۱ اِبراهێم چه اۆدا لڈِّت و نِگێبئے دَمگا شت و کادِش و شورئے نیاما جَهمنند بوت. تان چیزّے وهدا گِرارا دَرامدێئے پئیما زندی گوازێنت. ۲ اِبراهێما وتی جَن سارَهئے بارئوا گوَشت: ”منی گُهار اِنت.“گڑا گِرارئے بادشاه اَبیمَلِکا وتی مردم رئوان داتنت و سارَهی وتی کِرّا بُرت. ۳ بله شپا هُدا اَبیمَلِکئے وابا آتک و گوَشتی: ”بچار، اے جنێن که تئو برتگ، تئو اِشیئے سئوَبا مِرئے. اے سور کرتگێنے.“ ۴ اَبیمَلِک اَنگت سارَهئے نزّیکّا نشُتگ‌اَت، گوَشتی: ”او منی هُداوند! بێگُناهێن کئومے تباهَ کنئے؟ ۵ اِبراهێما وت گۆن من نگوَشت: ’اے منی گهار اِنت‘؟ و سارَها وت نگوَشت: ’اے منی برات اِنت‘؟ من اے کار گۆن ساپێن دل و پاکێن دستے کرتگ.“ ۶ هُدایا گوَشت: ”هئو! منَ زانان که تئو اے کار گۆن ساپێن دلے کرتگ و من هم ترا نه‌اِشت که منی گُنهکار ببئے، پمێشکا من ترا اے جنێنئے دست جنَگا نه‌اِشت. ۷ نون اے مردئے جَنا بِدئے. اے مرد نَبیے. په تئو دْوا کنت و تئو زندگَ مانئے. بله اگن اے مردئے جَنا مدئیئے، دلجم بئے که تئیی جند و تئیی سجّهێن مردم اَلّما مرنت.“
۸ اَبیمَلِک سُهبا ماهلّه پاد آتک، وتی سجّهێن هِزمتکاری لۆٹاێنتنت و هرچے که بوتگ‌اَت، سجّهێن هالی داتنت. آیان سکّ تُرست. ۹ گڑا اَبیمَلِکا اِبراهێم لۆٹاێنت و گوَشت: ”تئو چێا گۆن ما چُش کرت؟ من تئیی کجام کار هراب کرتگ‌اَت که تئو منی جند و منی مُلک چُشێن مزنێن گناهے سرا داتنت؟ تئو گۆن من اَنچێن کارے کرت که کَسّ گۆن کَسّا نکنت.“ ۱۰ اَبیمَلِکا چه اِبراهێما جُست کرت: ”تئیی دلا چے هست‌اَت که چُشِت کرت؟“ ۱۱ اِبراهێما پَسّئو دات: ”من وتی دلا گوَشت اِدا هچّ هُداتُرسی نێست و منی لۆگیئے سئوَبا مردم منا کُشنت. ۱۲ سارَه چۆناها وَه منی گهار اِنت که منی پتئے چُکّ اِنت، بِلّ تُرے منی ماتئے چُکّ نه‌اِنت، بله رندا ما سور کرت و آ منی لۆگی بوت. ۱۳ وهدے هُدایا منا چه منی پتئے لۆگا دَرپَدَر کرت، من گۆن سارَها گوَشت: ’اگن منا دۆستَ دارئے، هر جاگه که رئوێن، بگوَش: ”اے منی برات اِنت.“‘“
۱۴ گڑا اَبیمَلِکا پَس و گۆک و گُلام و مۆلد آورت و اِبراهێمارا دات و آییئے لۆگی سارَهی پِر ترّێنت. ۱۵ اَبیمَلِکا گوَشت: ”منی مُلک تئیی دێما اِنت، هر جاه که ترا دۆستَ بیت همۆدا بِنند.“ ۱۶ گۆن سارَها گوَشتی: ”من تئیی براتا هزار نُگرهَ دئیان. تئیی سجّهێن مردمانی دێما اے مَلاما پُرَّ کنان که تئو هچّ رَدیے نکرتگ.“ ۱۷ گڑا اِبراهێما هُدائے کِرّا دْوا کرت و هُدایا اَبیمَلِک، آییئے لۆگی و آییئے مۆلد دْراه کرتنت که پدا چُکّ آورت بکننت، ۱۸ چێا که هُداوندا اِبراهێمئے جَن سارَهئے سئوَبا اَبیمَلِکئے لۆگئے سجّهێن جنێن چُکبَند کرتگ‌اَتنت.