۱ ایسُّپ شت و گۆن پِرئونا گوَشتی: ”منی پت و برات گۆن وتی رمگ و گۆرُم و سجّهێن مال و هستیا چه کَنهانئے مُلکا آتکگ‌اَنت و نون گۆشِنئے دَمگا اَنت.“ ۲ ایسُّپا پنچ برات زرت و پِرئونئے دێما پێش کرت. ۳ پِرئونا چه آییئے براتان جُست کرت: ”شمئے کار و رۆزگار چے اِنت؟“آیان پَسّئو دات: ”تئیی کَستر شپانک اَنت، وتی پت و پیرُکانی پئیما.“ ۴ آیان گۆن پِرئونا چُش هم گوَشت: ”ما آتکگێن که چیزّے وهدا همِدا بنندێن، چێا که کَنهانا سکّێن مزنێن ڈُکّالے کپتگ و په تئیی کَسترانی رمگان کهچر و چراگاه نێست. مئے دَزبندی اِنت، وتی کَستران رزا بدئے که گۆشِنا جَهمنند ببنت.“ ۵ پِرئونا گۆن ایسُّپا گوَشت: ”نون که تئیی پت و برات تئیی کرّا آتکگ‌اَنت، ۶ مِسرئے سرڈگار تئیی دێما اِنت. وتی پت و براتان مُلکئے شَرترێن جاگها نادێن. بِلّی گۆشِنئے دَمگا نِندنت. اگن آیانی تها بودی و زرِنگێن مردمَ گِندئے، منی مال و دَلوَتان همایانی دستا بدئے.“
۷ گڑا ایسُّپا وتی پت آکوب پِرئونئے کرّا آورت و پَجّارێنت و آکوبا پِرئون برکت دات. ۸ پِرئونا چه آکوبا جُست کرت: ”ترا چُنت سال اِنت؟“ ۹ آکوبا پسّئو دات: ”منی زندئے مُساپریا سَد و سی سال اِنت. منی اُمر مزن نه‌اِنت و منی سال په سکّی و سۆری گوَستگ‌اَنت. چه منی پت و پیرُکانی مُساپریئے سالان کمتر اَنت.“ ۱۰ گڑا آکوبا پِرئون برکت دات و چه پِرئونئے کِرّا در آتک و شت. ۱۱ هما پئیما که پِرئونا هُکم داتگ‌اَت، ایسُّپا وتی پت و برات مِسرا نادێنتنت و مِسرئے شَرترێن جاگها بزان رَمِسێسئے دَمگا مِلکتی داتنت. ۱۲ ایسُّپا وتی پت و برات و پتئے لۆگئے سجّهێن مردم لاپ داتنت، و همینچُک چُکِّش که هست‌اَت، همینچُکی داتنت.
۱۳ نون آ سجّهێن دَمگا په ورگا هچّ نێست‌اَت، چێا که سکّێن گرانێن ڈُکّالے کپتگ‌اَت. مِسر و کَنهان دوێن، ڈُکّالا تباه کرتگ‌اَتنت. ۱۴ مردمان نُگرهَ دات و دان بها گپت. ایسُّپا مِسر و کَنهانئے سجّهێن نُگره مُچَّ کرت و پِرئونئے کلاتا آورتنت. ۱۵ وهدے مِسر و کَنهانئے دراهێن نُگره هلاس بوتنت، مِسرئے سجّهێن مردم ایسُّپئے کرّا آتکنت و گوَشتِش: ”مئے نُگره هلاس اَنت. مارا وراک بدئے. ما تئیی چمّانی دێما بمرێن؟“ ۱۶ ایسُّپا گۆن آیان گوَشت: ”گڑا وتی مال و دَلوَتان بیارێت. شمئے نُگره که هلاس بوتگ‌اَنت، شمئے دَلوَتانَ زوران و بدلا شمارا وراکَ دئیان.“ ۱۷ گڑا آیان وتی مال و دَلوَت ایسُّپئے کرّا آورتنت و ایسُّپا آیانی اَسپ و پَس و گۆک و هرانی بدلا آیانا وراکَ دات. آ سالا، ایسُّپا آیانی سجّهێن مال و دَلوَت زرتنت و بدلا آیانا وراک دات.
