۱ میدیانئے دینی پێشوا یَترون که موسّائے جَنئے پت اَت، هما سجّهێن کارانی بارئوا سهیگ بوت که هُدایا په موسّا و آییئے مهلوک اِسراییلا کرتگ‌اَتنت، بزان هُداوندا چۆن اِسراییلی چه مِسرا در کرت و آورتنت. ۲-۳ موسّایا وتی جَن سَپورَه پتئے لۆگا راه داتگ‌اَت. نون یَترونا موسّائے جَن و آییئے دوێن مردێن‌چُکّ زرتنت و راه گِپت. یکّ چُکّێئے نام گئیرشام اَت، چێا که موسّایا گوَشتگ‌اَت که من دَرمُلکا درامدے آن. ۴ دومی چُکّئے نام اێلیزِر اَت، چێا که موسّایا گوَشتگ‌اَت که منی پتئے هُدا منی مَدتکار بوتگ و منا چه پِرئونئے زهما رَکّێنتگی.
۵ موسّائے ناکۆ یَترون گۆن موسّائے جَن و چُکّان گیابانا، هُدائے کۆها شت، همۆدا که موسّایا اُرد کرتگ‌اَت. ۶ یَترونا په موسّایا پئیگام راه دات: ”منِ یَترون تئیی ناکۆ، تئیی جَن و دوێن چُکّانی همراهیا تئیی کرّا پێداک آن.“ ۷ موسّا په وتی ناکۆئے پێشوازیا در آتک، په اَدب سَری جَهل کرت و ناکۆیی چُکِّت. یکدومیئے هالپُرسی‌اِش کرت و گِدانا پُتِرتنت. ۸ هُداوندا اِسراییلیانی هاترا گۆن پِرئون و مِسریان هرچے که کرتگ‌اَت، موسّایا آ سجّهێن هبر گۆن وتی ناکۆا کرتنت. راهئے سجّهێن سکّی و سۆریانی بارئوا هم هبری کرت و گوَشتی که هُداوندا چۆن مارا رَکّێنتگ. ۹ یَترون آ سجّهێن شَرّێن کارانی سرا گَل بوت که هُداوندا په اِسراییلیان هما وهدا کرتگ‌اَتنت که اسراییلی‌ای چه مِسریان رَکّێنتنت.
۱۰ یَترونا گوَشت: ”هُداوندا ستا بات که شمارا چه پِرئون و مِسریانی دستا رَکّێنتگی و کئومی چه مِسریانی زُلما نِجات داتگ. ۱۱ نون منَ زانان که هُداوند چه آ دگه سجّهێن هُدایان مستر اِنت. چێا که وتی مهلوکی چه گُروناکێن مِسریانی زُلم و زۆراکیان رَکّێنت.“ ۱۲ موسّائے ناکۆ یَترونا په هُدایا سۆچَگی و دگه کُربانیگ پێش کرت. هارون و اِسراییلئے سجّهێن کماش آتکنت که هُدائے بارگاها گۆن موسّائے ناکۆا نان بوَرنت.
۱۳ چۆ بوت که دومی رۆچا موسّا په مهلوکئے دادرَسیا نِشت. مردم سُهبا تان بێگاها آییئے چپّ و چاگردا اۆشتاتگ‌اَتنت. ۱۴ موسّا په مهلوکا هرچے که کنگا اَت، ناکۆا دیست. گوَشتی: ”اے چِه کارے که تئو په مهلوکا کنگا ائے؟ تهنا تئو چێا نِشتگئے و دادرسی کنگا ائے و اے دگه سجّهێن مردم سُهبا تان بێگاها تئیی چَپّ و چاگردا اۆشتاتگ‌اَنت؟“
۱۵ موسّایا گۆن وتی ناکۆا گوَشت: ”اے واستا که مردم هُدائے رَزائے شۆهازا منی کِرّا کاینت. ۱۶ وهدے جێڑهے بیتِش، اے منی کِرّا کاینت و من دوێن نێمگئے مردمانی پئیسلها کنان و هُدائے پَرمان و سر و سۆجانِش سرَ کنان.“
۱۷ موسّائے ناکۆا گوَشت: ”تئو شَرّێن کارے کنگا نه‌ائے. ۱۸ شما دمَ برێت، تئیی جند و اے مهلوک که تئیی همراه اِنت، شما سجّهێن دمَ برێت. اے کار په تئو سکّ گران اِنت. تئو اے کارا تهنا کرتَ نکنئے. ۱۹ نون منی هبرا گۆش دار، ترا سۆجے دئیان. هُدا گۆن تئو گۆن بات. تئو هُدائے دێما مهلوکئے نُمائِنده بئے و اِشانی جێڑهان هُدائے کرّا بِبَر. ۲۰ هُدائے هُکم و پَرمانان اِشان سَر کن و هما راهانِش پێش دار که اے برئونت و هما کارانِش سۆج دئے که اے بکننت. ۲۱ چه سجّهێن مهلوکئے نیاما بودناکێن مردم گچێن کن، هما که هُداتُرس و پُراِهتبار اَنت و چه نارئواێن پائِدگا نپرتَ کننت. مهلوکا هزار هزار، سد سد، پنجاه پنجاه و ده دها بهر کن و چه اے مردمان هر یکّے، یکّ ٹۆلیێئے مستر کن. ۲۲ اے مردم مُدام مهلوکئے دادرسیا بکننت. مزنێن جێڑهان تئیی کرّا بیارنت، بله کَسانێن جێڑهانی دادرسیا وت بکننت. اے پئیما تئیی بار سُبکترَ بیت و آ تئیی همکۆپگَ بنت. ۲۳ اگن هُدا ترا بپرماییت و تئو اَنچۆ بکنئے، گڑا اے بارا زرتَ کنئے و سجّهێن مردم په سلامتی و اێمنی وتی لۆگانَ رئونت.“
۲۴ موسّایا وتی ناکۆئے هبر گۆش داشتنت و هر کارے که ناکۆا گوَشتگ‌اَت، کرتی. ۲۵ چه سجّهێن اِسراییلا بودناکێن مَردمی گچێن کرت و مهلوکئے سَر و مستر کرتنت که هزار هزار، سد سد، پنجاه پنجاه و ده ده مردمئے مستر ببنت. ۲۶ اے مردمان مُدام مهلوکئے دادرسیَ کرت. گرانێن جێڑهِش موسّائے کرّا آورتنت، بله سجّهێن کَسانێن جێڑهانی سرا وت دادرسی‌اِشَ کرت. ۲۷ نون موسّایا وتی ناکۆ یَترون اِجازت کرت و یَترون وتی مُلکا پِر تَرّت.