هغه دپاره کفاره ادا کړي او هغه به وبخښل شي.»
۸ څښتن موسی ته وویل: ۹ «هارون او د هغه زامنو ته دا حکم ورکړه چې د سوځېدونکې نذرانې دپاره دغه اصول دي: سوځېدونکې نذرانه دې د شپې څخه تر سهاره پورې د قربانۍ په ځای باندې پاتې شي او د قربانۍ په ځای باندې باید اور بل وساتل شي. ۱۰ بیا به کاهن خپل د کتان نېکرونه د کتان د چپنې سره واغوندي او د سوځېدونکې نذرانې ایرې به چې د قربانۍ په ځای باندې پاتې شوې دي، لېرې کړي او د قربانۍ د ځای په څنګ کې به یې واچوي. ۱۱ بیا دې هغه دا کالي وباسي او نور دې واغوندي او ایرې دې د کمپ څخه دباندې یو پاک ځای ته یوسي. ۱۲ د قربانۍ په ځای باندې باید اور بل وساتل شي او باید مړ نه شي. کاهن دې هر سهار د اور لرګي ورزیاتوي او په اور باندې دې سوځېدونکې نذرانه په ترتیب سره ږدي او په هغه باندې دې د سلامتۍ د نذرانې وازګه وسوځوي. ۱۳ د قربانۍ په ځای باندې باید اور په دوامداره توګه بل وساتل شي او باید مړ نه شي.
۱۴ د غلې دانې د نذرانې دپاره دغه اصول دي: د هارون زامن چې کاهنان دي دا نذرانه دې د قربانۍ د ځای مخې ته څښتن ته وړاندې کړي. ۱۵ کاهن دې د ښو اوړو او تېلو څخه چې قیمتي خوشبویي ورباندې شیندل شوې ده او ټوله څښتن ته وړاندې کیږي، یو موټی د نمونې په توګه واخلي او د قربانۍ په ځای باندې دې وسوځوي. د دې نذرانې بوی په څښتن باندې ښه لګیږي. ۱۶-۱۷ د هغې پاتې برخه به کاهنان وخوري. د هغې څخه دې فطیره ډوډۍ پخه شي او په یو سپېڅلي ځای یعنې د سپېڅلې خېمې په حوېلۍ کې دې وخوړل شي. څښتن هغه کاهنانو ته د هغو نذرانو څخه چې په اور باندې ورته تیاریږي د هغوی د برخې په توګه ورکړې ده. دا د ګناه او تاوان د نذرانو په شان ډېره سپېڅلې ده. ۱۸ د هارون هره اولاده چې نارینه وي هغه خوړلی شي. دا د هغو دوامدارو نذرانو یوه برخه ده چې تل به څښتن ته په اور باندې تیاریږي. که بل څوک هغو نذرانو ته لاس وروړي، نو د هغو سپېڅلتوب به ورته زیان ورسوي.»
۱۹ همدارنګه څښتن موسی ته وویل: ۲۰ «دا هغه نذرانه ده چې هارون او د هغه زامن یې باید په هغه ورځ چې هغوی په کې د کاهنانو په توګه ټاکل کیږي، څښتن ته وړاندې کړي: هغوی دې یو کیلو ګرام ښه اوړه د نذرانې په توګه څښتن ته وړاندې کړي (د غلې دانې د ورځنۍ نذرانې په اندازه). د هغې څخه دې نیم په سهار کې او نیم په ماښام کې وړاندې کړي. ۲۱ هغه دې د تېلو سره ګډ شي او په تبۍ باندې دې پاخه شي او بیا دې میده میده شي او د غلې دانې د نذرانې په توګه دې وړاندې شي. دا یو داسې بوی دی چې په څښتن باندې ښه لګیږي. ۲۲ د هارون د اولادې څخه چې هرڅوک د لوی کاهن په توګه خدمت کوي، تل به دا نذرانه وړاندې کوي. هغه دې څښتن ته د قربانۍ په توګه ټول وسوځول شي. ۲۳ د کاهن د غلې دانې هره نذرانه باید ټوله وسوځول شي، هغه باید ونه خوړل شي.»
۲۴ څښتن موسی ته وویل: ۲۵ «هارون او د هغه زامنو ته ووایه چې د ګناه د نذرانې دپاره دغه اصول دي: د ګناه د نذرانې دپاره دې حیوان په هغه ځای کې چې د سوځېدونکې نذرانې دپاره حیوانات حلالیږي، حلال شي. دا ډېره سپېڅلې نذرانه ده. ۲۶ کاهن چې دا حیوان قرباني کوي، هغه دې په یو سپېڅلي ځای یعنې د سپېڅلې خېمې په حوېلۍ کې وخوري. ۲۷ که یو څوک یا یو شی د دې حیوان د غوښې سره ولګیږي، د هغې سپېڅلتوب به ورته زیان ورسوي. که چېرې د کالیو کوم ځای د دې حیوان په وینه ککړ شي، هغه باید په یو سپېڅلي ځای کې ووینځل شي. ۲۸ د خاورو یو لوښی چې هغه غوښه په کې خوټول کیږي، باید مات شي او که چېرې د برنجو د لوښي څخه کار اخیستل کیږي، باید وموښل شي او په اوبو ووینځل شي. ۲۹ د کاهنانو د کورنیو هر نارینه کولای شي چې دا نذرانه وخوري، هغه ډېره سپېڅلې ده. ۳۰ خو د ګناه کومه نذرانه چې وینه یې سپېڅلې خېمې ته راوړل کیږي چې په سپېڅلي ځای کې یې کفاره ادا شي، هغه نذرانه باید ونه خوړل شي، بلکې وسوځول شي.