۱ کَمّے وهدا رند مِسرئے بادشاهئے آپیا و نانیا وتی واجه، مِسرئے بادشاهئے نِزَرا رَدی کرت. ۲ پِرئون دوێن کاردارانی سرا، مسترێن آپی و مسترێن نانیئے سرا زهر گپت و ۳ نگهپانانی مسترئے لۆگا بندی کناێنتنت، هما بندیجاها که ایسُّپ بندیگ اَت. ۴ نگهپانانی مسترا ایسُّپ هُکم دات که اِشانی هئیالا بدار. ایسُّپا اَنچُش کرت. اے مردم تان مُدّتێا بندیجاها مَنتنت.
۵ مِسرئے بادشاهئے آپی و نانی که بندیجاها اَتنت، یکّ شپے دوێنان واب دیست و هر یکّێئے وابا جتاێن ماناے هست‌اَت. ۶ وهدے ایسُّپ اے دگه سُهبا آیانی کرّا آتک، دیستی که دوێن پرێشان اَنت. ۷ پِرئونئے همے دوێن کاردار که ایسُّپئے واجهئے بندیجاها گۆن آییا یکجاه بند اَتنت، ایسُّپا چه آیان جُست کرت: ”مرۆچی شما پرێشان اێت، چِه گپّے؟“ ۸ آیان پَسّئو دات: ”ما دوێنان واب دیستگ و کَسّ نێست که مانااِش بکنت.“ایسُّپا گوَشت: ”وابانی مانائے زانگ وَه هُدایی کارے. وتی وابان منا بگوَشێت.“
۹ گڑا آپیانی مسترا وتی واب گۆن ایسُّپا گوَشت: ”بچار، من وابے دیست که انگورئے درچکے منی دێما اِنت. ۱۰ درچکا سئے ٹال پِر. اَنچۆ که درچکا تِج جَت، بورّ و بَر بوت و چه هۆشان رَستگێن انگور در آتک. ۱۱ پِرئونئے پیاله منی دستا اَت. من انگور سر چِت و پِرئونئے پیالهئے تها پْرِتکنت و پیاله آییئے دستا دات.“
۱۲ ایسُّپا گوَشت: ”تئیی وابئے مانا اِش اِنت: سئے ٹالئے مانا سئے رۆچ اِنت. ۱۳ سئے رۆچئے تها پِرئون تئیی سرا بُرزَ کنت و ترا پێسریگێن مَنسَبا دنت. تئو پِرئونئے پیالها دستا دئیئے، اَنچۆ که تئو پێسرا کرتگ هما وهدا که آییئے آپی بوتگئے. ۱۴ وهدے تئیی کار شَرَّ بنت، منی یاتا بکپ. مهربانی بکن و منی هالا پِرئونا سر کن و منا چه اے بندیجاها در کناێن. ۱۵ من چه اِبرانیانی مُلکا دُزّگ و اِدا آرگ بوتگان و اِدا هم من چُشێن کارے نکرتگ که اے سیَه‌چاتا دئور دئیگ ببان.“
۱۶ وهدے نانیانی مسترا دیست که ایسُّپا شَرّێن ماناے کرت، گوَشتی: ”من وتی وابا دیستگ که نگنئے سئے سَپْت منی سرا اِنت و ۱۷ سربُرئے سپتا په پِرئونا وڑ وڑێن پتکگێن وراک مان، بله بالی مُرگ چه سپتا اِشان ورگا اَنت.“ ۱۸ ایسُّپا گوَشت: ”تئیی وابئے مانا اِش اِنت: سئے سپتئے مانا سئے رۆچ اِنت. ۱۹ سئے رۆچئے تها پِرئون تئیی سرا ’بُرزَ‘ کنت و ترا درچکێا درَنجیت و بالی مُرگ تئیی گۆشتا ورنت.“
۲۰ سئیمی رۆچا پِرئونئے سالگره اَت. آییا سجّهێن هِزمتکار داوَتے داتنت. وتی هِزمتکارانی دێما مسترێن آپی و مسترێن نانیئے سَری ”بُرز“کرتنت. ۲۱ آییا مسترێن آپی پدا هما مَنسَبا نادێنت که پِرئونئے پیاله دستا دئیۆک ببیت. ۲۲ بله هما پئیما که ایسُّپا گوَشتگ‌اَت و مسترێن نانیئے وابی مانا کرتگ‌اَت، پِرئونا مسترێن نانی دْرَتک.
۲۳ بله آپیانی مسترا ایسُّپ شمُشت و آییئے ترانَگا نکپت.