۱۸ سال که گوَست، مردم دومی سالا پدا ایسُّپئے کرّا آتکنت و گوَشتِش: ”ما اے گپّا چه وتی واجها چێر داتَ نکنێن که مئے نُگره هم هلاس اَنت و مئے مال و دَلوَت هم مئے واجهئے بوتنت. نون مئے کرّا مئے جسم و جان و ڈگاران اَبێد دگه هچّ پَشت نکپتگ که تئوِ واجهئے هِزمتا پێش بکنێن. ۱۹ ما گۆن وتی ڈگاران تئیی چمّانی دێما گار و گُمسار ببێن؟ مئے جند و مئے ڈگاران وراکئے بدلا بزور. ما گۆن ڈگاران پِرئونئے گُلامَ بێن. مارا دان بدئے که زندگ بمانێن و ممِرێن و مئے ڈگار هم وئیران مبنت.“ ۲۰ گڑا ایسُّپا سجّهێن مِسرئے ڈگار په پِرئونا بها زرتنت. مِسرئے سجّهێن مردمان وتی ڈگار بها کرتنت، چێا که سکّێن گرانێن ڈُکّالێا گپتگ‌اَتنت. پِرئون آیانی ڈگارانی واهند بوت. ۲۱ مِسرئے اے کُنڈا بگر تان آ کُنڈا ایسُّپا مردم لَڈّێنت و شَهرانی تها جَهمنند کرتنت. ۲۲ اَلبت، دینی پێشوایانی ڈگاری بها نزرتنت. چه پِرئونئے نێمگا آیان کُمَکَّ رَسِت و اے کُمَک په آیانی وَرد و وراکا بَسّ اَت. پمێشکا وتی ڈگارِش بها نکرتنت.
۲۳ ایسُّپا گۆن مردمان گوَشت: ”نون که من مرۆچی شمئے جند و شمئے ڈگار په پِرئونا بها زرتگ‌اَنت، تُهم اِش اَنت، زمینا بکِشێت. ۲۴ وهدے رۆن و مۆشئے مۆسمَ کئیت، ڈگارئے بَر و سَمرئے پَنچِکا پِرئونا بدئیێت. چار بهر وتی کرّا بدارێت که شمارا په کِشَگا تُهم و په وتی جند و وتی لۆگئے مردم و چُکّان وراک ببیت.“ ۲۵ مردمان گۆن آییا گوَشت: ”تئو مئے زِند رَکّێنت. واجهئے نِزَر په ما نێک بات. ما پِرئونئے گُلامَ بێن.“ ۲۶ گڑا ایسُّپا په مِسرئے مُلکا اے کانون جۆڑ کرت که تان رۆچِ مرۆچیگا هست‌اِنت که ڈگارانی بَر و سَمرئے پَنچِک پِرئونئیگ اِنت. ِپِرئون اێوکا دینی پێشوایانی زمینانی واهُند نبوت و بَسّ.
۲۷ نون اِسراییلی مِسرئے مُلکا، گۆشِنئے دَمگا جَهمنند بوتنت. اۆدا آیان ڈگار رسِت، بازێن چُکّ و برے کرتِش و سکّ باز بوتنت. ۲۸ آکوبا مِسرا هبده سال گوازێنت و تان یکّ سَد و چِلّ و هپت سالئے اُمرا زندگ اَت.
۲۹ وهدے اِسراییلئے مرکئے وهد نزّیکّ بوت، وتی چُکّ ایسُّپی لۆٹاێنت و گوَشتی: ”منی سرا مهربانیے بکن. وتی دستا منی زانئے چێرا اێر کن و کئول بدئے که گۆن من مِهر و وپا کنئے و منا مِسرا کبرَ نکنئے. ۳۰ وهدے من سر اێر کرت و وتی پت و پیرُکانی کرّا شتان، منا چه مِسرا بر و همایانی کِرّا کبر کن.“ایسُّپا گوَشت: ”شَرّ اِنت. اَنچُشَ کنان.“ ۳۱ آکوبا گوَشت: ”سئوگند بوَر.“ایسُّپا گۆن آییا سئوگند وارت. اِسراییلا نپادئے سرونا په اَدب سر جَهل کرت.