۱ هُداوندا گۆن موسّایا گوَشت: ۲ ”سجّهێن ائولی مَردێن‌چُکّان گیشّێن و په من وَپْک بکن. اِسراییلئے سجّهێن ائولی چُکّ منیگ اَنت، اِنسانانی چُکّ ببنت یا دَلوَتانی.“
۳ موسّایا گۆن مردمان گوَشت: ”اے رۆچا مشمۆشێت که شما همے رۆچا چه مِسرا دَر آتکگێت، چه هما مُلکا که اۆدا گُلام بوتگێت و هُداوندا گۆن وتی دستئے زۆرا شمارا چه اۆدا در کرتگ و آورتگ. هُمیری نگن مئورێت. ۴ شما مرۆچیگێن رۆچا، اَبیبئے ماها چه اِدا درَ کپێت.
۵ وهدے هُداوند شمارا کَنهانی و هیتّی و اَموری و هێوی و یَبوسیانی مُلکا بارت، هما مُلکا که گۆن شمئے پت و پیرُکان سئوگندی وارتگ که شمارا دنتی، هما مُلکا که اۆدا شیر و بێنَگئے جۆ تچگا اَنت، اۆدا اے رسما همے ماها برجاه بدارێت. ۶ تان هپت رۆچا بێهُمیرێن نگن بوَرێت و هپتمی رۆچا هُداوندئے ناما ائییدے بکنێت. ۷ تان هپت رۆچا بێهُمیرێن نگن بوَرێت. شمئے کرّا و شمئے هدّ و سیمسرانی تها هچّ هُمیر دست مکپیت. ۸ اے ائییدا که کنێت، هرکَس گۆن وتی چُکّا بگوَشیت: ’چه مِسرا در کپگئے وهدا هُداوندا په من هما کار که کرت، من هما کارئے هاترا اے ائییدا کنان.‘
۹ وتی دستا نشانے و پێشانیگا یاتگێجے پِر کن که هُداوندئے شَریَت تئیی دپا ببیت. چێا که هُداوندا گۆن وتی پُرزۆرێن دستا ترا چه مِسرا در کرت. ۱۰ اے پَرمانا سال په سال برجاه بدار، اِشیئے گیشّێنتگێن وهدا.
۱۱ وهدے هُداوند شمارا کَنهانیانی مُلکا بارت و هما پئیما که گۆن شما و شمئے بُنپیرُکان سئوگندی وارتگ، آ مُلکا شمارا دنت، ۱۲ اۆدا وتی ائولی مَردێن‌چُکّان گیشّێنێت و په هُداوندا وَپْک کنێت. شمئے مال و دَلوَتانی سجّهێن ائولی نَرێن چُکّ هم هُداوندئے ببنت. ۱۳ هرئے ائولی کُرّگئے بدلا گوَرانڈے بکُش و کُرّگا بمۆک، بله اگن نَمۆکئےای، گڑا کُرّگئے گردنا بپرۆش. اِنسانانی سجّهێن ائولی مردێن‌چُکّان اَلّم بمۆک.
۱۴ اگن باندا تئیی چُکّا چه تئو جُست کرت: ’اے کارا چێا کنگا ائے؟‘ تئو بگوَش: ’هُداوندا گۆن وتی دستئے زۆرا مارا چه مِسرا در کرت و آورت، چه هما مُلکا که اۆدا ما گُلام اَتێن. ۱۵ وهدے پِرئونا زِدّ کرت و مارا رئوگا نه‌اِشت، هُداوندا مِسرئے مُلکا سجّهێن ائولی چُکّ کُشتنت، چه انسانئے ائولی مَردێن‌چُکّان بگر تان دَلوَتانی ائولی نَرێن چُکّان، سجّهێنی کُشتنت. پمێشکا من هر دَلوَتئے ائولی نَرێن چُکّا په هُداوندا کُربانیگَ کنان و وتی لۆگئے سجّهێن ائولی مَردێن‌چُکّانَ مۆکان.‘ ۱۶ اے پَرمانا وتی دستا نِشانے و پێشانیگا ٹِکّے کن و پِر کن چێا که هُداوندا گۆن وتی پُرزۆرێن دستا ترا چه مِسرا در کرت و آورت.“
۱۷ وهدے پِرئونا مهلوک رئوگا اِشت، هُدایا آ چه پیلِستیانی مُلکئے راها نبُرتنت، بِلّ تُرے آ راه گوَنڈتر اَت، چێا که هُدایا گوَشت: ”بلکێن جَنْگے بگیپتِش و ببَجّنت و مِسرا پِر بتَرّنت.“ ۱۸ هُدایا مهلوک چه گیابانئے راها گَردێنان کرت و دێم په سُهرزِرا برت. اِسراییلی که چه مِسرا در آتکنت، سِلهبَند اَتنت. ۱۹ موسّایا ایسُّپئے هڈّ گۆن وت زرتنت گۆن، چێا که ایسُّپا بنی اِسراییل سئوگند داتگ و گوَشتگ‌اَت: ”بێشَکّ هُداوند شمئے مَدَتا کئیت. آ وهدا منی هَڈّان اَلّم چه اِدا گۆن وت ببرێت گۆن.“
۲۰ آ چه سُکّوتا راه گپتنت و اێتاما، گیابانئے گُڈّی سرا اُردِش کرت. ۲۱ هُداوند رۆچئے وهدا جمبرئے مِنُکێئے تها آیانی دێما رئوان اَت که راها پێش بداریت. شپئے وهدا آسئے مِنُکێئے تها آیانی دێما رئوان اَت که آیان رُژن بدنت و آ شپا هم سپر کرت بکننت و رۆچا هم. ۲۲ رۆچئے وهدا جمبرئے مِنُک و شپئے وهدا آسئے مِنُک، دوێن چه مهلوکئے دێما دورَ نبوتنت.